ഫ്ലൈറ്റിനായി കാത്തിരിക്കുന്ന സമയത്ത് ജാനി ദേവിനെ വിളിച്ചു.

കോൾ കണറ്റായതും ജാനിക്ക് ഒരു വാക്ക് പോലും സംസാരിക്കാൻ സമയം നൽക്കാതെ ദേവിന്റെ ശബ്ദം എത്തി.

നീ എവിടെ പോയി കമഴ്ന്ന് കിടക്കുവായിരുന്നു ജാനി. രണ്ട് ദിവസായി നിന്റെ ഫോണിലേക്ക് ട്രൈ ചെയ്യുന്നു. സ്വിച്ച് ഓഫ് ... ഒരു വിവരുമില്ല. ഒരു നേരത്ത് വിളിച്ച് ഞാൻ ദാ വരുവാ... എന്നും പറഞ്ഞ് കോൾ കട്ടാക്കി. പിന്നെ ഒരു വിവരവുമില്ല. അമ്മു എന്തോരം ടെൻഷൻ അടിച്ചു എന്നറിയോ...നിനക്ക് ......
ദേവ് നല്ല ദേഷ്യത്തിലാണ്. ഇനിയെന്ത് പറഞ്ഞ് അവനെ സമാധാനിപ്പിക്കും എന്ന ചിന്തയിലാണ് ജാനി.

അപ്പോഴാണ് ജാനിയുടെ തലയിൽ ഒരു കുഞ്ഞു ബുദ്ധി ഉദിച്ചത്.

ഓഹോ... അപ്പോ എന്നെ വിളിച്ചിട്ട് കിട്ടാഞ്ഞല്ല പ്രശ്നം ... അമ്മുവിന് വിഷമം ആയതാണല്ലേ ..... ജാനി ആക്കിയ രീതിയിൽ ചോദിച്ചു.

പെട്ടെന്ന് ദേവ് ഒന്ന് പതറിയെങ്കിലും അതി വിദ്ഗധമായി അത് മറിച്ചു വച്ചു കൊണ്ട് സംസാരത്തിൽ ദേഷ്യം നിറച്ചു. ജാനിയോട് സംസാരിക്കുമ്പോൾ മുഖത്തൊരു ഇളം പുഞ്ചിരിയുണ്ട്. അമ്മുവിനെ കുറിച്ച് ഓർത്താണ്.

നീ വിഷയം മാറ്റണ്ട ... ജാനി. നിന്റെ ഉരുണ്ടു കളിയൊന്നും ഇനിയിവിടെ നടക്കില്ല .... ദേവ് പറഞ്ഞു.

എനിക്ക് എല്ലാം മനസ്സിലാവുന്നുണ്ട്. നിന്റെ ചുറ്റി കളിയൊന്നും എന്റെ അടുത്ത് വില പോവില്ലാ , ദേവ്.... ജാനിയും വിട്ട് കൊടുത്തില്ല. ഇപ്പോൾ ദേവിന്റെ ദേഷ്യമൊക്കെ ഒന്നടങ്ങി.

അമ്മു പറഞ്ഞിരുന്നു നീ ഇങ്ങോട്ട് വരാണെന്ന് പറഞ്ഞ് മെസേജ് ഇട്ടുവെന്ന് ... എന്താ കാര്യം ...?
ദേവ് സംശയത്തോടെ ചോദിച്ചു.

പ്രത്യേകിച്ച് ഒന്നുമില്ല ... പക്ഷേ പറയാൻ ഒരുപാട് ഉണ്ട് ... എന്തായാലും എല്ലാം വന്നിട്ട് പറയാം .... ജാനി പറഞ്ഞു.

നീ ഇനി തിരിച്ചു പോവോ ...

പോവും, ദേവ്. ഓഫീസിൽ എമർജൻസി എന്ന് പറഞ്ഞ് വിളിച്ചത് കൊണ്ടാണ് ഇപ്പോൾ വരുന്നത്. എത്രയും പെട്ടെന്ന് റിസൈൻ ചെയ്ത് തിരിച്ച് പോരണം ... അതിനും മുൻപ് കുറച്ച് കാര്യങ്ങൾ ചെയ്യാനുണ്ട് .... ജാനി പറഞ്ഞു.

