എടി മറിയാമ്മോ....... ഒന്നവിടെ നിക്കടി.....

ഇച്ചായൻ ഒന്ന് പറയട്ടെ......

 

എടൊ ദാവീദേ ... തന്നോട് ഞാൻ പല തവണ പറഞ്ഞിട്ടുണ്ട്......എന്നെ അങ്ങനെ വിളിക്കരുതെന്ന്...... ഏതു വകയിലാടോ ഞാൻ മറിയാമ്മ ആകുന്നത്...... എന്റെ പേര് ആൻറിയ എലിസബത്ത് മാളിയേക്കൽ എന്നാണ്...... കേട്ടോടാ....അവനൊരു ഇച്ചായൻ വന്നേക്കുന്നു.....

 

ഓ എന്റെ പൊന്ന് മറിയാമ്മോ ഇത്രേം വലിയ പേര് വിളിച്ചു വരുമ്പോഴേക്കും കുരിശുപള്ളിൽ ഇക്കുറി പെരുന്നാൾ കഴിഞ്ഞു അടുത്ത പെരുന്നാളിന് കൊടിയേറും..... അതുകൊണ്ട് വിളിക്കാൻ സുഖം ഇതാണ്..... കേട്ടോടി മറിയാമ്മോ......

 

നീ ഒന്ന് പോടാ.......

 

ഹാ അങ്ങനങ്ങു പോകാതെടി മറിയാമ്മോ... ഇച്ചായന് ഒരു കാര്യം പറയാനുണ്ട്....

 

ദേ.... ദാവീദേ ..... നീ പറയാൻ പോണതെന്നതാണെന്നു എനിക്കറിയാം... നിന്നോട് ഞാൻ പലതവണ പറഞ്ഞിട്ടുണ്ട് അത് പറഞ്ഞു എന്റെ പിന്നാലെ നടക്കരുതെന്നു...... എനിക്ക് നിന്നെ ഇഷ്ടമല്ല.... അല്ലെങ്കിലും മാളിയേക്കലെ എബ്രഹാം മാത്തന്റെ മകളെ ഇഷ്ടപ്പെടാൻ മാത്രം എന്ത് യോഗ്യതയാ ചിട്ടി തട്ടിപ്പ് നടത്തി തൂങ്ങി മരിച്ച ജേക്കബിന്റെയും സാറയുടെയും മകൻ കൂലിപ്പണിക്ക് നടക്കുന്ന ദാവീദിന് ഉള്ളത്......

 

മറിയാമ്മോ.... ഇങ്ങനെ ചങ്കിൽ കൊള്ളണതൊന്നും പറയാതെടി..... ഈ നാട്ടുകാര് മുഴുവൻ പറഞ്ഞാലും ദാവീദിന് പുല്ലാ.... പക്ഷെ നീ പറഞ്ഞാൽ സഹിക്കില്ലടി......നിനക്ക് പകരം മറ്റൊരാളാ ഇത് പറഞ്ഞതെങ്കിൽ ചെക്കിട് അടിച്ചു പൊളിച്ചേനെ ഈ ദാവീദ് .... ഇതിപ്പോ എന്റെ മറിയാമ്മ ആയതു കൊണ്ട് ഇത്തവണത്തേക്ക് ക്ഷമിച്ചു...... പാവങ്ങളായിരുന്നടി എന്റെ അപ്പനും അമ്മയും.... ചതിച്ചതാ...... അഭിമാനം ഉള്ളവരായിരുന്നത് കൊണ്ട് രണ്ടാളും ഒരുമിച്ചങ്ങു പോയി.... പതിനഞ്ചു വയസ്സുകാരൻ ദാവീദ് മാത്രം മിച്ചമായി.......

 

 

ദാവീദ് ..... എനിക്ക് നിന്നോട് കൂടുതലൊന്നും പറയാനില്ല..... നിന്നെ എനിക്ക് ഇഷ്ടമല്ല.... മര്യാദയ്ക്ക് നീ വഴീന്ന് മാറുന്നുണ്ടോ.....

 

ഇപ്പൊ ഞാൻ മാറാം... പക്ഷെ നിന്നെ ഞാൻ സ്വന്തമാക്കുമെടി മറിയാമ്മോ....

 

 

ഉവ്വ്..... നടന്നത് തന്നെ.......

 

 

അവള് പോകുന്നതും നോക്കി നിന്ന ദാവീദിന്റെ മനസ്സിൽ തന്റെ കുട്ടി കാലം കടന്നു വന്നു.....

