നീല വസന്തം
--------------

നീലഗിരിക്കുന്നു പൂകൊണ്ടു മൂടുന്ന
നീലവസന്തം വിരിയും ദിനങ്ങളേ,
നിങ്ങളെത്താറുണ്ടു മാമലനാടിന്റെ
നീലസൗഭാഗ്യത്തിൻ കീർത്തന മുദ്രയായ്!

തെല്ലും പിഴയ്ക്കാതെ ഒട്ടും പഴിക്കാതെ
പന്ത്രണ്ടു വർഷങ്ങൾ ദീർഘ തപസ്സിന്റെ
ഊർജത്തിൽ നിർമിച്ച നീലസ്വപ്നങ്ങളെ
പൂക്കാലമാക്കി തിരിച്ചുപോകുമ്പോൾ;

ഉണ്ടൊരു സംശയം ആരാണു നിങ്ങളെ
കാലക്രമത്തിന്റെ പൊരുളറിയിച്ചവർ?
ആരാണു നിങ്ങൾക്കു നീലയുടുപ്പുകൾ
തുന്നിത്തരാറുള്ള സങ്കല്പ ചാരുത?

ദൈവങ്ങൾ സ്വന്തമായ്ക്കാണുമീ നാടിന്റെ
തിരുജടയ്ക്കുള്ളിലണിയിച്ചനീലിമ,
മാഞ്ഞുപോവാതെ, ഏറെ വസന്തങ്ങൾ
വിരിയിച്ചു നില്ക്കട്ടെ മണ്ണിനാഹ്ലാദമായ്!