*Green eyed butterfly💚~12*
          ~ഫർഹാന


****

\"ഷാൻ,എന്നെ വിട്ട് പോവല്ലേ\"

അത്രമേൽ നേർത്തതായിരുന്നു അവളുടെ ശബ്ദം. തിരിഞ്ഞു നടക്കാൻ നിന്നിരുന്ന ഷാനിന്റെ കൈകളിൽ അവളുടെ കൈകൾ മുറുകി.

\"ജിഹാ,നിന്നെ വിട്ട് ഞാനെവിടേക്കും പോവില്ല.അത് ഞാൻ വാക്ക് തരാം. പക്ഷെ ഒരിക്കലും നമുക്ക് അധിക കാലം ഒരുമിച്ച് ജീവിക്കാൻ കഴിയില്ല ജിഹാ. കാരണം നിയമം അതാണ്, വിധിയും.\"

അവളുടെ തലയിലൂടെ തലോടി അവൻ പറയുന്നതവൾ വേദനയോടെ കേട്ടു. അവന്റെ ഹൃദയം ചുട്ടു പൊള്ളുന്ന പോലെ വേദനിച്ചു. അത്രയും പ്രിയപ്പെട്ടതായിരുന്നവൾ അകലാൻ ഇനി അധിക കാലമൊന്നുമില്ല.അതിന്റെ അടയാളമാണല്ലോ ഇന്നവൾ ആ പുസ്തകം എടുത്ത് വായിച്ചതും, എല്ലാം.

\"നീയിവിടെ കിടക്ക്, ഞാൻ പോയി ഭക്ഷണം എടുത്ത് വരാം.\"

ജിഹക്കും അവനുമുള്ള ഭക്ഷണം എടുത്ത് റൂമിലേക്ക് നടക്കുമ്പോഴാണ് പുറത്ത് നിന്ന് ആരോ ബെല്ലടിച്ചത്.
ഭക്ഷണം റൂമിലെ ടേബിളിൽ വെച്ച് ഷാൻ വേഗം പോയി ഡോർ തുറന്നു.
ചുറ്റിനും നോക്കിയിട്ടും അവിടെ ആരുമില്ലായിരുന്നു.

പക്ഷെ അവന്റെ കണ്ണുകൾ അവരുടെ വീടിന്റെ അകത്തേക്ക് കയറിയ ശലഭത്തിലേക്ക് പതിഞ്ഞു. ഓടി ചെന്ന് അതിനെ കയ്യിലാക്കും മുമ്പേ അത് അപ്രത്യക്ഷമായിരുന്നു.

ഇത് വരെ ഓരോന്ന് പറഞ്ഞ് ആശ്വസിപ്പിച്ചിരുന്ന മനസ്സിൽ വീണ്ടും ആധി നിറഞ്ഞു.

\"ഷാൻ,വരുന്നില്ലേ\"

ജിഹയുടെ വിളിയിൽ അവൻ മുഖമൊന്ന് ഷർട്ടിന്റെ കയ്യിൽ അമർത്തി തുടച്ച് റൂമിലേക്ക് നടന്നു.
അവൾക്കുള്ള കഞ്ഞി കൊടുത്തു കഴിഞ്ഞതിനു ശേഷം അവനും കഴിച്ചു.

ചുറ്റിനുമുള്ളവരെല്ലാം ഉറങ്ങിയിട്ടും അവനിൽ ഉറക്ക് വന്നതേയില്ല.
അവന്റെ ഭയവും നിസ്സഹായതയുമെല്ലാം ഉറക്കിനെ പാടെ മായ്ച്ചു കളഞ്ഞിട്ടുണ്ടായിരുന്നു.