 

കുരിശുവീട്ടിൽ ജേക്കബിന്റെയും സാറയുടെയും ഒരേ ഒരു മകനായിരുന്നു ദാവീദ് ജേക്കബ്....... ദാവീദിന്റെ അപ്പനും അമ്മയും അത്യാവശ്യം കൂലിപ്പണിയും കൃഷിയും ചിട്ടി പിരിവും ഒക്കെ നടത്തിയിരുന്നു....... ദാവീദ്  മൂന്നിൽ പഠിക്കുന്ന സമയത്താണ് മാളിയേക്കൽ എബ്രഹാമിന്റെ മകൾ ആൻറിയ ദാവീദിന്റെ സ്കൂളിൽ ചേരുന്നത്..... ആൻറിയയുടെ ചേട്ടൻ ജോയും അതെ സ്കൂളിൽ തന്നെയാണ് പഠിച്ചിരുന്നത്..... ആ ദിവസങ്ങളിൽ എപ്പോഴോ അവന്റെ കുഞ്ഞ് മനസ്സിൽ വേരുറച്ചു പോയതാണ് ആൻറിയ എലിസബത്ത് എന്ന അവന്റെ മാത്രം മറിയാമ്മ...... എന്നാൽ കൂലിപ്പണിക്കാരുടെ മകനായ തന്റെ പ്രണയം പോയിട്ട് സൗഹൃദം പോലും അവൾ ഇഷ്ടപ്പെട്ടിരുന്നില്ല...... എങ്കിലും ആ കൊച്ചു മനസ്സിൽ അവൾ നിറഞ്ഞു നിന്നിരുന്നു.....

താൻ വളരുന്നതോടൊപ്പം തന്റെ ഉള്ളിലെ പ്രണയവും വളർന്നു.....

അങ്ങനെ sslc പരീക്ഷ ഒക്കെ കഴിഞ്ഞിരിക്കുന്ന സമയമാണ് അപ്പനും അമ്മയും ചിട്ടി പിരിവു നടത്തിയിരുന്ന കമ്പനി പൊട്ടുന്നതും ആ കുറ്റം അവരുടെ തലയിലാകുന്നതും.....

അന്യന്റെ ഒരു രൂപ പോലും ആഗ്രഹിക്കരുതെന്നു എന്നെ പഠിപ്പിച്ചവരാണെന്റെ അപ്പനും അമ്മയും...... അതുകൊണ്ട് തന്നെ ആ അപമാനം അവർക്കു താങ്ങാൻ കഴിയുന്നതിലും അപ്പുറമായിരുന്നു........ രണ്ടാളും ഒരു കുപ്പി വിഷത്തിൽ ജീവിതം അവസാനിപ്പിച്ചു...... ഞാൻ മാത്രം ബാക്കിയായി.......

നാട്ടുകാരുടെ മുന്നിൽ തട്ടിപ്പ്കാരുടെ മകനായി.... ഒരു നേരത്തെ ഭക്ഷണം പോലും ആരും തന്നില്ല..... പിന്നെ.... പുതിയ വിഷയങ്ങൾ കിട്ടിയപ്പോ നാട്ടുകാര് അത് മറന്നു......

അതോടെ പഠിപ്പല്ലാം അവസാനിച്ചു...... വയറു നിറയ്ക്കാൻ പറ്റാവുന്ന പണിയൊക്കെ ചെയ്തു തുടങ്ങി...... ഇപ്പൊ വർഷം പത്തു കഴിയുന്നു.... ഇന്ന് തനിക്കു വശമില്ലാത്തതായ ഒരു പണിയും ഇല്ല.... കൂലിപ്പണി തൊട്ടു കൊട്ടെഷൻ പണിക്കു വരെ പോകാറുണ്ട്.....

 

പള്ളിമുറ്റത്തു നിന്നും പോകുന്ന ആൻറിയയുടെ 

കാറിന്റെ ശബ്ദമാണ് ദാവീദിനെ ഓർമ്മകളിൽ നിന്ന് ഉണർത്തിയത്.....

 

എന്ത് കണ്ടിട്ടാണെടി മറിയാമ്മോ ഞാൻ നിന്നെ സ്നേഹിക്കുന്നത്..... അറിയില്ല.... പക്ഷെ ഒന്ന് അറിയാം അത് ഒരിക്കലും നിന്റെ പണമോ സൗന്ദര്യമോ കണ്ടിട്ടല്ല.......

സ്നേഹത്തോടെ ഒരു നോട്ടമോ ഒരു ചിരിയോ ഇന്നേ വരെ നിന്നിൽ നിന്നും എന്റെ നേർക്കു ഉണ്ടായിട്ടില്ല..... എന്റെ നേർക്കെന്നല്ല... ആരുടെ നേരയും അത് ഉണ്ടായിട്ടില്ല....... മാളിയക്കലെ കൊച്ചെന്ന അഹങ്കാരം മാത്രമാണ് നിന്നിൽ ഞാൻ കണ്ടിട്ടുള്ളത്..... എന്നിട്ടും എന്റെ ഉള്ളിൽ അന്നും ഇന്നും  "നീ മാത്രം "  ആണല്ലോടി മറിയാമ്മേ.......

 

 

🍂🍂🍂🍂🍂🍂🍂🍂🍂🍂🍂🍂🍂🍂🍂🍂🍂

 

 

അന്ന മോളെ....... അന്ന മോളെ......

