അങ്ങനെ കറങ്ങി തിരിഞ്ഞു എങ്ങനെയോ അവർ ഡിപ്പാർട്മെന്റ് കണ്ടുപിടിച്ചു. ക്ലാസ്സിൽ എത്തി, ആകെ മൊത്തം ചുറ്റിലും കണ്ണോടിച്ചു. പെൺകുട്ടികളുടെ സൈഡിലെ ബെഞ്ച് എല്ലാം ഫുൾ ആയിട്ടുണ്ട്..
ആൺകുട്ടികളുടെ സൈഡിൽ ബാക്കിലെ രണ്ടു ബെഞ്ച് ബാക്കിയും. പരസ്പരം മുഖത്തോട് മുഖം നോക്കി ബാക്ക് ബഞ്ചിനു തൊട്ടു മുന്നിലുള്ള ബഞ്ചിൽ തന്നെ സ്ഥാനം പിടിച്ചു..

\" ഞാനും കൂടെ ഇവിടെ ഇരുന്നോട്ടെ \"

അടുത്ത് നിന്നും ഒരു കിളിനാദം കേട്ടിട്ടാണ് അനു തിരിഞ്ഞു നോക്കിയത്. അവൾക്കു ഇരിക്കാൻ പാകത്തിന് ഇരുവരും ഒന്ന് ഒതുങ്ങിക്കൊടുത്തു..

\" ഹായ്... ഞാൻ ശരണ്യ. നിങ്ങളെ പേരെന്താ..\"

അടുത്തിരുന്ന പാടെ അവൾ പേര് പറഞ്ഞു പരിചയപ്പെട്ടത് അവർക്കു ശരിക്കും ആശ്വാസമായിരുന്നു.. തങ്ങൾ രണ്ടുപേരു മാത്രം മാറി ഇരിക്കുന്നതു എന്തോ വല്ലാത്ത ചടപ്പ് തോന്നിയിരുന്നു.

\" ഹാ... ജീനക്കുട്ടി നീ ഇവിടെ ഇരിപ്പുണ്ടായിരുന്നോ \"

മുന്നിലെ ബെഞ്ചിൽ നിന്നും സരസിന്റെ ശബ്ദം കേട്ടപ്പോൾ ഇവനോ എന്നാ മട്ടിൽ ചിപ്പു തലയിൽ കൈവെച്ചു പോയി....
ക്ലാസ്സിൽ ടീച്ചർ വരുന്നതുവരെ പുറകിലേക്ക് തിരിഞ്ഞുനിന്ന് സംസാരം മാത്രമായിരുന്നു അവനു പണി....


എപ്പോഴെത്തെയും പോലെ ആദ്യ ദിവസമായതിനാൽ തന്നെ ഉച്ചവരെ മാത്രമേ ക്ലാസ്സ്‌ ഉണ്ടായിരുന്നുള്ളു... അതിനിടക്കുള്ള മൂന്നു പീരിയഡ് ഓരോരോ അദ്ധ്യാപകരായി ക്ലാസ്സിലേക്ക് വന്നുപോയിക്കൊണ്ടിരുന്നു.... ആദ്യം തന്നെ hod പ്രിയ മിസ്സ്‌ ആണ് വന്നത്. ഓഡിറ്റോറിയത്തിൽ പറഞ്ഞ കാര്യങ്ങൾ ഒന്നുംകൂടെ ആവർത്തിച്ചു. ടൈം ടെബ്ലിനെ കുറിച്ചു കൃത്യമായ ധാരണ നൽകി. പ്ലസ്ടു വരെ ഉണ്ടായിരുന്ന ദിവസ കണക്കിനല്ല മറിച്ചു ഡേ സിസ്റ്റം ആണെന്ന് പറഞ്ഞപ്പോൾ അത് മനസിലാക്കി എടുക്കാൻ കുറച്ചു ബുദ്ധിമുട്ട് തോന്നി. പോകപോകെ എല്ലാം ശരിയാകും എന്ന് പ്രത്യേകം പറഞ്ഞിട്ടാണ് പ്രിയ മിസ്സ്‌ പരിജയപ്പെടൽ തുടങ്ങിയത്....