                          💚

\"നിങ്ങളെന്താ ഇങ്ങനെ ഇരിക്കുന്നെ, വൈന്നേരം മുതൽ ശ്രദ്ധിക്കുന്നതാണ് ഞാൻ\"

\"സാറ,അവൾ..യഹാന വന്നിട്ടുണ്ട്..ഞാനന്ന് കണ്ടത് അവളെ തന്നെയാണ്. പക്ഷെ അവളുടെ കണ്ണുകൾ!\"

\"പച്ച കണ്ണല്ലേൽ പിന്നെ എങ്ങനെ അത് അവളാവും? അത് ചിലപ്പോൾ വേറെ ആരെങ്കിലും ആയിരിക്കും.കയ്യിൽ മറുകുണ്ട് വിചാരിച്ച് അവൾ തന്നെ ആവണം എന്നില്ലാലോ\"

\"പക്ഷെ മറുക്,അത് ശലഭത്തിന്റെ തന്നെ ആണ്.അതവൾ തന്നെയാണ്. എനിക്കുറപ്പാണ്\"

\"അവളാണെങ്കിൽ കൂടി നിങ്ങളെന്തിനാ പേടിക്കുന്നെ.തെറ്റ് ചെയ്തവർക്ക് ശിക്ഷ ലഭിക്കും.നിങ്ങൾ ചെയ്തിട്ടുണ്ടേൽ നിങ്ങൾക്കും.\"

അത്രമാത്രം പറഞ്ഞ് സാറ റാഷിയെ ഒന്ന് തുറിച്ചു നോക്കി കൊണ്ട് തിരിഞ്ഞു കിടന്നു.
അവന്റെ ഉറക്കം പോവാൻ ആ മറുകുകൾ തന്നെ ധാരാളമായിരുന്നു.

ഉറക്കം വരാതെ വന്നപ്പോൾ അവൻ പുറത്തേക്കിറങ്ങി.
നിലാ വെളിച്ചത്തിൽ ദൂരെയുള്ള വഴികളും മരവുമെല്ലാം വ്യക്തമായി കാണാം.
പഴയതോരോന്ന് ഓർത്തു കൊണ്ടിരിക്കുമ്പോഴാണ് അവന്റെ കണ്ണിന്റെ മുന്നിലൂടെ ഒരു ശലഭം പറന്നു മാഞ്ഞത്.ഒരാളാലോടെ നെഞ്ചിൽ കൈ വെച്ച് അവൻ ചുറ്റിനും നോക്കി. പക്ഷെ ശലഭത്തെ കാണുന്നില്ലായിരുന്നു.
                          
താൻ ചെയ്ത തെറ്റിനുള്ള ശിക്ഷ വൈകാതെ തന്നെ ലഭിക്കുമെന്ന് അവനുറപ്പായി.


                                  💚

\"യാൻ,ജിഹമ്മയുടെ വീട് കണ്ടു പിടിച്ചോ\"

ജനലിനരികിൽ ഇരിക്കുന്ന യാനിന്റെ ചുറ്റിനും പറന്നു കൊണ്ട് ഷിൻ ചോദിച്ചു.

\"ഇല്ല, പക്ഷെ ഏകദേശം എന്തൊക്കെയോ അറിയാൻ കഴിയുന്നുണ്ട്. പക്ഷെ ഒന്നുമെനിക്ക് വ്യക്തമാവുന്നില്ല.\"

\"നാളെ ഓഫീസിലേക്ക് പോവണ്ടെ, കിടന്നോ നീ.വൈകാതെ തന്നെ എല്ലാം നമ്മളിലേക്ക് തന്നെ എത്തും\"

ഷിൻ അത് പറഞ്ഞു കൊണ്ട് ജനലിന്റെ അടുത്തുള്ള പൂവിലേക്ക് കിടന്നു. യാൻ ബെഡിലേക്കും.

അവളുടെ മനസ്സ് നിറയെ ഇന്ന് മാല വാങ്ങിയതിനെ കുറിച്ചാണ്.
ആ മനുഷ്യൻ അവളിൽ എന്തോ തിരയുന്നത് പോലെ തോന്നിയവൾക്ക്.
കൂടുതൽ കൂടുതൽ അയാളുടെ മുഖം കണ്ണിലേക്ക് ആക്കും തോറും തന്റെ ആദ്യ ഉറവിടം അവിടെ തന്നെയാണെന്ന് അവളോട് മനസ്സ് പറയുന്നുണ്ടായിരുന്നു. 

രാവിലെ എഴുന്നേൽക്കുമ്പോഴേക്കും ഷിൻ പുറത്തേക്ക് പോയിരുന്നു. സമയം അധികം ഇല്ലാത്തത് കൊണ്ട് തന്നെ തട്ടിക്കൂട്ട് ഭക്ഷണവും ഉണ്ടാക്കി വേഗത്തിൽ ബസ്റ്റോപ്പിലേക്ക് ഓടി.