 

എന്നാ അപ്പച്ചാ.....

 

അപ്പച്ചന് മോളോട് ഒരു  കാര്യം പറയാനുണ്ടായിരുന്നു....

 

എന്നതാ അപ്പച്ചാ....

 

അത് മോൾക്കൊരു കല്യാണ ആലോചന വന്നിട്ടുണ്ടായിരുന്നു..... ചെക്കൻ ഡോക്റ്ററാണ്.... കൂടാതെ വലിയ തറവാട്ടുകാരും..... മോൾക്ക്‌ എതിർപ്പൊന്നും ഇല്ലല്ലോ....

 

 

ഇല്ല അപ്പച്ചാ.....

 

 

നാട്ടിലെ പ്രമാണിയായ മാളിയക്കലെ എബ്രഹാം മാത്തന്റെ മകളുടെ കല്യാണ കാര്യം നാട്ടുകാരോടൊപ്പമാണ് ദാവീതും അറിയുന്നത്......

 

 

മറിയാമ്മോ........ എനിക്ക് നിന്നോട് അൽപ്പം സംസാരിക്കാനുണ്ട്......

 

പള്ളിയിൽ നിന്നിറങ്ങുന്ന അൻറിയയെ കാത്ത് നിൽക്കുകയായിരുന്നു ദാവീദ്.....

 

 

ദാവീദേ നീ വഴിയിൽ നിന്ന് മാറുന്നുണ്ടോ... എനിക്ക് നിന്നോട് സംസാരിക്കാൻ താല്പര്യമില്ല.....

 

മറിയാമ്മോ... ഞാൻ കേട്ടത് സത്യമാണോ.... നിന്റെ കെട്ടുറപ്പിച്ചോ.....

ചോദിക്കുമ്പോൾ അവന്റെ ഹൃദയം പതിവിലും വേഗതയിൽ മിടിക്കുന്നുണ്ടായിരുന്നു......

 

പിന്നെ ചുമ്മാ പറഞ്ഞു നടക്കാൻ നാട്ടുകാർക്ക്‌ വട്ടുണ്ടോ ദാവീദേ......

നീ കേട്ടത് അത്രയും സത്യമാണ്.......എന്റെ കെട്ടുറപ്പിച്ചു.... ചെക്കൻ ഡോക്ടറാണ്..... പോരാത്തതിന് കാഞ്ഞിരപ്പിള്ളിയിലെ പേരുകേട്ട തറവാട്ടുകാരനും.....

 

മറിയാമ്മോ...... അപ്പോ നിന്റെ ഉള്ളിൽ എന്നോട് ഒരിഷ്ടവുമില്ലേ......

 

 

ഞാൻ നിന്നോട് പലതവണ പറഞ്ഞതല്ലേ ദാവീദേ എനിക്ക് നിന്നെ ഇഷ്ടമല്ലായെന്നു....... നിന്റെ ആ ചോർന്നോലിക്കുന്ന  കൂരേല് നീ തരുന്ന പഴങ്കഞ്ഞീം കുടിച്ചു കിടക്കാൻ ഈ ആൻറിയ തയാറാകുമെന്ന് കരുതിയോ ......കഷ്ടമുണ്ട് ദാവീദേ...... നീ ഇത്രേം മണ്ടനായി പോയല്ലോ.....

 

ശരിയാ മറിയാമ്മോ നീ പറഞ്ഞത്.....മണ്ടനാ ദാവീദ്..... നിന്നെ ആഗ്രഹിക്കാനുള്ള യോഗ്യത ഒന്നും ഇല്ലായെന്നറിയാമായിരുന്നിട്ടും ആഗ്രഹിച്ചു.... മനസ്സിൽ കൊണ്ട് നടന്നു...... നീ പറഞ്ഞ പോലെ, ചോർന്നോലിക്കുന്ന എന്റെ കൂരേല് ഞാൻ അണിയിച്ച മിന്നും കഴുത്തിലിട്ടു എന്റെ നെഞ്ചോടു ചേർന്നു നീ കിടക്കണത് വെറുതെ സ്വപ്നം കണ്ടു.....

 

ദേ ദാവീദേ.... ഇനി ഇതിന്റെ പേരിൽ എന്തേലും പ്രശ്നമുണ്ടാക്കാനാണ് ഭാവം എങ്കിൽ അറിയാലോ എന്റെ അപ്പനേം ഇച്ചായനേം..... വച്ചേക്കില്ല അവര് നിന്നെ.......