റിസൈൻ ചെയ്യേ... നീ എന്താ പറയുന്നേ, ഇതിനു മാത്രം നിന്റെ മനസ്സിനെ പിടിച്ച് കുലുക്കാൻ അവിടെ എന്താ ഉണ്ടായേ... ഇനി എന്റെ അളിയൻ നിന്നെ ചാക്കിലാക്കിയോ .... ദേവ് തമാശ രൂപത്തിൽ ചോദിച്ചു.

ഒരുപാട് അങ്ങ് താങ്ങല്ലേ ... എങ്കിൽ പറ  അമ്മുവിനെയും കൊണ്ട് അന്ന് എങ്ങോട്ടാ പോയെ....

പെട്ടു ... ദേവ് മനസ്സിൽ പറഞ്ഞു.

അല്ലാ, നീയിത് എങ്ങനെ അറിഞ്ഞു , അമ്മു പറഞ്ഞോ.... ദേവ് ഒരു കുട്ടിയെ പോലെ നിഷ്കളങ്കമായി ചോദിച്ചു.

നന്നായി, എന്നോട്ട് ചോദിച്ചിട്ട് അല്ലേ പോയെ... അഭിനയം ഒക്കെ സിനിമയിൽ മതി എന്റെ അടുത്ത് വേണ്ട ഞാനിത് കുറെ കണ്ടതാ ... അതോണ്ട് നേരെ കാര്യം പറഞ്ഞോ..... ജാനി പറഞ്ഞു.

അതുണ്ടല്ലോ ....

അതുണ്ട് ... കളിക്കാതെ കാര്യം പറ ദേവ്...

ഞാൻ അമ്മുവിനെ പ്രൊപ്പോസ് ചെയ്തു ... ദേവ് നാണത്തോടെ വളച്ചു കെട്ടില്ലാതെ കാര്യം പറഞ്ഞു.

എന്നിട്ട് .... ജാനി ആകാംക്ഷയോടെ ചോദിച്ചു. ജാനിക്ക് ഇപ്പോൾ ഇരട്ടി മധുരം എന്ന അവസ്ഥയാണ്. ദേവിനെ പോലെ ഇത്രയും നല്ല മനസ്സുള്ള ഒരാൾ മാത്രമേ ഇങ്ങനെയൊരു തീരുമാനം എടുക്കുക ഉള്ളൂ.

എന്നിട്ട് എന്താവാൻ ... അവൾ സിനിമാ സ്റ്റെയിലിൽ പ്രൊപ്പോസലിന് നോ പറഞ്ഞു. നിങ്ങളുടെ പുറകെ നടക്കാൻ ഒരുപാട് പെൺകുട്ടിക്കളുണ്ടാവും എന്നെ ആ രീതിയിൽ കാണണ്ടയെന്ന് ... എനിക്ക് അമ്മുവിനെ ഒരുപാട് ഇഷ്ടാ ജാനി. ഇതുവരെയും ആരോടും എനിക്ക് ഈ ഫീൽ തോന്നിയിട്ടില്ല. പക്ഷേ അവൾ എന്താ മനസ്സിലാക്കാതെ ....
ദേവ് നിരാശയോടെ പറഞ്ഞു.

നീ വിഷമിക്കല്ലേ ദേവ്... ഞാൻ അവളോട് സംസാരിക്കാം ...പിന്നെ നമ്മൾ അവളുടെ അവസ്ഥയും നോക്കണമല്ലോ ...... ജാനി ദേവിനെ ആശ്വാസിപ്പിക്കാനായി പറഞ്ഞു.

ദേവ് , ഫ്ലൈറ്റിന് സമയമായി... നമുക്ക് നേരിട്ട് സംസാരിക്കാം.... ജാനി പറഞ്ഞു.

ഞാൻ എയർപോർട്ടിൽ ഉണ്ടാവും. നീ ഫ്ലൈറ്റ് ലാന്റാവുന്ന സമയം മെസേജ് ചെയ്താൽ മതി ..... ദേവ് പറഞ്ഞു കൊണ്ട് കോൾ കട്ടാക്കി.


🌼 🌼 🌼 🌼 🌼 🌼 🌼 🌼 🌼 🌼 🌼 🌼 🌼


പിറ്റേ ദിവസമാണ് ജാനി ലണ്ടനിൽ എത്തിയത് .അവിടെ ജാനിയെ കാത്ത് ദേവ് നിൽക്കുന്നുണ്ടായിരുന്നു.
ജാനി നേരെ ദേവിന്റെ അടുത്തേക്ക് നടന്നു. അവൻ ലഗ്ഗേജ് വാങ്ങിച്ച് കാറിന്റെ ഡിക്കിയിൽ വച്ചു.

