🖤താന്തോന്നി ചെക്കന്റെ ചട്ടമ്പി പെണ്ണ് 🖤

🖤🖤താന്തോന്നി ചെക്കന്റെ

ചട്ടമ്പി പെണ്ണ് 🖤🖤

""നാളെ അവനറിയും ഈ മാധുര്യ ശിവദാസ് ആരാണെന്നു ""

""അതൊക്കെ അറിയിക്കാൻ നീ ബാക്കി ഉണ്ടങ്കിൽ അല്ലേ...... ഈ നടക്ക് പോയാ നാളെ നീ ജീവനോടെ ഇണ്ടാകോന്ന് ആർക്കറിയാം..... നേരേ നോക്കി നടക്കടി.... ""

തന്റെ മുഖത്തേക്ക് നോക്കി പുറകിലേക്ക് കാലടി വച്ച് മുന്നോട്ടു നടന്നു നീങ്ങുന്നവളെ നോക്കി ദേവു പറഞ്ഞു.

""മാധു.... ""

പെട്ടന്നാണ് ഒരു റോയൽ എൻഫീൽഡ് ബുള്ളറ്റ് വന്നു മാധുനെ മുട്ടി മുട്ടില്ലന്ന് പറഞ്ഞു നിന്നു. ദേവുന്റെ അലറിച്ചയിൽ മാധുവും ഞെട്ടിത്തരിച്ചു.

""എന്തിനാടി പൊട്ടി കിടന്നു അലറിയെ.... വണ്ടി ഇടിച്ചൊന്നുമില്ലല്ലോ ""

പെട്ടന്നുള്ള ഷോക്കിൽ നിന്നും വിട്ടു മാറി പുറകിലേക്ക് ഒന്ന് തിരിഞ്ഞു നോക്കുക പോലും ചെയ്യാതെ ദേവുവിനോട് ദേഷിച്ചു. അപ്പോഴേക്കും ബലിഷ്ടമായ ഒരു കൈഅവളുടെ തോളിൽ പിടിച്ചു തിരിച്ചു നിർത്തിയിരുന്നു.

""റോഡിലൂടെ നടക്കുമ്പോ ഇങ്ങനാണോടി പുല്ലേ നടക്കണ്ടേ..?? നിന്റെ അപ്പന്റെ വകയൊന്നുമല്ലല്ലോ ഇതു... ബാക്കിയുള്ളവർക്ക് പണി ഉണ്ടാക്കാൻ ....""

തിരിഞ്ഞുനിന്നതും തന്റെ മുന്നിൽ നിക്കുന്ന ഒത്തപൊക്കവും അതിനൊത്ത മസിലൻ ബോഡിയും കട്ടതാടിയും ഒപ്പംമീശയും പിരിച്ചു വച്ചവനെത്തന്നെ ഇമ ചിമ്മാതെ നോക്കി നിന്നു. അവൻ പറഞ്ഞതൊന്നും പെണ്ണ് കേട്ടതേയില്ല....

""എന്താടി പൊട്ടിയാണോ.....?ചെവി കേൾക്കില്ലെന്നുണ്ടോ.... ?""

വീണ്ടും തന്റെ തോളിൽ കുലുക്കി ഉറഞ്ഞുതുള്ളുന്നവനെ കണ്ടപ്പോൾ അവളിലെ പാറിയ കിളികളിൽ പാതി വന്നു കൂട്ടിൽ കയറി. പെട്ടന്നുള്ള ഉൾപ്രേരണയിൽ തോളിൽ ഇരുന്ന അവന്റെ കൈകൾ തട്ടിതെറിപ്പിച്ചു. ഉള്ളിൽ പൊങ്ങി പറക്കാൻ ഉയർന്നു വന്ന കോയിക്കുഞ്ഞുങ്ങളെ അടക്കിയിരുത്തി മുഖം കൂർപ്പിച്ചു പിടിച്ചു.

""താനാരാടോ... ഹേ.... വല്ലോടത്തു വായി നോക്കി വണ്ടി ഓടിച്ചിട്ട്........

വഴിയെ പോണവർടെ മേലെവണ്ടി ഇടിപ്പിക്കാൻ വന്നിട്ടു രക്ഷനേടാൻ ആദ്യമേ ഇങ്ങോട്ട് വന്നു തള്ളികേറി മേപ്പാടനെപ്പോലെ ഉറഞ്ഞുതുള്ളുന്നോ..? ""

പറഞ്ഞവസാനിക്കുമ്പോ ചുണ്ടിൽ അല്പം പുച്ഛച്ചിരിയും സ്ഥാനം പിടിച്ചു.