 

അങ്ങനാണോടി മറിയാമ്മേ നീ എന്നെ മനസിലാക്കി ഇരിക്കുന്നത്.... നിന്റെ മനസ്സിൽ ഞാൻ ഇല്ലാത്ത സ്ഥിതിക്കു ഇനി ഞാൻ എന്നാത്തിനാടി പ്രശ്നമുണ്ടാക്കുന്നത്....... അങ്ങനെ സ്നേഹം പിടിച്ചു പറിക്കാൻ മാത്രം ചെറ്റ അല്ലടി ദാവീദ്......നിന്റെ കഴുത്തിൽ മറ്റൊരാള് മിന്നു കെട്ടുന്നത് എനിക്ക് സഹിക്കാൻ കഴിയില്ലെടി മറിയാമ്മോ..... എന്നാലും നിന്റെ സന്തോഷം അതാണേൽ, എന്റെ സങ്കടം എനിക്ക് വിഷയമില്ല...... എവിടാണേലും നീ സന്തോഷായിട്ടിരുന്നാൽ മതി...... അപ്പൊ പോട്ടെടി മറിയാമ്മോ.... അല്ല, ആൻറിയ എലിസബത്ത് മാളിയേക്കൽ.... അങ്ങനെ വിളിക്കുന്നതല്ലയോ നിനക്ക് ഇഷ്ടം.... ഇത്രയും നാൾ മറിയാമ്മോ എന്ന് വിളിച്ചിരുന്നത് എന്നെങ്കിലും നീ എന്റേതാകുമെന്ന് കരുതിയ.....പക്ഷെ ഇനി അങ്ങനെ വിളിക്കാൻ അവകാശമില്ലല്ലോ..... ഇപ്പൊ നീ മറ്റൊരുത്തന്റെ മണവാട്ടിയാകാൻ പോകുവല്ലേ.........എന്നാലും എന്റെ ഉള്ളിൽ നീ മാത്രമേ കാണു....... ഈ ഉയിര് കർത്താവ് തിരിച്ചെടുക്കുന്നോടം വരെ.....

 

 

അത്രയും പറഞ്ഞു നടന്നു നീങ്ങുന്ന ദാവീദിനെ 

കാണുമ്പോൾ ആൻറിയയുടെ ചുണ്ടിൽ പുച്ഛം കലർന്ന ഒരു ചിരി വിടർന്നു......

 

അന്ന് ആൻറിയയും ദാവീദുo തമ്മിൽ കണ്ടു രണ്ടാഴ്ച തികയുന്നതിനു മുൻപ് ആൻറിയ Dr. സണ്ണി ജോർജിന്റെ ഭാര്യയായി.....

 

എങ്കിലും ദാവീദിന്  തന്റെ മറിയാമ്മയെ മറക്കുവാൻ സാധിച്ചില്ല....മറ്റൊരുത്തന്റെ ഭാര്യയെ മനസ്സിൽ കൊണ്ട് നടക്കുന്നത് തെറ്റാണെന്നറിഞ്ഞിട്ടും എന്ത്  കൊണ്ടോ അവളെ മറക്കുവാൻ കഴിഞ്ഞില്ല......

 

🍂🍂🍂🍂🍂🍂🍂🍂🍂🍂🍂🍂🍂🍂

 

നിങ്ങളറിഞ്ഞോ.... നമ്മുടെ മാളിയേക്കലെ കാര്യങ്ങളൊക്കെ......

 

പണികഴിഞ്ഞു കവലയിലെ ചായ കടയിലിരുക്കുമ്പോഴാണ് മാളിയേക്കലെ പുറം പണിക്കാരൻ കുമാരേട്ടന്റെ വാക്കുകൾ ദാവീതിലേക്കു എത്തിയത്....

 

എന്ത് കാര്യങ്ങൾ....

കൂട്ടത്തിൽ ആരോ ചോദിച്ചു.....

 

 

ആ എബ്രഹാം സർന്റെ മകളില്ലേ... ആ കൊച്ചു ബന്ധം പിരിഞ്ഞു വീട്ടിൽ വന്നു നിൽക്കുന്നുണ്ട്.....

 

ആ വാക്കുകൾ ഒരു ഇടി മിന്നൽ പോലെയാണ് ദാവീദിന്റെ കാതുകളിൽ പതിഞ്ഞത്...

 

ബന്ധം പിരിഞ്ഞന്നോ.... അതിന്റെ കല്യാണം കഴിഞ്ഞിട്ട് കഷ്ടിച്ച് ഒരു വർഷം തികയുന്നതല്ലേ ഉള്ളു....

 

അതൊക്കെ നേരാ..... ആ കൊച്ചിന് പ്രസവിക്കാൻ കഴിയൂല്ലന്ന്.... പുതു മോഡി തീർന്നപ്പോൾ തൊട്ടു ആ ചെക്കന്റെ വീട്ടിൽ മുറുമുറുപ്പ് തുടങ്ങിയത്രേ... പിന്നെ ആ കൊച്ചിന്റെ സ്വഭാവത്തിന്റെ കാര്യം പ്രേത്യേകിച്ചു പറയേണ്ടതില്ലല്ലോ....... അഹങ്കാരത്തിനു കയ്യും കാലും വച്ച മുതല.... പക്ഷെ അതൊന്നും ആ ഡോക്ടർ ചെക്കന്റെ അടുത്ത് ചിലവായില്ല..... ദേഹോപദ്രവവും ഉണ്ടാരുന്നെന്ന കേട്ടത്.... ഒടുക്കം കൊച്ചുങ്ങൾ ഉണ്ടാകില്ലായെന്നറിഞ്ഞപ്പോ അവര് അവിടെന്നു ഇറക്കി വിട്ടു... ഇപ്പൊ മാളിയെക്കലുണ്ട്......