യാത്ര കുഴപ്പണ്ടായില്ലല്ലോ ..... ദേവ് അനേക്ഷിച്ചു.

ഇല്ലാ ദേവ്. കാലാവസ്ഥ അനുകൂലമായതു കൊണ്ട് ഫ്ലൈറ്റ് ലേറ്റായില്ല ..... ജാനി പറഞ്ഞു.

കാറിൽ കയറി അഞ്ച് മിനിട്ട് കഴിഞ്ഞപ്പോഴെക്കും ജാനി നല്ല ഉറക്കമായി. വീട്ട് എത്തിയപ്പോൾ ദേവ് ജാനിയെ വിളിച്ചുണർത്തി.

വീട്ടെത്തിയോ ...ഞാൻ ഉറങ്ങി പോയി .....കണ്ണ് തിരുമ്പി പുറത്തേക്ക് നോക്കി കൊണ്ട് ജാനി പറഞ്ഞു.

ഞാൻ വൈകീട്ട് വരാം .നീ എന്തായാലും റസ്റ്റ് എടുക്ക്...എന്നിട്ട് നമുക്ക് വിശേഷങ്ങൾ ഒക്കെ പറയാം ....
ജാനിയെ അവിടെ ഇറക്കി ദേവ് പോയി.

കാർ വന്ന ശബ്ദം കേട്ട് അമ്മു വാതിൽ തുറന്നു. വാതിൽ തുറന്നപ്പോഴെക്കും ദേവ് പോയിരുന്നു. അമ്മു ലഗ്ഗേജ് അകത്ത് കൊണ്ടു വയ്ക്കാൻ ജാനിയെ സഹായിച്ചു. ഇത്ര നേരായിട്ടും അവൾ ഒരു വാക്ക് പോലും മിണ്ടിയിട്ടില്ല .പിണക്കമായിരിക്കും ... മുഖം വീർത്തിരിപ്പുണ്ട്.
ശരിയാക്കാം ... ജാനി മനസ്സിൽ ഓർത്തു.

ജാനിയും തിരിച്ച് മിണ്ടിയില്ല. നേരെ അവളുടെ റൂമിൽ പോയി സുഖമായി കിടന്നു. ഇപ്പോൾ ആ മുഖം ഒന്ന് കാണണം ... ഇപ്പോ പൊട്ടുമെന്ന അവസ്ഥയിൽ എത്തിയിട്ടുണ്ട്. കണ്ടപ്പോൾ ജാനിക്ക് വിഷമം വന്നെങ്കിലും ചെറിയൊരു വാശി.

അങ്ങനെ കിടന്ന് ജാനി ഉറങ്ങി പോയി. കൈയിൽ നനവ് പടരന്നതു പോലെ തോന്നിയപ്പോഴാണ് ജാനി ഉണർന്നത്. നോക്കിയപ്പോൾ ഒരു കൈ കൊണ്ട് ജാനിയെ കെട്ടി പിടിച്ച് ജാനിയുടെ കൈയിൽ തലവെച്ച് കമഴ്ന്ന് കിടന്ന് കരയുകയാണ് അമ്മു.

അയ്യേ ... ചേച്ചിമ്മടെ അമ്മൂട്ടി കരയാണോ ...ഇങ്ങോട്ട് നോക്ക് അമ്മു...
സോറി ... ഇനിയിങ്ങനെ ചെയ്യില്ലാ...കരച്ചിൽ നിർത്ത് ... സോറിടാ...
എന്ത് പറഞ്ഞിട്ടും അമ്മു കുലുങ്ങുന്ന ഭാവമില്ല.

അമ്മു... സോറി ... എഴുന്നേൽക്ക് ... ഞാൻ നിനക്ക് ഇഷ്ടമുള്ള ഡോളിനെ കൊണ്ടു വന്നിട്ടുണ്ട് ... ഇപ്പോ നീ മിണ്ടിയില്ലെങ്കിൽ ഞാൻ വേറെ ആർക്കെങ്കിലും അതെടുത്ത് കൊടുക്കും....
ജാനിയുടെ അവസാനത്തെ അടവ് ഏറ്റു. ഡോളിൽ അമ്മു വീണു.