""ഓഹോ ഇപ്പൊ എന്റെ മേലായോ കുറ്റം. എവിടെ നോക്കിയാടി നീ നടന്നു വന്നേ? നേരേ നോക്കി നടക്കിണ്ടേടത്ത് പുറം തിരിഞ്ഞു നടന്നുവന്നിട്ട് അവള്ടെ കവലപ്രസംഗം ""

കേറ്റി പിടിച്ച മുഖത്തോടൊപ്പം പല്ലുകളും ഞെരിച്ചമർത്തി അവനവളെ നോക്കി.

""ദേ എടി, പോടീ, അവൾ, ഇവൾന്നൊക്കെ വിളിച്ചലോണ്ടല്ലോ എന്റെ തനി കൊണം താൻ കാണും.. "

ചൂണ്ടു വിരലുയർത്തി അവന്റെ നേരേ നിന്നതും ആ വിരൽ പിടിച്ചവൻ തിരിച്ചുകഴിഞ്ഞു.

""പെണ്ണല്ലേന്ന് കരുതി വെറുതെ വിടാന്നു വച്ചപ്പോ തലേൽ കേറി നിന്ന് നാടോടി നൃത്തം ചെയ്യുന്നോ.......

വെറുതെ വിളയാൻ നിക്കല്ലേ....

ഇല്ലേൽ എന്റെ തനി കൊണം മോളു കാണേണ്ടി വരും. ""

തിരിച്ചു വച്ച വിരലിൽ നിന്ന് പിടിയയച്ചു തിരികെ ബുള്ളറ്റിൽ കയറി പോയപ്പോ ചുവന്നു വന്ന വിരലിൽ നോക്കി നിൽക്കയായിരുന്നു മാധു.

""മാധു.... ""

"തൃപ്തി ആയില്ലേ മഹാറാണിക്ക്... നാവു എടുത്തു വളച്ചില്ല അയിനു മുന്നേ... ""

ഒച്ചയെടുത്തു വന്ന മാധുവിനു ദേവു ഒന്ന് ക്ലോസ്അപ്പ്‌ പരസ്യത്തിലെ പോലെ ഇളിച്ചു കൊടുത്തു.

""എന്റെ കയ്യിലും കൊഴപ്പമുണ്ടായി പ്പോയി ഇല്ലേൽ ആ താന്തോന്നിനെ ഞാൻ ശരിയാക്കിയേനെ.. ""

സ്വയം തലക്കടിച്ചു ചവിട്ടിതുള്ളി നടക്കുന്ന പെണ്ണിനെ കണ്ടു ദേവു പൊട്ടി ചിരിച്ചു.

""എന്തിനാടി കിണിക്കുന്നെ? ""

""ഒന്നുല്ലേയ്..... അന്നേരംഉണർന്നു വന്ന പിടക്കോഴിസിനെ ഒക്കെ എവിടെ കേറ്റി ഒളിപ്പിച്ചു. ""

ഒരു കൈകൊണ്ടു വായ പൊത്തിപിടിച്ചു ചിരി അടക്കി നിന്നു ദേവു.

""ആ അതു പിന്നെ ഉണ്ണിമുകുന്ദനെപ്പോലെ ലുക്കൊള്ള ആണൊരുത്തൻ വന്നു നിന്നപ്പോ...... ""

പറയുമ്പോൾ കവിളുകളിൽ ഒരു ചുവന്ന പൊൻകിരണം ഉദിച്ചു.

""നിന്നപ്പോ...... ""

ബാക്കി അറിയാൻ ദേവു ആകാംഷയോടെ കണ്ണും കാതും കൂർപ്പിച്ചു.

""നിന്നപ്പോ ന്താ നിന്ന്.....

ഒന്ന് പോയെടി.. ""

കവിളിലൊരു കുത്ത് വച്ചു കൊടുത്തു മാധു.

""അപ്പൊ നാളെ പാക്കലാം ""

രണ്ടു പേരുടെയും വീട്ടിലേക്കുള്ള വഴി തിരിയുന്നടത്തു എത്തിയപ്പോൾ മാധു കൈ വീശി റ്റാറ്റാ കാണിച്ചു.