 

ദാവീതിനെന്തോ പിന്നെ അവിടെ ഇരിക്കാൻ തോന്നിയില്ല..... തന്റെ പ്രണയം തട്ടിത്തെറിപ്പിച്ചു പോയതാണെങ്കിലും.. നല്ലത് മാത്രം വരണമെന്നേ ആഗ്രഹിച്ചിട്ടുള്ളു.. ഒരിക്കലും ആ കണ്ണുകൾ നിറയുന്നത് കാണാൻ ആഗ്രഹിച്ചിട്ടില്ല.....ഇപ്പോഴത്തെ അവസ്ഥ അറിഞ്ഞപ്പോൾ ഉള്ളിൽ എവിടെയോ ഒരു നീറ്റൽ........

 

 

 

ഒരു വർഷം കൊണ്ട് ആൻറിയ ജീവിതത്തെ കുറിച്ച് ഏകദേശം മനസ്സിലാക്കിയുരുന്നു.... പുറമെ കാണുന്നതൊന്നുമല്ല യഥാർത്യമെന്നു തിരിച്ചറിഞ്ഞു തുടങ്ങിയിരുന്നു.....

അവിടെ നിന്നും ഇറങ്ങിയിട്ട് മാസം ഒന്ന് തികയുന്നു.....

ഇവിടെ തിരികെയെത്തി ആദ്യമൊക്കെ വലിയ കുഴപ്പങ്ങളൊന്നും ഇല്ലായിരുന്നു... പക്ഷെ ഇപ്പോ കുറച്ച് ദിവസമായി ഇച്ചായന്റെയും ചേട്ടത്തിയുടെയും സ്വഭാവത്തിൽ ഒക്കെ ആകമാനം ഒരു മാറ്റം.....

 നാട്ടുകാരുടെ മുന്നിൽ എബ്രഹാം മാളിയേക്കൽ പ്രമാണി ആണെങ്കിലും ഇപ്പോൾ വീട് ഭരിക്കുന്നത് ഇച്ചായൻ ആണ്..... ഞാനിവിടെ നിൽക്കുന്നതിൽ ഇച്ചായനും ചേട്ടത്തിക്കും താൽപര്യക്കുറവ് ഉള്ളതുപോലെ.... അപ്പനും അമ്മയ്ക്കും ഒന്നും പറയുവാനും കഴിയുന്നില്ല..... നാളെ ഇച്ചായന്റെ പരിചയത്തിലുള്ള ആരോ പെണ്ണുകാണാൻ വരുന്നുണ്ട്....... ഇപ്പോ പെട്ടെന്ന് വിവാഹം എനിക്ക് പേടിയാണ്.... എന്നാലും ഇനിയും ഇവിടെ ഇവരെ ബുദ്ധിമുട്ടിച്ചു കൂടാ.....

 

 ചെയ്തുപോയ തെറ്റുകൾ ആനിന്റെ മനസ്സിലൂടെ ഒരു നിമിഷം കടന്നുപോയി..... ദാവീദിനെ ഓർക്കേ ആദ്യമായി ആ കണ്ണുകളിൽ നിന്ന് അവനു വേണ്ടി ഒരിറ്റു കണ്ണുനീർ അടർന്നുവീണു... അവനോട് പറഞ്ഞതിന് എല്ലാം മനസ്സുകൊണ്ട് ആയിരം വട്ടം മാപ്പ് പറഞ്ഞു..... പണത്തിന്റെ അഹങ്കാരത്തിന്റെ പേരിൽ തട്ടിത്തെറിപ്പിച്ച് ജീവിതത്തോട് ആദ്യമായി ഒരു മോഹം തോന്നി.....

 

 പിറ്റേന്ന് പെണ്ണുകാണാൻ വന്ന ആളെ കണ്ടപ്പോൾ പിളർന്നു താഴേക്ക് പോയാൽ മതിയായിരുന്നു എന്ന് ആനിന് തോന്നി.... അയാൾക്ക്‌ ആനിനെ കഴിഞ്ഞും 15 വയസ്സിന് പ്രായകൂടുതൽ ഉണ്ടായിരുന്നു....

 

 

 എനിക്ക് ഈ ബന്ധത്തിന് സമ്മതമല്ല.....

