വായിനോട്ടം  ഒരു കലയാണോ... 
 
 
               " എന്റെ പൊന്ന് സുമി നീ അവിടെങ്ങാനും പോയി ഇരിക്ക് പെണ്ണെ... എന്റെ പിന്നാലെ ഇങ്ങനെ ഒട്ടിനടക്കണ്ട.
കാണാൻ കൊള്ളാവുന്ന പെണ്കുട്ടിയോൾ വരുന്ന കല്യാണ വീടാണ്, കല്യാണം കഴിഞ്ഞതാണെന്നറിഞ്ഞാൽ ഡിമാൻഡ് പോകും പെണ്ണെ. " 
 
   തന്നോട് ചേർന്ന് നിൽക്കുന്ന ഭാര്യയെ ഉമ്മന്റടുത്തേക്ക് ചേർത്തു നിർത്തിക്കൊണ്ട് നിഷാദ് പറഞ്ഞു.  
 
     ഭർത്താവിനെ അടിമുടി ഒന്ന് ഉഴിഞ്ഞു നോക്കിക്കൊണ്ടവൾ നിന്ന്.  
 
    " ഇങ്ങളെ വായിനോക്കാനും മാത്രം ഗതികെട്ട കുട്ടികൾ ഉണ്ടെങ്കിൽ അങ്ങനെ നടക്കട്ടപ്പോ  ഞാൻ എടങ്ങേറ് ഉണ്ടാക്കുന്നില്ലേ.... പിന്നെ ആ നിക്കണ താടിക്കാരൻ കൊള്ളാലെ. നല്ല മൊഞ്ചൻ. അപ്പൊ ശരി ഇങ്ങടെ പണി നടക്കട്ടെ ഞാൻ അവിടുണ്ടാകും, ഇവിടെ നിന്ന് നോക്കിയിട്ട് ആ ചെക്കനെ ശരിക്ക് കാണുന്നില്ല." 
 
    നിഷാദിനെയും താടിക്കാരനെയും നോക്കി സുമി ഉമ്മാടെ പിന്നാലെ പോയി.  
 
   ചെറുത് കൊടുത്ത് വലുത് മേടിച്ച പോലെ അവളു പോകുന്നതും നോക്കി  അവൻ അങ്ങനെ നിന്ന്. 
 
     അപ്പോഴേക്കും അവന്റെ കൂട്ടുകാർ ചുറ്റും കൂടി വർത്താനം തുടങ്ങിയിരുന്നു. വായിനോട്ടം തന്നെ ആണ് ചർച്ച വിഷയം പെൺകുട്ടികളെ നോക്കി കല്യാണം കഴിഞ്ഞതാണോ? കുട്ടികൾ ഉണ്ടോ? ഇനി അഥവാ കല്യാണം കഴിഞ്ഞില്ലെങ്കിൽ എന്തിന് പഠിക്കുന്നു? എവിടെ പഠിക്കുന്നു? അങ്ങനെ കാര്യമായ തർക്കത്തിലാണ് സുഹൃത്തുക്കൾ. 
 
     നിഷാദിന്റെ കണ്ണുകൾ ഇടക്ക് ഇടക്ക് സുമിയെ തേടി. അതുകൊണ്ട് കൂട്ടുകാരുടെ ഗഹനമായ ചർച്ചയിൽ ഒന്നും തന്നെ നിഷാദിന്റെ ചിന്ത എത്തിയില്ല. 
 
   " ടാ നിശു നിന്റെ അണ്ണാക്കിൽ എന്താണ്ടാ കോഴിക്കോട്ട ആണോ, അനക്കം ഒന്നും കേൾക്കുന്നില്ല. "  നിഷാദിന്റെ ചുമലിൽ തട്ടി അവന്റെ സുഹൃത്തു ചോദിച്ചു. 
 
   " ഹ.. ഹേ.. എന്താ നീ പറഞ്ഞത്. " നിഷാദ് തപ്പി തടഞ്ഞു മറുപടി പറഞ്ഞു. 
 
   " കുന്തം. അളിയാ നിന്റെ ഏത് ഞെട്ട് ആടാ സുമി അടിച്ചിളക്കിയത്. " കൂട്ടുകാർ അവനെ കളിയാക്കി.  
 
        സുമി എന്ന് കേട്ടതും അവൻ ഞെട്ടി അവൾ നിന്നിടത്തേക്ക് നോക്കി. എന്നാൽ അവിടെ അവളെ കണ്ടില്ല. അവൾ ചൂണ്ടി കാണിച്ച താടിക്കാരനെ നോക്കിയപ്പോൾ അവൻ അവിടെ നിന്ന് ആരെയോ കാര്യമായി വീക്ഷിക്കുന്നു. താടിക്കാരന്റെ  കണ്ണുകൾക്ക് പിന്നാലെ നിശുവിന്റെ കണ്ണുകളും ചലിച്ചു. ആഹാ അതാ പന്തലിൽ ഒരു സുമി.  
 