രാവിലെ തന്നെ മാധു കോലുമിട്ടായും വായിലിട്ടു ദേവൂനെ നോക്കി വളവിൽ നിന്നു. അവൾ വന്നപ്പോ കയ്യിലിരുന്ന മറ്റേ കോലുമിട്ടായി അവള്ക്ക് നേരേ നീട്ടി.രണ്ടും പാച്ചും കോവാലനും പോലെ നടന്നു നീങ്ങി.

"ഹയർ സെക്കണ്ടറിയിലും നമ്മൾ ഒന്നിച്ചാരുന്നെങ്കിൽ പൊളിച്ചേനെ അല്ലേടി.....

കേട്ടപ്പോ നെഞ്ചിൽ കൈ വച്ചു നടത്തം നിർത്തി ദേവു.

""ഹുയ്യോ.. ഈ മൂന്നു വർഷം എങ്ങനെ സഹിച്ചെന്ന് എനിക്കെ അറിയൂ.. അപ്പൊ ഇതിന് മുന്നേ കൂടി സഹിക്കേണ്ടി വന്നിരുന്നേലെ അവസ്ഥ. ഓര്മിപ്പിക്കല്ലേ പൊന്നേ... ""

ചുണ്ട് പിളർത്തി പരിഭവം നടിച്ച മാധുവിന്റെ തോളിൽ കൈയിട്ടു കണ്ണിറുക്കി കാണിച്ചു ദേവു പിണക്കം മാറ്റി.

അന്നും കോളേജിൽ ചെന്നപ്പോ പഞ്ചാര മുക്കിൽ അലക്സി അവളെ കാത്തു നിൽപ്പുണ്ടായിരുന്നു. കണ്ടിട്ടും നോക്കാതെ പോകാനൊരുങ്ങിയ മാധുവിന്റെ മുന്നിൽ കേറി തടസം സൃഷ്ടിച്ചു.

""മാറ്.. എനിക്ക് പോണം""അവന്റെ മുഖത്ത് നോക്കാതെ തന്നെ ഉറച്ച സ്വരത്തിൽ പറഞ്ഞു.

""എന്താ മാധു.... മൂന്നു വർഷമായി ഞാൻ നിന്റെ പിന്നാലെ നടക്കുന്നു.ഇനിയും ഇങ്ങനെ എന്നെക്കൊണ്ട് നടത്തിക്കണ്ട കാര്യം ഉണ്ടോ??? ""

തീർത്തും ശാന്തമായി പറയുന്ന അവനെ സംശയത്തോടെ മാധു തലയുയർത്തി നോക്കി.

"മൂന്ന് വർഷമായി ഞാനും പറയുന്നില്ലേ എനിക്കിഷ്ടമല്ലന്ന്....

ഫസ്റ്റ് ഇയർവന്നു എന്നോട് പറഞ്ഞപ്പോ തന്നെ പറഞ്ഞതല്ലേ വെറുതെ പൊറകേ നടന്നു ടൈമ് വേസ്റ്റ് ചെയ്യണ്ടന്ന്.... ""

""പൊന്ന് മോളെ... നിന്റെ സമ്മതമൊന്നും എനിക്ക് വേണ്ട അല്ലാതെ തന്നെയി കഴുത്തിൽ മിന്നു കെട്ടി കൊണ്ടോകാൻ ഈ അലക്സിക്ക് അറിയാം. നിന്നോടുള്ള മൂത്ത പ്രേമം കൊണ്ടൊന്നുമല്ല ഈ മേനി കണ്ടുതന്നാടി ഞാൻ നിന്റെ പിറകെ നടക്കുന്നത്. വീട്ടിൽ സ്വന്തമായി ഒരു ഉരുപ്പിടി ഒള്ളത് നല്ലത....അല്ലേടാ ശ്യാമേ??.... ""

വഷളൻ ചിരിയോടെയുള്ള നോട്ടത്തിന് നേരേ കാർക്കിച്ചു തുപ്പി അവൾ മുന്നോട്ട് നടന്നതും അവളുടെ കയ്യിൽ പിടിച്ചു വലിച്ച് നിർത്തി അലക്സി.

"" മോളു എങ്ങോട്ടാ?

ചേട്ടനോട് കുറച്ചുനേരം കൊഞ്ചിയിട്ട് പോയാമതി...""

ടപ്പേ....

പറഞ്ഞു കഴിഞ്ഞതും മുഖമടച്ചൊരടി അവന് കിട്ടിയിരുന്നു. ആ അടിയിൽ അവൻ കൈകൾ വിടുവിച്ചു.

രോഷം മുഴുവൻ കണ്ണിൽ കത്തി കയറി നിൽക്കുന്ന മാധുവിനെ ദേവു നോക്കി നിന്നു.