 

 അതിന് നിന്റെ സമ്മതം ഇവിടെ ആരും ചോദിച്ചില്ല...... നാട്ടുകാരെക്കൊണ്ട് പറയിപ്പിച്ചു ഇനിയും ഇവിടെ നിൽക്കാൻ പറ്റില്ല.... ഇനിയും മറ്റുള്ളവരുടെ മുമ്പിൽ നാണം കെടാൻ എന്നെക്കൊണ്ട് വയ്യ... അയാൾക്ക് എന്താണ് ഒരു കുറവ്... കുറച്ച് പ്രായം കൂടുതലാണെന്ന് അല്ലേ ഉള്ളൂ.... പിന്നെ നിന്നെപ്പോലെ പ്രസവിക്കാൻ കഴിയാത്ത ഒരു പെണ്ണിനെ വേറെ ആര് ഏൽക്കും.....

 

 സ്വന്തം കൂടപ്പിറപ്പിൽ നിന്നുതന്നെ അങ്ങനെ ഒരു വാക്ക് കേൾക്കേണ്ടിവന്ന നിമിഷം ജീവിച്ചിരിക്കുന്നതിൽ പോലും അർഥമില്ലെന്ന് ആനിനു തോന്നി....

 

 ആരെന്തൊക്കെ പറഞ്ഞാലും എനിക്ക് ഇതിനു സമ്മതമല്ല.....

 

 

 നിന്റെ സമ്മതം ഇവിടെ ആർക്കും വേണ്ട കൊണ്ടുപോയി പൂട്ടിയിടു ഇവളെ..... കല്യാണത്തിന് അന്ന് തുറന്നു വിട്ടാൽ മതി.... രണ്ടു ദിവസത്തേക്ക് ഭക്ഷണം കൊടുക്കേണ്ട....

 

 മോനേ നിന്റെ അനിയത്തിയല്ലേ അവള്...

 

അപ്പനും അമ്മയും തൽക്കാലം ഇതിൽ ഇടപെടേണ്ട....

 

 

 പേരുകേട്ട പ്രമാണി എബ്രഹാം മാളിയേക്കലിനു സ്വന്തം മകളുടെ കാര്യത്തിൽ നിസ്സഹായനായി നിൽക്കേണ്ടി വന്നു....

 

 

കരഞ്ഞു കരഞ്ഞു എപ്പോഴോ ആണ് ആൻ ഉറങ്ങിയത്.... കണ്ണു തുറന്നപ്പോൾ കണ്ടത് അടുത്തിരിക്കുന്ന അമ്മച്ചിയെയാണ്...

 

 

അമ്മച്ചി...

 

എന്റെ പൊന്നുമോളെ, നീ ഇവിടുന്ന് എവിടെക്കെങ്കിലും പോയ്ക്കോ.....  ഇവിടെ നിന്ന അയാളെ കൊണ്ട് നിന്നെ കെട്ടിക്കും നിന്റെ ഇച്ചായൻ....

 

 അമ്മച്ചി ഞാൻ എവിടേക്ക് പോകാനാ....

 

 ദാ ഇത് കുറച്ചു കാശ, നീ എവിടേക്കെങ്കിലും പൊയ്ക്കോ.....

 

അമ്മച്ചി പറഞ്ഞതനുസരിച്ച് വീട്ടിൽനിന്ന് പുറത്തിറങ്ങി.... പോരുന്നതിനു മുൻപ് ഒരിക്കൽ കൂടി തിരിഞ്ഞു നോക്കി.... ഒരുപാട് അഹങ്കരിച്ചിട്ടുണ്ട് മാളിയേക്കൽ ജനിച്ചതിന്...... കൂട്ടുകൂടാൻ വന്നവരെയും ആദ്യമായി പ്രേമം പറഞ്ഞവനെയും പുച്ഛിച്ചത് മാളിയേക്കലെ പെണ്ണ് എന്നാ അഹങ്കാരo കൊണ്ടായിരുന്നു......

 

 

 എങ്ങോട്ട് പോകണം എന്നോ എന്തുചെയ്യണമെന്നോ അറിയാതെ ആകെ മരവിച്ച അവസ്ഥയിലായിരുന്നു ആൻ... എന്തെങ്കിലും കഴിച്ചിട്ട് രണ്ടുദിവസമായി...... മുന്നോട്ട് ഒരടികൂടി നടക്കാൻ കഴിയില്ല എന്ന് തോന്നിയതുകൊണ്ട് മുന്നിൽകണ്ട ഒരു വെയിറ്റിംഗ് ഷെഡ്ഡിൽ കയറിയിരുന്നു... അടുത്ത ആരോ നിൽക്കുന്നതുപോലെ തോന്നിയപ്പോഴാണ് തലയുയർത്തി നോക്കിയത്.... മുന്നിൽ നിൽക്കുന്ന ആളെ കണ്ട് ഒരു നിമിഷം തല താഴ്ന്നു പോയി......

 

 ഇത് എന്നതാ മറിയാമ്മോ.... മാളിയേക്കൽ സ്ഥലം ഇല്ലാഞ്ഞിട്ടാണോ നീ ഈ നട്ടപ്പാതിരക്ക് ഇവിടെ വന്നിരിക്കുന്നത്.....