കരച്ചിൽ ഒക്കെ നിർത്തി ഇപ്പോൾ എഴുന്നേറ്റ് ഇരിപ്പുണ്ട്. ഇപ്പോഴും മുഖം വീർത്ത് തന്നെയാണ് ഇരിക്കുന്നത്. അമ്മു ജാനിക്ക് നേരെ കൈ നീട്ടി.

ജാനി ഒരു ചിരിയോട് കൂടി പോയി ഡോളിനെ എടുത്ത് കൊണ്ടു വന്ന് അമ്മുവിന് കൊടുത്തു. ഇപ്പോ മുഖം കുറച്ച് അയഞ്ഞിട്ടുണ്ട്. ഈ പെണ്ണ് ... കുട്ടികളി ഇതുവരെ മാറിയിട്ടില്ല ... ജാനി മനസ്സിൽ ഓർത്തു.

രണ്ടു പേരും ഏഴുന്നേറ്റ് നടക്കാൻ പോയി. റെസിഡൻഷ്യൽ ഏരിയയിലാണ് അവരുടെ വീട് . അവിടെ  ഭൂരിപക്ഷം മലയാളി ഫാമിലികളാണ് താമസിക്കുന്നത്. ജാനിയെയും അമ്മുവിനെയും കുറിച്ച് കൂടുതൽ ഒന്നും  അറിയില്ലെങ്കിലും എല്ലാവർക്കും അവർ സുപരിചിതരാണ്.

ജാൻവി ... കുട്ടി നാട്ടിൽ പോയിട്ട് ഇത്ര വേഗം തിരിച്ചു വന്നോ...

ജേക്കബ് അനേക്ഷിച്ചു. 

ആനി ചേച്ചിക്ക് സുഖല്ലേ, അങ്കിളെ... ഞങ്ങൾ ചേച്ചിയെ കാണാൻ വരാൻ ഇരിക്കായിരുന്നു.
അമ്മു പറഞ്ഞു.

ഓഫീസിൽ ഒരു എമർജൻസി . വരാതെ പറ്റില്ലല്ലോ ... അപ്പോ ഇങ്ങ് പോന്നു.... ജാനി പറഞ്ഞു.

ജോലികാര്യം ഒക്കെ അങ്ങനെയാ മോളെ ... എന്റെ അവസ്ഥ തന്നെ കണ്ടില്ലേ അലക്സ് മോന് ആനിയെ തനിച്ച് നോക്കാൻ പറ്റാത്തത് കൊണ്ടാ ഈ വയസ്സാ കാലത്ത് ഞാനും താരയും ഇങ്ങോട്ട് പോന്നത് ... അവര് ചോദിക്കുമ്പോൾ എങ്ങനാ പറ്റില്ലാന്ന് പറയാ ...എന്തായാലും മക്കള് രണ്ടാളും അങ്ങോട്ട് ഇറങ്ങ്... എല്ലാവർക്കും കൂടി മിണ്ടിയും പറഞ്ഞും ഇരിക്കാലോ...

ജേക്കബ് പറഞ്ഞു.

ഞങ്ങൾ വരാം , അങ്കിളെ...
അമ്മു പറഞ്ഞു.

ജേക്കബ് മുന്നോട്ട് നടന്നു. അമ്മുവും ജാനിയും നടത്തം തുടർന്നു.

അലക്സും ആനിയും ഡോക്ടർമാരാണ്. ആനി പ്രെഗ്നന്റ് ആയപ്പോൾ രണ്ടു പേരും കൂടി നാട്ടിലേക്ക് വരാൻ ഇരുന്നതാണ് അപ്പോൾ അലക്സിന് ലീവ് കിട്ടിയില്ല. അലക്സ് ഇല്ലാതെ നാട്ടിലേക്ക് ഇല്ലാന്ന് ആനിയും. അപ്പോ പിന്നെ ആനിയുടെ അച്ഛനെയും അമ്മയെയും ഇങ്ങോട്ട് വിളിച്ചു. ഒരെയൊരു മോൾടെ കാര്യമായതു കൊണ്ട് അവർ പിന്നെ എതിർപ്പ് ഒന്നും പറഞ്ഞില്ല.