"" നിന്റെ വീട്ടിൽ ഉള്ളവരോട് വന്നു കൊഞ്ചാൻ പറയട നാറി... ""

തിരിഞ്ഞപ്പോൾ കേട്ടു ഡി... ന്ന് വിളിച്ചു കൊണ്ടുള്ള അലക്സിയുടെ പാഞ്ഞടുക്കൽ . ഒപ്പം നിലത്തേക്ക് ചക്ക വെട്ടിയിടുന്ന ശബ്ദവും.

തിരിഞ്ഞു നോക്കിയപ്പോൾ വീണ്ടും അവളുടെ കിളികൾ പാറിപ്പറന്നു.

ആളെ കണ്ടപ്പോൾ ചൂണ്ടുവിരൽ അറിയാതെ ഉള്ളിലേക്ക് ചുരുട്ടി പിടിച്ചു. ""താന്തോന്നി.. ""

ഷർട്ടിന്റെ ബട്ടൻസ് പാതിവഴി വരെ അഴിച്ചിട്ട് അലക്സിയുടെ നെഞ്ചിൽ ചവിട്ടി നിൽക്കുന്നവനെ കണ്ടപ്പോൾ അവളുടെനാവുകൾ മൊഴിഞ്ഞു.

"" ഇനി മേലാൽ എന്റെ പെണ്ണിന്റെ മേലെ നിന്റെ നിഴൽ വന്നെന്ന് അറിഞ്ഞാൽ...... പൊന്നുമോനെ വെച്ചേക്കില്ല നിന്നെ ഞാൻ........""

കാതുകളെ വിശ്വസിക്കാനാവാതെ മാധു അത്ഭുതത്തോടെ നിന്നു.

*എന്റെ പെണ്ണ് *എന്ന ആ വാക്കുകൾ അവളുടെ കാതിൽ വന്ന് കോളിളക്കം സൃഷ്ടിച്ചു കൊണ്ടിരുന്നു. മനസ്സിലും ചിന്തകളിലും ആ കോളിളക്കം ഇരച്ചുകയറി.

""എല്ലാം കണ്ടോണ്ട് ഞാൻ ഇവിടെത്തന്നെ ഉണ്ടായിരുന്നു. എന്റെ ചട്ടമ്പി പെണ്ണ് പ്രതികരിക്കുമെന്ന് അറിയാവുന്നതുകൊണ്ട ആദ്യമേ കേറി ഇടപെടാഞ്ഞത്. ""

ഷർട്ടിന്റെ കൈ തെറുത്തു വെക്കുന്നവനെ അന്തം വിട്ടു നോക്കി നിന്നു പെണ്ണ്. എല്ലാം കണ്ട് കുസൃതിച്ചിരിയോടെ ദേവുവും.....

അവൻ കുടു കുടു വച്ചു ബുള്ളറ്റിൽ കയറിപ്പോയി മറഞ്ഞിട്ടും നിശ്ചലമായി നിൽക്കുന്ന മാധുവിന്റെ തലയ്ക്കൊരു കിഴുക്ക് വച്ചുകൊടുത്തു ദേവു.

""അല്ലെടി താന്തോന്നി എന്നെ..........""

"" ഇതും പറഞ്ഞു നീ ഇവിടെ നിന്നോ...

ഞാൻ പോവാ... ഫമി മിസ്സാ ഫസ്റ്റ് പിരീഡ്. ""

കവിളിൽ വിരൽ കുത്തി ആലോചിച്ച് മാധു എന്തോ പറയാൻ വന്നതും ദേവുഓടിയിരുന്നു. പിറകെ മാധുവും ഓടി.

""മിസ്സ്........""

ഓടിക്കിതച്ച് വന്ന് ഫുൾസ്റ്റോപ്പ് ഇടുന്ന പോലെ നിന്നു.

നീട്ടിയുള്ള വിളി കേട്ട് രൂക്ഷമായി നോക്കിയിട്ട് അവർ ഗെറ്റ് ഇൻ പറഞ്ഞു.

ഓരോ ദിവസവും കടന്നു പോയ്ക്കൊണ്ടിരുന്നു. ക്ഷണിക്കപ്പെടാതെ കടന്നുവരുന്ന അതിഥിയായി മാറിയിരുന്നു താന്തോന്നി മധുവിന്റെ മനസ്സിൽ.....