 

എന്തു പറയണമെന്നറിയാതെ ആൻ ആകെ കുഴങ്ങി.... കാരണം മറിയാമ്മോ എന്നാ വിളി വന്നു തറച്ചത് ചങ്കിലാണ്... ഇത്രയും നാൾ ആ വിളി കേൾക്കുമ്പോൾ വെറുപ്പോടെ മുഖം തിരിചിട്ടെ ഉള്ളു എങ്കിലും ഇന്നാ വിളി കേൾക്കുമ്പോൾ ഒറ്റയ്ക്കല്ല എന്നൊരു തോന്നൽ.....

 

 പക്ഷേ പാടില്ല....  ഒരിക്കൽ താൻ കാരണം ഒത്തിരി സങ്കടപ്പെട്ടവനാണ്... തന്നെപ്പോലൊരുത്തി ഒരിക്കലും ദാവീദിനു ചേരില്ല....

 

 ആനിന്റെ ഇപ്പോഴത്തെ അവസ്ഥ അറിഞ്ഞ ദാവീദിന്, അവളുടെ ഇരിപ്പ് കണ്ടപ്പോഴേ കാര്യങ്ങൾ ഏകദേശം മനസ്സിലായി....

 

മറിയാമ്മോ വാ എഴുന്നേൽക്ക്....

 

എവിടേയ്ക്ക്....

 

 ഏതായാലും കൊല്ലാനല്ല.....

 

 ദാവീദ് അവളെയും കൂട്ടി അവന്റെ വീട്ടിലേക്കു പോയി.....

 

 ഇന്നാ മറിയാമ്മോ....ഇത് കഴിച്ചോ...

 

 ദാവീദ് നീട്ടിയ വെള്ളമൊഴിച്ച ചോറ് കൊതിയോടെ കഴിക്കുമ്പോൾ അവളുടെ മുന്നിൽ മാളിയേക്കൽ എന്ന തറവാട്ടുപേരോ മാളിയേക്കൽ എബ്രഹാമിന്റെ മകൾ എന്ന പേരോ ഉണ്ടായിരുന്നില്ല.... മറിച്ച് വിശപ്പു മാത്രം.....

 

 ഭക്ഷണം കഴിക്കുന്ന ആനിനെ കണ്ടപ്പോൾ ഒരു നിമിഷം ദാവീദിന്റെ ചുണ്ടിൽ ഒരു ചിരി വിടർന്നു....

 ഒരിക്കൽ ആൻ പറഞ്ഞത് ഓർത്തപ്പോൾ ഉണ്ടായ ചിരി.....

 

എടി മറിയാമ്മോ.... എന്റെ ഈ ചോർന്നോലിക്കുന്ന കൂരേല് ഞാൻ തന്ന പഴങ്കഞ്ഞി കഴിക്കുമ്പോൾ ഈ മാളിയേക്കലിലെ കൊച്ചിന് ഇപ്പൊ നാണക്കേടൊന്നും ഇല്ലായോ.....

 

 ദാവീദിന്റെ വാക്കുകൾക്ക് തന്നെ കീറി മുറിക്കാനുള്ള കഴിവുണ്ടെന്ന് ഒരു നിമിഷം ആനിനു തോന്നി....

 

ഞാൻ ചുമ്മാ പറഞ്ഞതാടി കൊച്ചേ... നീ കഴിക്കു........

അല്ല മറിയാമ്മോ എന്നതാ പ്രശ്നം....

ആൻ കാര്യങ്ങളെല്ലാം ദാവീദിനോട് പറഞ്ഞു....

 

എനിക്ക് തല്ക്കാലം പിടിച്ചു നിൽക്കാൻ ഒരു ജോലിയും താമസിക്കാൻ ഒരു ഇടവും ശെരിയാക്കി തരാമോ...

 

അതിനു മാളിയേക്കലെ കൊച്ചു തമ്പുരാട്ടിക്ക് എന്ത് ജോലിയാ അറിയാവുന്നെ.....

 

ശരി.... ഞാൻ ഒരു ജോലി ശരിയാക്കി തരാം....

 

ജോലി.... എന്റെ പെമ്പറന്നോളായിട്ട്, താമസം ഇവിടെ... എന്തെ സമ്മതമാണോ....

ഒരു നിമിഷം ആനിന്റെ ചുണ്ടിൽ ഒരു പുഞ്ചിരി വിരിഞ്ഞുവെങ്കിലും പെട്ടന്ന് എന്തോ ഓർത്ത പോലെ അത് മാഞ്ഞു.....

 

വേണ്ട ദാവീദേ... അത് ശെരിയാകില്ല...

 

അതെന്താ മറിയാമ്മോ... ഈ കൂലിപ്പണിക്കാരൻ നിനക്ക് ചേരാത്തോണ്ടാണോ.....

 

ഇനിം അങ്ങനൊന്നും പറയാതെ ദാവീദേ...നിനക്കൊരു കുഞ്ഞിനെ തരാൻ എനിക്ക് കഴിയില്ല... മാത്രവുമല്ല ഞാൻ ഒരു രണ്ടാം കെട്ടും....