      'ഈ പൊങ്ങൻ എന്തിനാ ഓളെ നോക്കണേ. അവളെ കണ്ടാൽ അറിഞ്ഞൂടെ നിക്കാഹ് കഴിഞ്ഞത് ആണെന്ന്. ഇവൻ എങ്ങോട്ട ഈ പോണത്. എന്റെ പടച്ചോനെ എന്റെ പെണ്ണിന്റടുത്തേക്ക് അല്ലെ ' നിശു മൈൻഡ് വോയ്‌സിൽ തന്നോട് തന്നെ സംസാരിക്കുവാണ്. 
 
      പെട്ടന്ന് അവന്റെ കൂട്ടുകാരൻ തട്ടിവിളിച്ചു ഒരു കുട്ടിയെ കാണിച്ചു.  
 
   " നല്ല മൊഞ്ചത്തി ആണല്ലേ... ഈ നാട്ടുകാരി അല്ലെന്ന് തോന്നുന്നു. അല്ലെ നിശു. "  
 
   " നിനക്കൊന്നും ലേശം ഉളുപ്പില്ലേടാ, പോയി നിങ്ങടെ പെണ്ണുങ്ങളെ വായിനോക്കെടാ കോപ്പേ. " ഇത്രയും പറഞ്ഞു നിശു ചാടി തുള്ളി സുമിയ്ക്ക് അരികിലേക്ക് പാഞ്ഞു.  
 
    " ടാ അവൻ എന്താ ഇപ്പോ പറഞ്ഞിട്ട് പോയത്." 
 
    " അവന്റെ തലക്കിട്ടു സുമി ഒലക്കക്ക് അടിച്ചെന്ന് തോന്നുന്നു. പാവം എങ്ങനെ വായിനോക്കി നടന്നിരുന്നതാ. "  
 
   " അതന്നെ. നിങ്ങൾ അതുവിട് അവിടെ നോക്ക് കല്യാണപ്പെണ്ണിന്റെ കൂട്ടുകാരികൾ." 
 
 
        കൂട്ടുകാരുടെ ചർച്ചകൾ അങ്ങനെ നീണ്ടുപോകുമ്പോൾ നിഷാദ് സുമിക്ക് അരികിൽ എത്തി. 
 
       ******************************* 
 
      തനിക്ക് മുന്നിൽ ആരോ വന്നു നിൽക്കുന്നത് പോലെ തോന്നിയതും സുമി ഫോണിൽ നിന്ന് മുഖം ഉയർത്തി നോക്കി.  
ആഹാ പണി പാണ്ടിലോറി വിളിച്ചാണല്ലോ വരവ്.  
 
    മുന്നിൽ നിൽക്കുന്ന താടിക്കാരനെ നോക്കി സുമി ചുറ്റും വീക്ഷിച്ചു.  
 
   ' പൊളി... തേടിയവള്ളി  ദേ പാഞ്ഞു വരുന്നു. തനിക്കു അരികിലേക്ക് വേഗത്തിൽ നടന്നു വരുന്ന നിഷാദിനെ കണ്ടു സുമി മനസ്സിൽ ഓർത്തു. ' 
 
    " താൻ കല്യാണപെണ്ണിന്റെ കൂട്ടുകാരി ആണോ. ഞാൻ കണ്ടിരുന്നു അവിടെ നിന്ന് താൻ എന്നെ തിരിഞ്ഞു നോക്കി പോകുന്നത്. "  താടിക്കാരൻ ചൂണ്ട എറിഞ്ഞു. 
 
  ' ഭലേ ഭേഷ്...  ഇക്കയെ പിരാന്താക്കാൻ നോക്കിയത് കോഴികുഞ്ഞിന് തീറ്റ കൊടുത്ത അവസ്ഥ ആകിയല്ലോ പടച്ചോനെ. '  
 
   " താൻ എന്താ മിണ്ടാത്തത്. ഞാൻ കണ്ടിരുന്നു നീ നോക്കുന്നത്. കല്യാണപെണ്ണിന്റെ കൂടെ പഠിക്കുന്ന കുട്ടിയാണോ? "  താടിക്കാരൻ വിടാൻ ഉദ്ദേശം ഇല്ല. 
 
   " അല്ല...  കല്യാണപെണ്ണിന്റെ അമ്മായി ആണ്. ഒന്ന് പോയെടാ. നീ അവിടെ ആരെ നോക്കി നിൽക്കുവാ ഇങ്ങു വാ. " നിഷാദ് മറുപടിയും കൊടുത്ത് സുമിയെയും കൂട്ടി അവിടെന്നു നടന്നു. 
 
 
     " ഇനി നീ എന്റെ അടുത്ത് നിന്ന് മാറിയാൽ നിന്റെ കാലടിച്ചൊടിക്കും. "  അവൻ കലിപ്പ് മൂടിലെക്ക് വന്നു.  
 