ഉള്ളിൽ മുളച്ചുപൊന്തിയ ചോദ്യങ്ങൾക്കുള്ള ഉത്തരങ്ങൾക്കായി അവൾ നെട്ടോട്ടമോടി.

" ആരാണീ താന്തോന്നി,?

എന്റെ പെണ്ണ് എന്ന് പറയാൻ ന്താവും

കാരണം?

അയാൾക്ക് എന്നോട് പ്രേമം ഉണ്ടോ? അതിനു അയാൾ എന്നെ നേരത്തെ കണ്ടിട്ടുണ്ടോ?

ആ സമയത്ത് അയാൾ എങ്ങനെ അവിടെ വന്നത്? "

തലമുടി പിച്ചി പറിച്ച് അവൾ മേശമേൽ തുറന്നുവച്ച പുസ്തകത്തിനു മേൽ തലചായ്ച്ചു.

ഈ ചോദ്യങ്ങളൊക്കെ ദേവുവിനോട് ചോദിച്ചപ്പോൾ അവൾ അലസമായി ശ്രദ്ധിക്കാതെ അവളുടെകാര്യങ്ങളിലേക്ക് തിരിഞ്ഞു.

""മാധു... നാളെ ഞാൻ ഹാഫ് ഡേ ലീവ.....ഉച്ചയ്ക്കെ വരൂ....""

"" അപ്പൊ രാവിലെ ഞാൻ തനിയെ പോണോ? ""

കൊച്ചുകുട്ടികളെപ്പോലെ ചിണുങ്ങിയവൾ.

""ഫുൾ ഡേ എടുക്കണ്ടതായിരുന്നു. അപ്പോൾ ചിലർക്ക് നീ തനിച്ചാവൂന്നു...

നിന്നെ തനിച്ച് ആക്കാതിരിക്കാനാ ഫുൾ ഡേ എടുക്കിണ്ടടത്ത് ഹാഫ് ഡേ എടുക്കുന്നത്.""

""അതാരാ ആ ചിലർ?... ""

""അതെന്റെ വീട്ടിലുള്ളവര്... ""

വിക്കിവിക്കി പറഞ്ഞിട്ട് ദേവു വിഷയം മാറ്റി.

""കുടുംബക്ഷേത്രത്തിൽ പുനപ്രതിഷ്ഠ ആടി... പോകാതിരിക്കാൻ പറ്റില്ല. ഉച്ചക്ക് ലഞ്ച് ബ്രേക്കിന് ഞാൻ വരും.""

ഒറ്റയ്ക്ക് പോകുന്നതോർത്ത് മാധുവിനു വിഷമം തോന്നിയെങ്കിലും അത് മറച്ചുവെച്ച് ചിരിച്ചുകൊണ്ട് തലയനക്കി.

രണ്ടുപേരും രണ്ടു വഴിക്ക് തിരിഞ്ഞു.

പിറ്റേന്ന് ഉച്ചവരെ മാധു ഒരു വിധത്തിൽ തള്ളിനീക്കി. ദേവു വല്ലാതെ

ബോറടിച്ചപ്പോൾ കോളേജ് ഗ്രൗണ്ടിൽ ചെമ്പക മരച്ചുവട്ടിൽ ഒറ്റയ്ക്ക് പോയിരുന്നു. അനുസരണയില്ലാതെ അവളുടെ ചിന്തകളിൽ പേര് പോലും അറിയാത്ത *താന്തോന്നി*

വിരുന്നു വന്നുകൊണ്ടിരുന്നു. ചുണ്ടിൽ ഒരിളം പുഞ്ചിരി തത്തിക്കളിച്ചു.

പെട്ടെന്നുള്ള ബുള്ളറ്റിനെ ശബ്ദത്താൽ അവൾ തല പൊക്കി നോക്കി. ബ്ലാക്ക് ഷർട്ടും, അതേ കരയുള്ള മുണ്ടും, നെറ്റിയിൽ ചന്ദനക്കുറിയും, നീളൻ മുടിയും എല്ലാംകൊണ്ടും ബുള്ളറ്റിൽ ഇരിക്കുന്ന അവനു ആനച്ചന്ദം തോന്നിച്ചു. സൂര്യ ശോഭയിൽ വെട്ടി തിളങ്ങുന്ന കാതിലെ കടുക്കൻ കടുക്കനിലേക്ക് അവളുടെ നോട്ടം ചെന്നെത്തി.

ദൈവമേ മനസ്സിൽ വിചാരിച്ചപ്പോ ദേ കൺമുന്നിൽ......