 

മറിയാമ്മോ... അതൊന്നും എനിക്ക് ഒരു പ്രശ്നംമല്ലെടി... കുഞ്ഞുങ്ങളൊക്കെ ദൈവത്തിന്റെ ഇഷ്ടമല്ലേ..... ഇനിയിപ്പോ നമുക്ക് സ്വന്തമായൊരു കുഞ്ഞ് ഇല്ലയെങ്കിലും കുഴപ്പമില്ലടി... എന്നെ പോലെ ചെറുപ്പത്തിലേ അനാഥരായ എത്രയോ കുഞ്ഞുങ്ങളുണ്ട്... നമുക്ക് അവരുടെ അപ്പനും അമ്മയും ആകാമെടി.... പിന്നെ അന്നും ഇന്നും ദാവീദ് നിന്റെ പണമോ സൗന്ദര്യമോ ആഗ്രഹിച്ചിട്ടില്ല... പിന്നെ എന്തുകൊണ്ടാണ് നിന്നെ സ്‌നെഹിച്ചതെന്നും അറിയില്ല...... പക്ഷെ ഒന്നറിയാം ഈ ഉള്ളിൽ എന്നും നീ മാത്രമേ ഉണ്ടാകു....

 

അപ്പൊ നാളെ ഈ ഇടവക പള്ളിയിൽ വച്ചു നമ്മുടെ മിന്നുകെട്ട്, കേട്ടോടി മറിയാമ്മോ...

 

അങ്ങനെ പിറ്റേന്ന്...... ഇടവക പള്ളിയിൽ കർത്താവിന്റെ രൂപത്തിന് മുന്നിൽ വച്ചു മിന്നുകെട്ടി ദാവീദ് അവന്റെ മറിയാമ്മയെ സ്വന്തമാക്കി......

വിവരമറിഞ്ഞ ആനിന്റെ ഇച്ചായൻ പ്രശ്നമുണ്ടാക്കുവാൻ വന്നുവെങ്കിലും ദാവീദിന്റെ ചങ്കുറപ്പിനു മുന്നിൽ തോറ്റു മടങ്ങേണ്ടി വന്നു.....

 

 

 

മറിയാമ്മോ..... എടി മറിയാമ്മോ......

 

എന്നതാ ദാവീതെ.....

 

എടിയേ... ഇപ്പൊ ഞാൻ നിന്റെ കെട്ട്യോനല്ലെടി...

 

അതിനു....

 

അതിനു.... നീ എന്നെ ഒന്ന് ഇച്ചായ എന്ന് വിളിച്ചേ...

 

പിന്നെ... ഒരു ഇച്ചായൻ വന്നേക്കുന്നു.... ഒന്ന് പോയെടാ...

 

എടി... എടി... പോ.. ഞാൻ പിണക്കവ....

 

അപ്പോഴേക്കും പിണങ്ങിയോ..... ഇച്ചായ.....

 

 

ഒന്നൂടെ വിളിക്കടി....

 

 

ഇച്ചായ.... ഞാൻ ഒരു കാര്യം ചോദിക്കട്ടെ....

 ഞാൻ അത്രയൊക്കെ മോശമായി പെരുമാറിയിട്ടും മറ്റൊരാളെ കെട്ടി പോയിട്ടും ഇച്ചായന് എങ്ങനെയാ എന്നെ പിന്നെയും സ്നേഹിക്കാൻ കഴിഞ്ഞത്......

 

എടി മറിയാമ്മോ..... ഈ ആത്മാർത്ഥ പ്രണയം അങ്ങനെയാണ്... ഒരിക്കലും സ്വന്തം ആകില്ലെന്ന് അറിഞ്ഞാലും അത് നെഞ്ചിനുള്ളിൽ നിന്നും പോകാൻ പാടാണ്........ ഒരിക്കലും നീ എനിക്ക് സ്വന്തം ആയിരുന്നില്ലെങ്കിലും..... ഈ നെഞ്ചിനുള്ളിൽ എന്നും നീ മാത്രമാണ്......

 

ദാവീദ് തന്റെ കൈകൾ കൊണ്ട് ആനിനെ പൊതിഞ്ഞു പിടിച്ചു നെഞ്ചോടു ചേർത്തു....

 

ഇനി അവരുടെ ജീവിതമാണ്........ ദാവീതിന്റെയും  അവന്റെ മറിയാമ്മയുടെയും...........

 

 

 

 

ശുഭം 

 

 

 

ഇത് എല്ലാവരും പലതവണ വായിച്ചിട്ടുള്ള തീം ആയിരിക്കും... ഞാൻ എന്റേതായ രീതിയിൽ ഒന്ന് എഴുതി നോക്കിയന്നെ ഉള്ളു.... അപ്പൊ ഇഷ്ടമായാൽ എനിക്കായി രണ്ടു വരി കുറിക്കണേ.... 😍