മൊത്തം നാൽപത്തിയഞ്ചു കുട്ടികളാണ് ക്ലാസ്സിൽ ഉള്ളത്. അതിൽ മുപ്പതു പെൺകുട്ടികളും, പതിനഞ്ചു ആൺകുട്ടികളും. അഡ്മിഷൻ എടുക്കൽ കഴിഞ്ഞിട്ടില്ലാത്തതുകൊണ്ട് വരും ദിവസങ്ങളിൽ കുട്ടികളുടെ എണ്ണം കൂടും. പലരും പരസ്പരം പരിചയപെട്ടു. കുറഞ്ഞ സമയം കൊണ്ട് തന്നെ പലരും ചെറിയ ചെറിയ ടീമുകൾ ആയി.

അനുവും ചിപ്പുവും, ഇവർ രണ്ടു പേരും മാത്രമുള്ള കൂട്ടിലേക്കു പുതിയ ഒരാളെ പെട്ടന്ന് ഉൾകൊള്ളാൻ ഉള്ള മടികൊണ്ടോ എന്തോ ഒരു ബെഞ്ചിൽ തന്നെ ഇരിക്കുന്നുണ്ടെങ്കിൽ പോലും ശരണ്യയോട് വല്ലാതെ കൂട്ടുകൂടാൻ കഴിഞ്ഞില്ല.... അവൾ ആണെങ്കിൽ അത്യാവശ്യം നന്നായി സംസാരിക്കുന്ന കൂട്ടത്തിലും ആണ്..

ഉച്ചക്ക് ക്ലാസ്സ്‌ കഴിഞ്ഞപ്പോൾ ഇനി എന്ത് ചെയ്യണം എന്ന ചിന്തയായി. തലേന്ന് തന്നെ ഹോസ്റ്റലിൽ എത്തിയത് കൊണ്ട് അവിടെയെല്ലാം സെറ്റ് ആണ്...
കുറച്ചു നേരം ക്ലാസ്സിൽ തന്നെ ഇരുന്നു. പിന്നെ വയറു കരിഞ്ഞു നിലവിളി തുടങ്ങിയപ്പോൾ കാന്റീനിലേക്ക് വെച്ച് പിടിച്ചു...
ക്ലാസ്സ്‌ കണ്ടുപിടിക്കാനുള്ള അത്ര ബുദ്ധിമുട്ടൊന്നും കാന്റീൻ കണ്ടു പിടിക്കാൻ ഉണ്ടായിരുന്നില്ല...

ഉച്ച നേരം ആയതിനാൽ കോളേജിലെ ഒരു വിധം പിള്ളേർ ഒക്കെ അതിനകത്തുണ്ട്. ചിലർ ഭക്ഷണം വാങ്ങി ഗ്രൂപ്പുകളായി ഇരുന്നു കഴിക്കുന്നു. മറ്റു ചിലർ ഫുഡും കൊണ്ട് പുറത്തേക്കു പോകുന്നു. ഇതിലൊന്നും പെടാതെ ചായയും ജ്യൂസും ആയി വേറെ ചിലർ. ആകെ മൊത്തം പലതരം കലപില ശബ്ദങ്ങൾ. ചൊവ്വയിൽ എങ്ങാനും എത്തിയത് പോലെയാണ് തോന്നിയത്. എന്ത് ചെയ്യണം എവിടുന്ന് തുടങ്ങണം എന്നറിയാത്ത ഒരു തരം അവസ്ഥ. 

\" ട്ടോ.... \"
പെട്ടന്ന് പിന്നിൽ നിന്നും കേട്ട ശബ്ദത്തിൽ ഇരുവരും ഒരുപോലെ ഞെട്ടി, തിരിഞ്ഞു നോക്കിയപ്പോൾ ഇളിച്ചു നിൽക്കുന്നു സരസും ക്ലാസ്സിലെത്തന്നെ മറ്റൊരു പയ്യൻ മനോജും....

\" ഫുഡ്‌ അടിക്കാൻ തന്നെ അല്ലെ വന്നത് \"

\" അല്ലാതെ ഇതിനകത്തു ജമ്പോ സർക്കസ് ഒന്നും നടക്കുന്നില്ലല്ലോ... \"
സരസ് ചോദ്യം അവസാനിപ്പിക്കാം മുന്നേ ചിപ്പു ഉത്തരം പറഞ്ഞു.

