*Green eyed butterfly💚~5*
      ~ഫർഹാന


****
\"യാൻ കണ്ണടക്കു.തുറക്കരുത്. ഇവിടെ എവിടെയോ റൂഹിയുണ്ട്. നീ കണ്ണ് തുറന്നാൽ ഈ പ്രകാശം എന്നെന്നേക്കുമായി നിലക്കും. അങ്ങനെ വന്നാൽ ജിഹ..\"

ബാക്കി പറയുന്നതിന് മുന്നേ ചിറകടി ശബ്ദം കേട്ട് കൊണ്ട് തിരിഞ്ഞ ഷിൻ കാണുന്നത് വെള്ളച്ചിറകുകൾ വിടർത്തി പറന്നു വരുന്ന സിഹയേ ആണ്.

അവളുടെ കണ്ണുകളിലെ തിളക്കം റൂഹി ഇവിടെ എവിടെയോ ഉണ്ടെന്നതിനെ വ്യക്തമാക്കുന്നുണ്ടായിരുന്നു.

ഷിൻന്റെ കണ്ണുകളൊന്ന് ചുരുങ്ങി.ഇനിയെന്ത് സംഭവിക്കുമെന്നത് വല്ലാത്തൊരു ആശങ്കയായിരുന്നു.
ഒരുപക്ഷെ എവിടെയും നടക്കാത്തൊരു പോരാട്ടമായിരിക്കും അത്,അതിന് കുറച്ചു കാലങ്ങൾ മാത്രം ബാക്കി.നന്മയുടെ ഇരു വശങ്ങൾ തമ്മിലുള്ള പോരാട്ടം.


\"യാൻ ഇനി കണ്ണ് തുറന്നോ,വാ ഇനി നടക്കേണ്ട.എന്റെ പുറത്ത് കയറിക്കോ. പെട്ടെന്ന് പോവാം.\"

യാൻ ഒന്ന് കണ്ണ് ചിമ്മി തുറന്നപ്പോഴേക്കും ആ പ്രകാശം പോയിരുന്നു.ഷിൻ പറഞ്ഞത് പോലെ അവളുടെ പുറത്ത് കയറി അവർ മിന്നൽ വേഗത്തിൽ വീട്ടിലേക്കെത്തി.

\"യാൻ നീ സൂക്ഷിക്കണം. നിന്റെ ലക്ഷ്യം അരികിലെത്തി എങ്കിലും നിന്നെ തളർത്താനുള്ള ശക്തിയും നിന്റെ അരികിൽ തന്നെയാനുള്ളത്.\"

\"ഞാൻ ശ്രദ്ധിച്ചോളാം.\"

\"എങ്കിൽ ഞാൻ പോവുന്നു\"

എന്ന് പറഞ്ഞു കൊണ്ട് ഷിൻ മേശയുടെ മേലെ ഉണ്ടായിരുന്ന കുഞ്ഞു പെട്ടിയിലേക്ക് പോയി. ഉടനെ തന്നെ യാൻ അത് അടച്ചു ഭദ്രമായി എടുത്തു വെച്ചു.

പിന്നീടവൾ പിറ്റേന്ന് ഓഫീസിലേക്ക് പോവുമ്പോഴേക്ക് വേണ്ട സാധനങ്ങൾ എല്ലാം ഒരുക്കി വെച്ചു.


ഏകദേശം പതിനൊന്ന് മണി കഴിഞ്ഞപ്പോഴാണ് അവൾ റൂമിലേക്ക് കിടക്കാനായി വന്നത്. അപ്പോഴാണവൾക്ക് ദിനുവിനെയും ബദിമ്മയെയും ഓർമ്മ വന്നത്.
ഉടനെ തന്നെ കഴുത്തിലെ മാലയുടെ പെൻഡന്റ് പിടിച്ച് ഒന്നിളക്കി.


                                💚

\"അല്ല ദിനു, നിനക്കിപ്പോ തേനൊന്നും വേണ്ടേ\"

കൊടുത്ത തേൻ മാത്രം കഴിച്ചെഴുന്നേറ്റ ദിനുവിനെ നോക്കിയാണ് ബദിമ്മയുടെ 
ചോദ്യം.