   " അല്ല ഇക്ക ഞാൻ അടുത്ത് നിന്നാൽ ഇങ്ങളെ ഒരു പെണ്ണും നോക്കൂലാന്നെ. ഞാൻ ഉമ്മാന്റെ കൂടെ നിന്നോളാം. "  
 
   " വേണ്ട... അന്നേ കെട്ടിയത് ഞാൻ അല്ലെ എന്റെ അടുക്കൽ നിന്നാൽ മതി. " 
 
 
      " ഞാൻ അടുത്ത് നിന്നാൽ ഇങ്ങടെ കല്യാണം കഴിഞ്ഞത് ആണെന്ന് പെണ്കുട്ടികൾ അറിയില്ലേ. " സുറുമി ചൊറിയാൻ തുടങ്ങി.  
 
   " ഞാൻ നിന്നെ ആരും അറിയാതെ ഒളിച്ചു കെട്ടിയത് ഒന്നും അല്ലല്ലോ മറച്ചു വെക്കാൻ." 
 
    " അല്ല കെട്ടിയ ചെക്കന്മാരെ പെണ്കുട്ടിയോൾ നോക്കില്ലെന്നല്ലേ ഇക്ക പറഞ്ഞത്. " എഗൈൻ സുമി  
 
   " എന്നെ ഇപ്പം ആരും നോക്കണ്ട. " 
 
   " അല്ല ഇക്കാക്ക് ആരേം നോക്കണ്ടേ. " 
 
    " അതിന്റെ ആവിശ്യം ഒന്നും ഇല്ലല്ലോ, എനിക്ക് മൊഞ്ചത്തി ഭാര്യ ഇല്ലേ. " നിഷാദ് സോപ്പ് തേക്കാൻ തുടങ്ങി.  
 
     " എന്നാലും ആ റെഡ് ചുരിദാർ ഇട്ട കുട്ടി കൊള്ളാം. അല്ലേൽ വേണ്ട ആ മഞ്ഞ സാരി നോക്കിക്കേ. പിന്നെ പച്ച ടോപ് ഇട്ട കുട്ടിയും സൂപ്പർ ആണ്.  നോക്ക് ഇക്ക....  "  
 
  " എന്റെ പെണ്ണെ ഞാൻ സുല്ലിട്ടു. ഇജ്ജ് അതുവിട്ടേക്ക് ഞാൻ ആരെയും നോക്കുന്നില്ല ആരും എന്നെയും നോക്കണ്ട. "    
 
   " ആഹാ ഇപ്പോൾ അങ്ങനെ ആയോ. വായിനോട്ടം ഒരു കലയാണെന്നും ആ കല ആസ്വദിക്കുന്ന കലാകാരൻ ആണ് ഇക്കയെന്നും എന്നോട് ഒരിക്കൽ പറഞ്ഞതോ?  ഇപ്പൊ ആ കല വെറുത്തോ. "  
 
   " വായിനോക്കുന്നവർക്ക് അതൊരു ഹരം ആണ് എന്നാൽ ആ വായിനോക്കപ്പെടുന്നവർക്കും അവരുടെ വേണ്ടപെട്ടവർക്കും അത്ര നല്ല ഹരം അല്ല."  
 
     " ഹ.... ഹ... ഹ.... " സുമി പൊട്ടിച്ചിരിച്ചു.  
 
      " കുശുമ്പ് ഉണ്ടല്ലേ... ആ താടികാരൻ  എന്നെ നോക്കിയത് പിടിച്ചില്ലല്ലേ. എന്നാലും കാലാകാരനെ തളർത്താൻ പാടില്ലായിരുന്നു."  
 
    " ഏതു കലാകാരൻ.... അവളുടെ ഒരു കലാകാരൻ കുറച്ചു നേരം കൂടി ആ തെണ്ടി നിന്റെ ചോരഊറ്റാൻ  നോക്കിയിരുന്നെങ്കിൽ ഞാൻ ഒരു കൊലാകാരൻ ആയേനെ. " 
 
   " അപ്പൊ പറ വായിനോട്ടം ഒരു കല ആണോ? "  സുമി ചോദിച്ചു. 
 
   " ആണോ?  അല്ലല്ലേ....  വാ നമുക്ക് ഭക്ഷണം കഴിച്ചു വീട്ടിൽ പോകാം. "
 
      
         ==============================
 
   കുറച്ചു മുന്നേ  ഉള്ള ഒരു  എഴുത്ത് ആണ്...  പഴയ sharechat അക്കൗണ്ടിൽ post ചെയ്തിരുന്നു... ആ അക്കൗണ്ടും പോസ്റ്റുകളും miss ആയതു കൊണ്ട് repost ചെയ്യുന്നതാണ്. വായിച്ചു നോക്കി അഭിപ്രായം പറയണേ...