1 സിതാര 

താരേ.....
നിനക്കുറക്കമൊന്നുമില്ലേ പെണ്ണെ?

പുറകിൽ നിന്നും ഗായുവിന്റെ വിളി ഞാൻ കേട്ടതായി നടിച്ചില്ല. മനസപ്പോഴും മറ്റെവിടെയൊക്കെയോ അലഞ്ഞുതിരിയുകയായിരുന്നു. ആദ്യമായി നഷ്ടപ്രണയത്തിന്റെ വേദന അറിഞ്ഞ കൊണ്ടോ, അതിന്റെ തീവ്രത താങ്ങാൻ ആവാത്തകൊണ്ടോ ഹൃദയമാകെ വിങ്ങുന്നുണ്ട്.
മറുപടി കിട്ടാഞ്ഞിട്ടാവാം അവൾ അടുത്ത് വന്നു തോളിൽ പിടിച്ചു പിന്നോട്ടാക്കി. നിറഞ്ഞ കണ്ണുകൾ അവളിൽ നിന്നും മറക്കാനുള്ള എന്റെ ശ്രെമത്തെ വിഭലമാക്കി അവൾ എന്റെ മുഖമുയർത്തി.
ആദ്യത്തെ പകപ്പിന് ശേഷം സമചിതത വീണ്ടെടുത്തുകൊണ്ടവൾ എന്റെ സങ്കടം ആരാഞ്ഞപ്പോൾ പിടിച്ചു നിർത്താൻ പണിപ്പെട്ട മിഴിത്തുള്ളികൾ ഒരു പേമാരി കണക്കെ വർഷിച്ചു കൊണ്ട് ഞാനവളെ ഇറുകെ പുണർന്നു.

മറുതൊന്നും പറയാതെ ഒരാശ്വാസമെന്നോണം അവൾ എന്റെ തലയിൽ തഴുകി.

അല്ലെങ്കിലും പണ്ടും ഇങ്ങനെയാണ്. എന്റെ ഏതൊരു ദുഖത്തിലും ചേർത്ത് നിർത്തി
ആശ്വസിപ്പിക്കാൻ അവളെ ഉണ്ടായിരുന്നുള്ളു.
അമ്മയുടെ സഹോദരന്റെ മകൾ, ഗായു എന്ന ഗായത്രി. സഹോദരികൾ എന്നതിലുപരി ഞങ്ങൾ ആത്മാർത്ഥ സുഹൃത്തുക്കളായിരുന്നു. പരസ്പരം ഞങ്ങൾക്കിടയിൽ രഹസ്യങ്ങൾ ഒന്നുമുണ്ടായിരുന്നില്ല, ഒന്നൊഴിച്ചു..........

എന്റെ പ്രണയം!

എന്തിനായിരുന്നത് അവളിൽ നിന്നും മറച്ചതെന്നതിനു എനിക്കിപ്പോഴും വ്യക്തമായ ഉത്തരമില്ല. ഒരുപക്ഷെ ഒരിക്കലും എന്നിൽ വന്നു ചേരില്ലെന്നറിഞ്ഞും ഞാൻ പ്രണയിച്ച
എന്റെ പ്രണയം, എന്റെ മാത്രം സ്വകാര്യതയിൽ ഒതുങ്ങുവാൻ ആഗ്രഹിച്ച എന്റെ സ്വാർത്ഥതയാവാം.

എങ്ങലടികൾ ഒന്നടങ്ങിയപ്പോൾ അവൾ എന്നെ അവലിൽ നിന്നും വേർപെടുത്തി.

താരേ.....
ഇങ്ങോട്ട് നോക്ക്. നിനക്കെന്താ പറ്റിയെ??
ആവലാതിയോടെയുള്ള അവളുടെ ചോദ്യത്തിന് മുൻപിൽ ഇനിയൊന്നും മറക്കുവാൻ എനിക്കാകുമായിരുന്നില്ല.

പറയാം. എല്ലാം പറയാം.
നിന്നോട് പറയാത്തതായി എന്റെ ജീവിതത്തിൽ ഒന്നേ ഉണ്ടായിട്ടുള്ളൂ ഗായു.
പക്ഷെ.......
ഇനിയും നിന്നോടത് പറഞ്ഞില്ലെങ്കിൽ ഞാൻ ചങ്ക് പൊട്ടി ചത്തുപോകും.

എനിക്കൊരു പ്രണയമുണ്ടായിരുന്നു ഗായു.
എന്റെ മാത്രം...
ആരുമറിയാതെ ഞാനീ നെഞ്ചിൽ കൊണ്ടുനടന്ന ഒരു പാഴ്സ്വപ്നം.

കണ്ണീരിലും അവളുടെ ചൊടികളിൽ ഒരു പുഞ്ചിരി വിരിഞ്ഞു.
ഒരു നല്ല കേൾവികാരിയായി ഗായു അവൾക്ക് കാതോർത്തു.