\" കുന്തം വിഴുങ്ങിയപോലെ നിക്കുന്ന കണ്ട് ചോദിച്ചതാണ് ജീനക്കുട്ടി. അങ് ക്ഷമി \"
ഇരു കൈകളും കൂപ്പി പിടിച്ചു തലയും താഴ്ത്തിയാണ് സരസിന്റെ സംസാരം.. അതി കേട്ടപ്പോൾ തന്നെ അനുവിന് ചിരി വന്നു...

\" ഡാ... ഉണ്ണികുട്ടാ... \"

കാറി കൂവിയുള്ള വിളിയിൽ എല്ലാവരും ഒരുമിച്ചു തിരിഞ്ഞു നോക്കി. രാവിലെ ഓഡിയിലേക്ക് പോകാൻ പറഞ്ഞ സീനിയർ ആണ്, സിബിൻ... ക്യാന്റീനിൽ ഒരു മൂലക്കൽ ഇരുന്നാണ് സംസാരം കൂടെ വേറെയും ഫ്രണ്ട്‌സ് ഉണ്ട്... 

\" ഇങ്ങനെ തൊഴുതു നിക്കാൻ ഇതാണോ നിന്റെ പുതിയ പ്രതിഷ്ഠ....\"

അവന്റെ കളിയാക്കിയുള്ള ചോദ്യത്തിൽ കൂടെ ഉള്ളവരടക്കം എല്ലാവരും പൊട്ടി ചിരിച്ചു...
അനു പക്ഷെ സരസിനെ ആണ് നോക്കിയത് ചെക്കന്റെ മുഖം കടന്നൽ കുത്തിയത് പോലെ വീർത്തു നിൽക്കുന്നുണ്ട്...

\" ഇങ്ങോട്ട് വാടാ... \"

\" പോടാ... \"

എല്ലാവർക്കും ഇടയിൽ വെച്ച് ഉണ്ണികുട്ടാ എന്ന് വിളിച്ചത് ആൾക്കത്ര പറ്റിയില്ല.. അതാണു ഈ ദേഷ്യം..
സിബിനും ഒപ്പം മഹിയും അടുത്തേക്ക് വന്നു

\" ടെറർ ആയല്ലോ... \" അവന്റെ തോളിലൂടെ കയ്യിട്ടുകൊണ്ടാണ് സിബിൻ പറഞ്ഞത്.. 

\" ദേ.. മഹിയേട്ട... ഈ സിബിച്ചനോട് പറഞ്ഞേക്ക് എന്നെ അങ്ങനെ വിളിക്കരുതെന്നു. \"

തോളിലേക്കിട്ട കൈ തട്ടി മാറ്റി അടുത്ത് നിക്കുന്ന മഹിയോടായി വളരെ ഗൗരവത്തിൽ തന്നെ പറഞ്ഞു....

\" ഉത്തരവ് മഹാരാജാവേ....\"

താഴ്മയോടെ പറഞ്ഞപ്പോൾ സരസ് മുഖം വെട്ടിച്ചു, നേരെ നോക്കിയത് ചിപ്പുവിനെ ആണ്. അവളുടെ ചിരി കണ്ടപ്പോൾ ചെക്കന്റെ ഫ്യൂസ് മൊത്തം പോയി...

\" ദേ.. സിബിച്ച... \"

\" ഇവിടെ കിടന്നിങ്ങനെ തല്ലു പിടിക്കാതെ.. ഇങ്ങോട്ട് വാ വല്ലതും മേടിച്ചു തരാ... \"

വീണ്ടും അടികൂടാൻ നിന്ന സരസിനും സിബിനും ഇടയ്ക്കു കയറി മഹി പറഞ്ഞപ്പോൾ രണ്ടും മിണ്ടാതെ നിന്നു...

\" ഞാൻ ഒറ്റക്കല്ല... \"

മുഖം ഒരു കോട്ടക്ക് വീർപ്പിച്ചു വെച്ചാണ് സരസ് പറഞ്ഞത്.. 