പിറുപിറുത്തുകൊണ്ട് നോക്കുന്നത് അവന്റെ പിന്നിൽ നിന്ന് ഇറങ്ങുന്ന ദേവുവിനെ ആണ്. കണ്ടപ്പോൾ ണ്ണും തള്ളി നിന്നു പോയി .കാണുന്നത് ഉറപ്പുവരുത്താനായി അവൾ കണ്ണുകൾ ചിമ്മിതുറന്നു ഒന്നുകൂടി നോക്കി.

"" ഇതെന്റെ ചേട്ടായി ആടി.....

പ്രിത്വി വാസുദേവ്.....

ദേവു പറഞ്ഞത് കേട്ടിട്ട് താന്തോന്നി യിലേക്ക് നോട്ടം മാറ്റിയപ്പോൾ ഒരു കണ്ണിറുക്കി കാണിച്ചു. പിന്നെയും അന്തം വിട്ടു നോക്കി നിന്നപ്പോൾ പിരികം ഉയർത്തി ""എന്തേ? ""എന്ന് ചോദിച്ചിട്ട്

വണ്ടിയും എടുത്ത്പോയി.

""എങ്ങനെ ഉണ്ടെന്റെ സർപ്രൈസ്? ""

ടോപിന്റെ കോളർ പൊക്കി ദേവു ഗമയിൽ ചോദിച്ചു.

"" അന്ന് എന്നെ വണ്ടിയിടിക്കാൻ വന്നപ്പോൾ ഒന്നും എന്താടി നിന്റെ ചേട്ടായി ആണെന്ന് പറയാഞ്ഞത്? ""

കെറുവോടെ അവൾ ദേവുവിനെ നോക്കാതെ പറഞ്ഞു.

""അതല്ലേടി പൊട്ടികാളി പറഞ്ഞത് സർപ്രൈസ്........

നിന്റെ ഈ അവിഞ്ഞ മോന്ത കാണാനല്ലേ... ""

ദേവു പൊട്ടിച്ചിരിച്ചപ്പോൾ മാധുവിനുമൊരു ചിരി ഒക്കെ വന്നു.

"" എടി എന്നാലും നിന്റെ ചേട്ടായിക്ക് എങ്ങനെ എന്നെ അറിയാം?

ഇന്നലെ "എന്റെ പെണ്ണു"ന്നൊക്കെ വിളിച്ചുപറഞ്ഞത് എന്തിനാ? ""

""അതൊക്കെ ഞാൻ വൈകിട്ട് പറയാം നീ ഇപ്പൊ വാ..... ക്ലാസ്സിൽ കയറാം.""

ദേവു മാധുവിന്റെ കയ്യിൽ പിടിച്ചു വലിച്ചു കൊണ്ട് ക്ലാസ്സിലേക്ക് പോയി.

ക്ലാസ്സ് നടക്കുമ്പോഴും മാധുവിന്റെ ശ്രദ്ധ താന്തോന്നിയുടെ ചുറ്റും പാറി പറന്നു നടന്നു. അവന്റെ ബുള്ളറ്റിൽ ഇരിക്കുന്ന മുഖം മാത്രം മനസ്സിൽ തെളിഞ്ഞു നിന്നു.

വീട്ടിലേക്കുള്ള വഴിയിൽ കൂടി രണ്ടാളും നടക്കുമ്പോൾ എല്ലാം അറിയാനുള്ള വ്യഗ്രതയിലായിരുന്നു മാധു.

"" പറ... പറ... "

ജിജ്ഞാസ അടക്കാനാവാതെ മാധു തിടുക്കം കൂട്ടി.

അങ്ങനെ ദേവു പറഞ്ഞു തുടങ്ങി.

""എടി നമ്മൾ പ്ലസ് വൺ പ്ലസ് ടു പഠിക്കുന്ന കാലം......

നമ്മൾ രണ്ടുപേരും രണ്ടു സ്കൂളിലായിരുന്നല്ലോ.

നിന്നെ ഞാൻ കോളേജിൽ വച്ച ആദ്യമായി കാണുന്നത് തന്നെ.......

പക്ഷേ എന്നെക്കാൾ മുന്നേ ചേട്ടായി നിന്നെ കണ്ടിട്ടുണ്ട്.

ഒരിക്കൽ ഏതോ ഒരുത്തനെ ബസ്സിൽ വെച്ച് തല്ലുന്നത ചേട്ടായി ആദ്യമായിട്ട് കാണുന്നത്.