\"യാനില്ലാതെ രസല്ല ബദിമ്മ, ഞാനും പോട്ടെ യാനിന്റെ അടുത്തേക്ക്\"


\"ദിനു, യാനിന് ഉറപ്പായും നിന്റെ സഹായം ആവിശ്യം വരും. അപ്പോൾ നീയാവിടേക്ക് പോവേണ്ടി വരും. അതിന് മുന്നേ ഇവിടെ നിന്റെ ആവിശ്യം ഉണ്ട്. പിന്നെ നിന്നെ അവളുടെ അടുത്തേക്ക് അയക്കുന്നതിനു മുന്നേ നിന്റെ ജന്മ രഹസ്യം അറിയാതെ എനിക്കോ മറ്റുള്ളവർക്കൊ ഒന്നും ചെയ്യാനാവില്ല.\"


ബദിമ്മ പറഞ്ഞത് കേട്ട് നിരാശയോടെ തലയിട്ടിയപ്പോഴാണ് പെട്ടെന്നൊരു പ്രകാശം മുന്നിൽ പരന്നത്.

\"യാൻ..!\"

അത്യധികം സന്തോഷത്തോടെ ആ പ്രകാശത്തിൽ തെളിഞ്ഞു കാണുന്ന യാനിനെ നോക്കി കൊണ്ട് ദിനു വിളിച്ചു. അതിനൊരു പുഞ്ചിരിയായിരുന്നു യാനിന്റെ മറുപടി.

\"അല്ല ദിനു, എന്നെ കൂട്ടാതെ തേൻ കുടിക്കുന്ന തിരക്കിലാണോ\"


\"അത് ഞങ്ങൾ പറഞ്ഞതെ ഉള്ളു യാൻ. അവൾക്കിപ്പോ തേനൊന്നും വേണ്ട നീയില്ലാത്തത് കൊണ്ട്\"

ദിനുവിന്റെ തലക്കൊന്ന് തട്ടി കൊണ്ട് ബദിമ്മ പറഞ്ഞു.

\"എന്നെ വിചാരിച്ച് കഴിക്കാണ്ടിരിക്കണ്ട കേട്ടോ.എനിക്കിപ്പോ തേനൊന്നും പറ്റുന്നില്ലടാ, മുഴുവനായും മനുഷ്യരുടെ സ്വാഭാവം\"


\"എങ്ങനെ സാധിക്കുന്നു യാൻ\"

ഒരു നെടുവീർപ്പോടെ ദിനുവത് പറയുമ്പോൾ അതിനവളെ നോക്കി കണ്ണിറുക്കി കൊണ്ട് യാൻ പോവാണെന്ന് പറഞ്ഞു.

\"എല്ലാം നേരിട്ടിട്ട് വാ യാൻ. എന്തിനും ഞാനുണ്ട്\".

അത് പറയുമ്പോൾ അവളുടെ നീലകണ്ണുകൾ തിളങ്ങുന്നുണ്ടായിരുന്നു.


                               💚

ഏകദേശം 12 മണിയാവുമ്പോഴാണ് റമയും കുടുംബവും വീട്ടിലേക്ക് മടങ്ങുന്നത്.

വീട്ടിലെത്തിയപാടെ ക്ഷീണം കൊണ്ട് വന്ന അതേ പടി മൂന്നു പേരും ബെഡിലേക്ക് വീണു.

..

ഉറക്കിൽ നിന്ന് ഞെട്ടിയുണർന്ന റമ ചുറ്റിലും ഒന്ന് പരതി. സമയം 2 മണിയോടടുത്തിട്ടുണ്ട്.
ഉറക്കക്ഷീണമെല്ലാം അതിവേഗം അവളിൽ നിന്ന് വിട്ടുമാറിയിരുന്നു.
കണ്ണുകളിൽ എന്നത്തേതിനേക്കാളും കൂടുതൽ പ്രകാശം നിറഞ്ഞു.
എന്നും സംഭവിക്കുന്നത് പോലെ തന്നെ അവളെ കൊച്ചു ശലഭം ദൂരേക്ക് വഴികാട്ടി പറത്തി.