നടത്തമൊക്കെ കഴിഞ്ഞ് രണ്ടു പേരും വീട്ടിലെത്തി. ജാനി വേഗം പോയി ഫ്രഷായി അടുക്കളയിലേക്ക് പോന്നു. ബ്രേക്ക് ഫാസ്റ്റ് റെഡിയാക്കുന്ന തിരക്കിലാണ് അവൾ .

കുളിച്ച് ഫ്രഷായി അമ്മുവും താഴെക്ക് ഇറങ്ങി പോന്നു. ജാനി അടുക്കളയിൽ ഉണ്ടാവുമെന്ന് അറിയുന്നതു കൊണ്ട് തന്നെ അമ്മുവും നേരെ അങ്ങോട്ട് പോയി. ജാനിയുടെ പുറകെ പന്തം കണ്ട പെരുച്ചാഴിയെ പോലെ നടക്കുന്നുണ്ട് അമ്മു. എന്നാൽ ജാനിയെ സഹായിക്കാനുള്ള ഉദ്ദേശമൊന്നും ഇല്ല എന്നതാണ് സാരം.

ഫ്രിഡ്ജിൽ നിന്ന് പാൽ എടുക്കുകയായിരുന്നു ജാനി. ഇപ്പോഴും ജാനിക്ക് പുറകിൽ നടക്കുന്നുണ്ട് അമ്മു.
എന്താ ... അവസാനം ക്ഷമകെട്ട് ജാനി തന്നെ അമ്മുവിനോട് ചോദിച്ചു. സ്വയം പറയുകയാണെങ്കിൽ പറയട്ടെ എന്ന് കരുതിയാണ് ഇതുവരെ ഒന്നും ചോദിക്കാത്തിരുന്നത്.

അത് ... അത് ചേച്ചിമ്മേ ... അമ്മു എങ്ങനെ പറഞ്ഞ് തുടങ്ങുമെന്ന് ആലോചിച്ച് നിൽക്കുകയാണ്.

കാര്യം പറ അമ്മു. ഇല്ലേൽ നീ ആലോചിച്ചിട്ട് പിന്നെ പറഞ്ഞാൽ മതി ... എനിക്ക് വേറെ പണിയുണ്ട്.
ജാനി പറഞ്ഞു.

ദേവ്... ദേവ് സാറിന് ...എന്നെ ഇഷ്ടാന്ന് പറഞ്ഞു.... അമ്മു എങ്ങനെയോ പറഞ്ഞൊപ്പിച്ചു.

ജാനി ഫ്രിഡ്ജിന്റെ ഡോർ അടച്ച് അമ്മുവിന്റെ നേരെ തിരിഞ്ഞു നിന്നു.

എന്നിട്ട് നീ എന്ത് പറഞ്ഞു ... ജാനി ഒന്നും അറിയാത്ത പോലെ നിസാരമായി ചോദിച്ചു.

ചേച്ചിമ്മ , ദേ ... ഒന്നും അറിയാത്ത പോലെ അഭിനയിക്കല്ലേ ... എനിക്കറിയാം സാർ എല്ലാം പറഞ്ഞിട്ടുണ്ട് ഉണ്ടാവും.
അമ്മു ജാനിയെ നോക്കി പറഞ്ഞു.

ജാനി ചിരിച്ചു കൊണ്ട് പാൽ അവിടെ വച്ച് അമ്മുവിന്റെ കൈയും പിടിച്ച് ഹാളിലേക്ക് നടന്നു. അമ്മുവിനെ സോഫയിൽ പിടിച്ചിരുത്തി ജാനിയും അവളുടെ അടുത്തായി ഇരുന്നു.

നോക്ക് അമ്മു... ദേവ് നല്ലവനാ... എന്ന് വെച്ച് ഞാൻ കല്യാണം കഴിക്കാൻ ഒന്നും നിർബന്ധിക്കില്ല .നിനക്ക് ഇഷ്ടമാണെങ്കിൽ മാത്രം നന്നായി ആലോചിച്ച് തീരുമാനം എടുത്താൽ മതി. നിന്റെ ജീവിതമാണ്, നിന്റെ ഇഷ്ടം ... പക്ഷെ ഞാൻ ഒരു വാക്ക് തരാം, ദേവ് ഒരിക്കലും നിന്നെ ചതിക്കില്ല ...എന്നും കൂടെയുണ്ടാവും ... 