ബസിൽ വച്ച് ഏതോ ഒരുത്തൻ എന്തോ കൊള്ളരുതായ്ക കാണിച്ചതിനോ മറ്റോ അവന്റെ കോളറിൽ പിടിച്ച് കരണം നോക്കി പൊട്ടിക്കുന്ന ആ കൊച്ചു ചട്ടമ്പി..... ""

""ഓ അതൊ.........അത് കൂടെ ഉണ്ടായിരുന്ന ചേച്ചിയോട് ഒരു ഡാഷ്മോൻ വേണ്ടദീനം കാണിച്ചിട്ട.....

ആ ചേച്ചി ഒരു പാവം. ഒന്നു നോക്കി പേടിപ്പിക്കാൻ കൂടി അറിയില്ല. ""

നുരഞ്ഞു വന്ന ദേഷ്യം പല്ലുകൾ കടിച്ചമർത്തി മാധു നിയന്ത്രിച്ചു.

""അന്നാണ് ചേട്ടായി ആദ്യമായി നിന്നെ കാണുന്നത്.

അപ്പത്തന്നെ നിന്നോട് സ്പാർക്ക് അടിച്ചു.

അന്ന് വീട്ടിൽ വന്ന് പറയുകയും ചെയ്തു ഉശിരുള്ള ചട്ടമ്പി പെണ്ണിനെ കുറിച്ച്. ""

മാധുവിന്റെ കവിളിലേക്ക് അസ്തമയസൂര്യന്റെ ചുവപ്പ് രാശി പടർന്നിറങ്ങി.

"പിന്നെ നീ അന്ന് സ്കൂൾ യൂണിഫോമിൽ ആയതുകൊണ്ട് സ്കൂൾ ഒക്കെ ആൾക്ക് മനസ്സിലായി. അന്നുതൊട്ട് നിന്റെ നിഴലായി കൂടെ ഉണ്ടായിരുന്നു.

എന്നെ നിർബന്ധപൂർവ്വം ഈ കോളേജിൽ ചേർത്തതും,... നീയുമായി കമ്പനി ആകാനുള്ള വഴിയൊരുക്കിയതും ഒക്കെ ചേട്ടായിടെ കൊനഷ്ട് ഫുത്തിയാ. ""

""ഓഹോ അപ്പൊ കള്ള കാമുകൻ ഒളിപ്പോര് നടത്തുവായിരുന്നല്ലേ..... ""

പറഞ്ഞുകൊണ്ടിരുന്നപ്പോൾ തന്നെ അവളുടെ താന്തോന്നി ബുള്ളറ്റ് അത് വഴി പാസ് ചെയ്തു പോയി. ഒരു കള്ളച്ചിരിയോടെ മാധുവിനെ നോക്കാനും മറന്നില്ല.

""നൂറു ആയുസ്സാണല്ലോടി നിന്റെ ചേട്ടായി താന്തോന്നിക്ക് ""

ദേവുവിൽ നിന്ന് പൊട്ടിച്ചിരിയാണ് ഉണ്ടായത്.

"" ചേട്ടായി നമ്മളെന്നും പോകുമ്പോൾ ഇതുവഴി പാസ് ചെയ്യാറുണ്ട്. നീ ഇതുവരെ കണ്ടില്ലായിരുന്നു എന്ന് മാത്രം......

""അപ്പോ ചേട്ടനും അനിയത്തിയും കൂടി സഖ്യം ചേർന്നുള്ള പരിപാടി ആയിരുന്നല്ലേ.? ""

മാധു പിരികം വളച്ചൊടിച്ചു.

""അതേല്ലോ.....""

ലാഘവത്തോടെ ഉള്ള ദേവുവിന്റെ ഉത്തരത്തിൽ ചുണ്ട് കൂർപ്പിച്ചു മാധു.

""ആ പിന്നെ... മറ്റന്നാൾ എക്സാം അല്ലേ? നീ വീട്ടിലേക്ക് വാ.

അവിടെ ഇരുന്നു പഠിക്കാം. ""

ഉത്തരം ഒന്നും കിട്ടാഞ്ഞത് കൊണ്ട് ദേവു തിരിഞ്ഞു നോക്കി.

സംശയ ദൃഷ്ടിയോടെ നോക്കുന്ന മധുവിനെ കണ്ടപ്പോൾ അവൾക്ക് കാര്യം മനസ്സിലായി.

"" നോക്കണ്ട ഉണ്ണി...