\"റൂഹി,യാൻ അവളുടെ ലക്ഷ്യത്തിനായി പുറപ്പെട്ടിട്ടുണ്ട്\"

\"എ..എന്ത്\"

\"അതെ.അവൾ വന്നിട്ടുണ്ട്,ഞാനവളെ കാണുകയും ചെയ്തു.പക്ഷെ അവളെ കണ്ടു എന്നല്ലാതെ മറ്റൊന്നും എനിക്കോർമ്മയില്ല.അവളുടെ മുഖമോ ഒന്നും\"

\"ഇനി ഞാനെങ്ങനെ, ഞാനെന്ത് ചെയ്യും സിഹമ്മാ\"

\"ജിനയുടെ കയ്യിലെ മറുക് മാഞ്ഞു തുടങ്ങിയിട്ടുണ്ട്. എങ്കിലും പൂർണ്ണമായി മായാൻ സമയമെടുക്കും. ഒന്നുകിൽ അത് പെട്ടെന്ന് മായാൻ നമ്മൾ ശ്രമിക്കണം അല്ലെങ്കിൽ,\"

\"അല്ലെങ്കിൽ.. അല്ലെങ്കിലെന്താണ് ചെയ്യേണ്ടത്\"

\"യാനിനെ തടയണം, ഒരുപക്ഷെ അതവളെ മരത്തിലേക്കും എത്തിച്ചേക്കാം\"

\"ഇല്ലാ,അതിനെനിക്ക് കഴിയില്ല.ഞാൻ ജിനയുടെ അടുത്തേക്ക് പോവാം. അത് പെട്ടെന്ന് മായാനുള്ള വഴികൾ പറഞ്ഞു തന്നാൽ മതി\"

അത്രമേൽ പ്രിയപ്പെട്ടവളോടൊപ്പം പോരാടാൻ അവളിൽ ഭയമാണ്, ഒരിക്കലും അവളെ വേദനിപ്പിക്കാൻ റൂഹിക്ക്(റമ)കഴിയില്ലായിരുന്നു.

\"പക്ഷെ റൂഹി,അതപകടമാണ്. ഞാൻ വഴികളെല്ലാം പറഞ്ഞു തരാം. നിനക്ക് തീരുമാനിക്കാം ഏത് തിരഞ്ഞെടുക്കണം എന്നത്.\"

\"ഏതപകടവും ഞാൻ തരണം ചെയ്യും സിഹമ്മാ\"

\"എങ്കിൽ ഞാൻ പറയാം,ബദിയയുടെ വീടിനു മുന്നിലായി ഒരു മരമുണ്ട്. അതിൽ നിറയെ ചിത്രശലഭത്തിന്റെ രൂപത്തിലുള്ള പൂക്കളാണ്. ആ പൂക്കളുടെ ഇതളുകളുടെ നീര് ജിനയുടെ കൈകളിൽ ഉറ്റിക്കണം. പക്ഷെ അവയുടെ ചുവപ്പ് നിറം മാറി വെള്ളയാവുന്നതിന് മുന്നേ അവയുടെ നീരെടുക്കണം.ആ നീരിന്റെ നിറം ചുവപ്പിൽ നിന്ന് വെളുപ്പാവുന്നതിന് മുന്നേ അവളുടെ കൈകളിൽ ഉറ്റിക്കണം\"

\"ഇതെനിക്ക് കഴിയും സിഹമ്മാ.\"

\"ഒരുപക്ഷെ അവയുടെ നീരിന്റെ നിറം മാറിയാൽ നിന്റെ ജീവനത് ആപത്താണ്.പിന്നെ,ആ മറുക് മാഞ്ഞാലും യാനിന്റെ മരണത്തിന് സാധ്യതയുണ്ട്\"

അവൾ തീർത്തും നിസ്സഹായയായി പോവുകയായിരുന്നു ആ നിമിഷം.എന്തും സഹിക്കാനുള്ള ശക്തി മനസ്സിന് നൽകി കൊണ്ടവൾ സിഹയോട് പോവാമെന്ന് തലയാട്ടി.