എന്നും പോകുന്ന ബസ് മിസ്സായെന്ന് മനസ്സിലായതും ഇനിയെന്തെന്ന ചോദ്യം ബാക്കിയായിരുന്നു.

\"ഹാനി,വാ\"

അവളുടെ മുന്നിലൂടെ ഓടിച്ചു പോയ സ്കൂട്ടി കുറച്ച് മുമ്പിൽ നിർത്തി. ഫറയും റമയും ആയിരുന്നു അത്.

\"വേഗം കയറ്,ടൈമില്ല\"

യാൻ കയറിയെന്നറിഞ്ഞതും ഫറ ഒരു പറക്കൽ ആയിരുന്നു അത് കൊണ്ട്.അടച്ച കണ്ണ് ഓഫീസിന്റെ മുന്നിൽ എത്തിയപ്പോഴാണ് റമയും യാനും തുറന്നത്.

പിന്നീട് അവരുടേതായ കാബിനിലേക്ക് കയറി ജോലിയിൽ ഏർപ്പെട്ടിരുന്നു.
ഏകദേശം ഉച്ചഭക്ഷണം കഴിക്കാൻ ആവുന്നതിനു കുറച്ചു മുമ്പ് എല്ലാവരോടും മീറ്റിംഗ് ഹാളിലേക്ക് എത്താനുള്ള അനൗൺസ് വന്നു.

കാബിനിൽ നിന്ന് പുറത്തിറങ്ങിയ യാനിനെ കാത്ത് ഫറയും റമയും ഉണ്ടായിരുന്നു.


\"ഗുഡ് ആഫ്റ്റർനൂൺ എവെരിവൺ, നമ്മുടെ കമ്പനി ഒരു പ്രോഗ്രാം അറേഞ്ച് ചെയ്യുന്നുണ്ട്. മറ്റൊന്നുമല്ല നിങ്ങളെല്ലാവരും അറിഞ്ഞത് പോലെ തന്നെ ബെസ്റ്റ് ബിസ്സിനെസ്സ് മാൻ ന്റെ അവാർഡ് നമ്മുടെ ഷാൻ സർന് ലഭിച്ചു. അതിനെ സംബന്ധിച്ചു ഒരു പാർട്ടി.പാർട്ടി രണ്ട് ദിവസം കഴിഞ്ഞാണ്.നേരത്തെ പറയേണ്ടേ സാഹചര്യം അല്ലാത്തത് കൊണ്ടാണ് നിങ്ങളോട് നേരത്തെ പറയാത്തത്.പാർട്ടിയെ അനുബന്ധിച്ച് ഈ രണ്ടു ദിവസം നിങ്ങൾക്ക് ലീവ് ആണ്.ഒരു ദിവസത്തെ പാർട്ടി ആയത് കൊണ്ട് തന്നെ അന്നത്തെ സ്റ്റേയും നമ്മുടെ കമ്പനിയുടെ തന്നെ ഒരു ഹോസ്റ്റലിൽ ആയിരിക്കും.\"


പിന്നെ അതിന് ശേഷം മറ്റു റൂൾസും, പ്രോഗ്രാംസും ഒക്കെ സെറ്റ് ചെയ്തതിന് ശേഷം എല്ലാവരും പിരിഞ്ഞു.

\"നമുക്ക് നാളെ ഡ്രെസ്സെടുക്കാൻ പോവാം\"

ഫറയാണ് തുടക്കമിട്ടത്.
അതിന് മറ്റു രണ്ട് പേരും സമ്മതിക്കുകയും ചെയ്തു.
അന്നത്തെ ദിവസം വർക്കിനേക്കാൾ കൂടുതൽ പ്ലാനിങ് തന്നെ ആയിരുന്നു.

വീട്ടിൽ എത്തിയപ്പോഴും കിടക്കുമ്പോഴുമെല്ലാം,യാനിന്റെ മനസ്സിൽ മറ്റെന്തൊക്കെയോ നടക്കാനിരിക്കുന്നു എന്ന സൂചനയും നിറയുന്നുണ്ടായിരുന്നു.

  [തുടരും]

അവസാനത്തിലേക്ക് എത്തി കൊണ്ടിരിക്കുകയാണ് കുട്ട്യേളെ!💜