ഇത് സഖ്യം ചേർന്നുള്ള പരിപാടിയൊന്നുമില്ല. ഞാനല്ലേ എപ്പോഴും അങ്ങോട്ടേക്ക് വരാറ്. ഇത്തവണ നീ അങ്ങോട്ട് വാ. പിന്നെ നാളെ നിനക്ക് ഇഷ്ടമുള്ള പാലട ഉണ്ടാക്കുന്നുണ്ട്. അതുകൊണ്ട് കൂടി വിളിച്ചതാ..... ""

അതും പറഞ്ഞു ദേവു കള്ള പരിഭവം വച്ച് നിറച്ചു നടക്കാൻ ആഞ്ഞതും തുള്ളിച്ചാടി വന്നു മാധു അവളെ കെട്ടിപ്പിടിച്ചിരുന്നു.

*********

""മാധു മോള് എത്തിയോ...?

അമ്മ ദേ ശാരദച്ചിയുടെ വീട് വരെ പോകുവാ. മോള് അകത്തേക്ക് ചെല്ല്. അവളവിടെയുണ്ട്. ""

തലയാട്ടി ഉമ്മറത്തേക്ക് കയറി. ചാരിയ വാതിൽ തുറന്ന് അകത്തേക്ക് നോക്കി. സ്റ്റെപ്പ് കയറി മുകളിലേക്ക് പോകാൻ തുനിഞ്ഞതും തൊട്ടടുത്ത റൂമിലേക്ക് എത്തപ്പെട്ട് കഴിഞ്ഞിരുന്നു.

പെട്ടന്ന് ആയത് കൊണ്ട് തന്നെ അവളൊന്നു ഞെട്ടി. ചുവരിലേക്ക് ചാരിനിന്ന് ഇടുപ്പിലൂടെ കൈയിട്ട് വലിച്ചടുപ്പിച്ചപ്പോ പരമാവധി കുതറി മാറാൻ ശ്രമിച്ചു മാധു.

"" എന്താടി ചട്ടമ്പി കിടന്നു തുള്ളുന്നേ.. ""

ഒന്നും പറയാതെ വീണ്ടും അവൾ അവന്റെ കൈകളെ അയക്കാൻ ശ്രമിച്ചുകൊണ്ടിരുന്നു.

"" അടങ്ങി നിൽക്ക് പെണ്ണെ... എങ്ങോട്ടാ ഈ ഓടാൻ നോക്കണേ.... ദേവൂട്ടി കുളിക്ക.... ""

""അയിനു... ""

ഇത്തവണ ഞെട്ടിയത് അവനായിരുന്നു. ആരും ഇല്ലാത്ത നേരത്ത് ഇങ്ങനെ ഒറ്റക്ക് നിന്നിട്ടും അവളുടെ പതറാത്ത സ്വരത്തിലുള്ള ചോദ്യം കേട്ടപ്പോ ആ ചട്ടമ്പിയോടുള്ള അവന്റെ ഇഷ്ടം കൂടി.

""നിനക്ക് പേടി ഇല്ലേ ""

അവളുടെ കണ്ണുകളിലേക്കു തന്നെ നോക്കി ഇടുപ്പിലെ പിടി ഒന്നുകൂടി മുറുക്കിയവൻ.

""എന്തിന്?.

ഇയാൾക്കു എന്നോട് പ്രേമമല്ലേ...

പിന്നെ ദേവനച്ചന്റേം അതിഥി അമ്മേടേം മോൻ അല്ലേ അപ്പൊ ഇങ്ങേരെക്കുറിച്ചെനിക്ക് ഏകദേശ ധാരണ ഉണ്ട്. ""

യാതൊരു കൂസലും കൂടാതെ അവന്റെ കട്ട മീശ പിരിച്ചു വച്ചു മാധു.

""എനിക്ക് നിന്നെ ഒരുപാട് ഇഷ്ട മാധു..

ഐ ലവ് യൂ മൈ ചട്ടമ്പി.... ❤️""

അവളുടെ കാതോരം ചെന്ന് അവന്റെ നിശ്വാസം തട്ടിയതും പ്രണയത്താലാ പെണ്ണ് പൂത്തുലഞ്ഞിരുന്നു.

""ദേ ദേവു... ""

വാതിൽ പടിയിലേക് നോക്കി അവൾ വിളിച്ചു പറഞ്ഞതും അവൻ ഒരു ഞെട്ടലോടെ കൈകൾ പിൻവലിച്ചു.

കിട്ടിയ ഗ്യാപ്പിൽ അവനെ തള്ളിമാറ്റി ഓടി അവൾ....