\"വേഗം വീട്ടിലേക്ക് പൊയ്ക്കോളൂ, നാളെയാണ് ഇതിന്റെ തുടക്കം. പുലർച്ചെ ആവുമ്പോഴേക്കും നിനക്ക് വീട്ടിലേക്ക് മടങ്ങാം\"

എല്ലാത്തിനും തലയാട്ടി കൊണ്ടവൾ വീട്ടിലേക്ക് പറന്നു.



                             💚

ഓഫീസിലേക്ക് പോവാൻ ഇറങ്ങുകയാണ് യാൻ.രാവിലെ തന്നെ മീറ്റിംഗ് ഉണ്ടെന്ന് പറഞ്ഞത് കൊണ്ട് തന്നെ വേഗത്തിൽ കമ്പനിയിലേക്കുള്ള ബസ്സ് കയറി.

അവിടെ എത്തിയപ്പോൾ ആകെ ഒരു ചടപ്പ് തോന്നിയെങ്കിലും മുന്നിൽ തന്നെ നിൽക്കുന്ന ഒരു ഗേൾ വന്ന് അവൾക്കുള്ള ഫയലും അവളുടെ ക്യാബിനും കാണിച്ചു കൊടുത്തു.

\"ന്യൂ അല്ലെ.ഇന്ന് മീറ്റിംഗ് ഉണ്ട് ട്ടോ.. ദേ അവിടെയാണ് മീറ്റിംഗ് ഹാൾ. അങ്ങോട്ടേക്ക് 10മണിക്ക് എത്തണം\"

അതിനൊക്കെ ഒന്ന് തലയാട്ടി കൊണ്ടവൾ ക്യാബിനിലേക്ക് നടന്നു.
പ്രത്യേകിച്ച് ജോലിയൊന്നും ഇല്ലാത്തതിനാൽ അവിടെ വെറുതെ ഇരുന്നു.

ഓരോരുത്തർക്കും ഓരോ റൂം പോലെ ആയത് കൊണ്ട് മറ്റുള്ളവരെ ഒന്നും കാണാനോ സംസാരിക്കാനോ കഴിയില്ലായിരുന്നു.

അൽപ്പനേരം കഴിഞ്ഞതും അവളുടെ കണ്ണുകളിൽ നിന്ന് പ്രകാശം വന്നു.
അതിന്റെ കാരണം അറിഞ്ഞ പോലെ അവൾ കണ്ണുകൾ ഇറുക്കെ അടച്ചു.
ഷിൻ പറഞ്ഞത് പോലെ ശലഭത്തിന്റെ പെൻഡന്റ് ഇരു കണ്ണിലും ചെറുതായൊന്ന് തൊട്ടു. അതോടെ ആ പ്രകാശം പോയി.
എന്നാൽ അത് അധിക സമയം ഉണ്ടാവില്ലെന്നത് അവൾക്ക് നല്ല ബോധ്യമുണ്ടായിരുന്നു.


10 മണി ആയപ്പോൾ മീറ്റിംഗ് ഹാളിലേക്ക് നടന്നു.
അവിടെ അവളെ കൂടാതെ രണ്ട് പേരും ഉണ്ടായിരുന്നു.


                             💚

ഫറയും റമയും ഓടി ഹാളിലേക്ക് കടന്നു.അവളുടെ പിറകെ തന്നെ യാനും ഉണ്ടായിരുന്നു.

അവൾ വരുന്ന ശബ്ദം കേട്ട് അവർ തിരിഞ്ഞു നോക്കികൊണ്ട് അവൾക്കൊന്നു പുഞ്ചിരിച്ചു കൊടുത്തു. 
തിരികെ യാനും ഒരു പുഞ്ചിരി നൽകി.
നിമിഷ നേരം കൊണ്ട് റമയുടെ കണ്ണുകളിലേക്ക് യാൻ ഉറ്റുനോക്കി.
അവളുടെ കറുത്ത കണ്ണുകളിൽ മഞ്ഞ കണ്ണുകൾ തെളിഞ്ഞു കാണുന്നത് പോലെ തോന്നിയവൾക്ക്.



[തുടരും]