\" അയ്യോ... പറഞ്ഞത് നന്നായി.. അറിഞ്ഞില്ലെന്നു... \"

അവന്റെ തലക്കൊന്നു കൊട്ടികൊണ്ട് സിബിൻ വീണ്ടും ചൊറിയാൻ നിന്നു. അവനെ ചറഞ്ഞു നോക്കി കൊണ്ട് സരസും...

\" നിങ്ങൾക്കെന്താ വേണ്ടത്... \"

ചിപ്പുവിനോടും അണുവിനോടും ആയി സിബിൻ ചോദിച്ചു.. 

\" ബിരിയാണി.. \"

ചിപ്പു വാ തുടങ്ങുന്നതിനു മുന്നേ അനു ചാടികേറി പറഞ്ഞതു കേട്ട് സിബിനും മഹിയും ഒരുപോലെ അവളെ നോക്കി..

\'\" ബിരിയാണിയോ... അത് വെള്ളിയാഴ്ച മാത്രേ കിട്ടു.... \" അവളോടായി പറഞ്ഞു കൊണ്ട് മഹി നേരെ അവർക്കുള്ള ഫുഡ്‌ വാങ്ങാൻ ആയി പോയി..

\" നിങ്ങൾ എവിടേലും ഒരു സീറ്റ് പിടിച്ചോ.. ഞങ്ങൾ ഫുഡും കൊണ്ട് വരാം..
നീ വന്നേ ഉണ്ണികുട്ടാ... \"

സരസിനെ തോളിലൂടെ ചുറ്റിപിടിച്ചു കൊണ്ടു പോകുന്നതിനിടക്ക് അവർ മൂന്നു പേരോടായി സിബിൻ പറഞ്ഞു...

കാന്റീനിന്റെ പുറത്തുള്ള ചെറിയ അര മതിലിൽ അനുവും ചിപ്പുവും അവർക്കുഒപ്പം സരസിന്റെ ബാഗും അണ്ടിയിൽ വെച്ച മനോജും ഇരുന്നു... കുറഞ്ഞ സമയങ്ങൾക്കകം തന്നെ നാല് പ്ലേറ്റ് ചോറുമായി മഹിയും സിബിനും സരസും വന്നു...ഭക്ഷണം അവരുടെ കയ്യിൽ കൊടുത്ത് സിബിനും മഹിയും അവരുടെ ടീമിനടുത്തേക്ക് പോയി... 

\" നീ കഴിക്കുന്നില്ലേ.. \"
ചോറും സാമ്പാറും ഉപ്പേരി പപ്പടം അച്ചാർ അടങ്ങുന്ന ഊണും നോക്കി ഇരിക്കുന്ന അനുവിനോടായി ചിപ്പു ചോദിച്ചു..

\" എങ്ങനെയാ ചോറുണ്ണുന്നെ... \"

\" ദാ.. ഇങ്ങനെ.. \" വലിയൊരു ഉരുള ഉരുട്ടി വായിലേക്കിട്ട് കൊണ്ട് മനോജ്‌ പറഞ്ഞു..

\" അതല്ല ഒരു മീൻ വറുത്തത് പോലും ഇല്ല.. \'\'\"

\" ചത്തതിനേം കൊന്നതിനേം ഒക്കെ തിന്നങ്കിലെ അങ്ങോട്ട്‌ ഇറങ്ങാത്തൊള്ളോ... ഇന്നാ... വേണേൽ എന്റെ പപ്പടം കൂടെ എടുത്തോ... ഇതും കൂടി അങ്ങ് കഴിക്ക്... \"

\" നീ വെജ് ആണോ \" ഒട്ടും ഇഷ്ടപെടാത്ത രീതിയിലുള്ള സരസിന്റെ സംസാരം കേട്ട് ചിപ്പു അവനോടായി ചോദിച്ചപ്പോൾ അതെ എന്നാ രീതിൽ അവൻ തലയാട്ടുകയും ചെയ്തു..

\" വെറുതെ അല്ല.. \" പരസ്പരം അങ്ങോട്ടും ഇങ്ങോട്ടും ഓരോന്ന് പറഞ്ഞു അവർ ഭക്ഷണം കഴിച്ചു... അവിടം മുതൽ അവർ നാല് പേരും അടങ്ങുന്ന സൗഹൃദവും ഉടലെടുത്തു...