ജാനി അതും പറഞ്ഞ് അടുക്കളയിലേക്ക്
പോയി. അമ്മു കുറച്ച് നേരം അവിടെയിരുന്ന് എന്തൊക്കയോ ആലോചിച്ചു. ജാനി ബ്രേക്ക് ഫാസ്റ്റ് കഴിക്കാൻ വിളിക്കാൻ വന്ന് നോക്കിയപ്പോൾ അമ്മുവിന്റെ കണ്ണ് നിറഞ്ഞിരിക്കുന്നത് കണ്ടു.

എന്തുപറ്റിടാ... മുഖൊക്കെ കഴുക്കി ബ്രേക്ക് ഫാസ്റ്റ് കഴിക്കാൻ വാ... മനസ്സിനെ വിഷമിക്കുന്ന ഒന്നും ഇപ്പോൾ ചിന്തക്കണ്ട ...
ജാനി പറഞ്ഞു.

ബ്രേക്ക് ഫാസ്റ്റ് കഴിക്കുമ്പോൾ അമ്മുവിന്റെ മനസ്സ് വേറെ എവിടെയോ ആണ്. ഭക്ഷണം കഴിക്കുന്നതിൽ ഒന്നുമല്ല ശ്രദ്ധ. 

ചേച്ചിമ്മ ... എനിക്കൊരു കാര്യം പറയാനുണ്ട് ..... അമ്മു പറഞ്ഞു.

നീ എന്തായാലും പറഞ്ഞോ, അമ്മു...

ചേച്ചിമ്മ ... ഞാൻ ഇതുവരെ പറയാത്തൊരു കാര്യാ... ഞാനിപ്പോൾ ഇത് പറഞ്ഞാൽ ചേച്ചിക്ക് ദേഷ്യാവോ ...
അമ്മു ചോദിച്ചു.

എന്താ അമ്മു... നീ പറ... ജാനി പറഞ്ഞു. ജാനിക്ക് എന്തോ പേടി തോന്നുന്നുണ്ടായിരുന്നു.

ഞാൻ ... അമ്മു പറഞ്ഞു തുടങ്ങി. അപ്പോഴെക്കും ജാനിയുടെ ഫോൺ റിംഗ് ചെയ്തു. 

ചേച്ചിമ്മ ,ഫോൺ ... അമ്മു പറഞ്ഞു. അതവിടെ കിടന്ന് അടിക്കട്ടെ ... നീ ബാക്കി പറ... ജാനി പറഞ്ഞു.
വേണ്ട ...ഞാൻ പിന്നെ പറയാം ... അമ്മു പറഞ്ഞു.

അമ്മു പോയി ഫോൺ എടുത്ത് കൊണ്ട് വന്ന് ജാനിക്ക് കൊടുത്തു. മഹിയുടെ കോളാണ് , വീഡിയോ കോൾ . ജാനി അവസാനത്തെ റിംഗിൽ കോൾ എടുത്തു.

ഗുഡ് മോണിംഗ്, അമ്മീ .
കോൾ എടുത്ത വഴി സിത്തുവാണ് സംസാരിച്ച് തുടങ്ങിയത്. 

മോണിംഗ് സിത്തു .എല്ലാവരും ഉണ്ടല്ലോ... ജാനി പറഞ്ഞു. ജാനി അമ്മുവിനെ വിളിച്ച് അടുത്ത് ഇരുത്തി.

സിത്തു , അമ്മമ്മയെയും അച്ഛച്ഛനെയും ബുദ്ധിമുട്ടിക്കരുത് . നല്ല കുട്ടിയായി ഇരുന്നോളോ ... ജാനി സിത്തുവിനെ ഓർമപ്പെടുത്തി.

അമ്മേ ... ഇതാണോ അമ്മ പറഞ്ഞ അമ്മു ചേച്ചി ..... ഗൗതമാണ് ചോദിച്ചത്.

ഗൗതമിന്റെ ചോദ്യം കേട്ടാണ് അവിടെ ഉണ്ടായിരുന്ന എല്ലാവരും ജാനിയുടെ അടുത്ത് ഇരിക്കുന്ന അമ്മുവിനെ നോക്കിയത്.

അതെ ... ഇതാണ് അമ്യത . 
അമ്മു അവരെ എല്ലാവരെയും നോക്കി ചിരിച്ചു.


🌼തുടരും🌼