കാവാലം മധു
പത്തനംതിട്ടയില്‍ നിന്നൊരു കിട്ടന്‍
കട്ടുറുമ്പിന്നലെ വീട്ടില്‍ വന്നു
പൊട്ടന്‍ കവിതകള്‍ പാടും കിട്ടനു
ചട്ടുമുണ്ടല്‍പ്പം തലയ്ക്കു വട്ടും
കുട്ടനേം കൂട്ടരേം വട്ടത്തില്‍ നിര്‍ത്തി
കിട്ടന്‍ പറഞ്ഞൊരു പൊട്ടന്‍ കഥ
തൊട്ടതിനൊക്കെ പത്തനംതിട്ടയില്‍
മുട്ടന്‍വിലയാണു കൂട്ടുകാരെ
കട്ടന്‍ കപ്പയ്ക്കും മുട്ടന്‍ പയറിനും
പെട്ടെന്നു ചാടിക്കയറി വില
പട്ടിണികൊണ്ടെന്‍ നാട്ടുകാരെല്ലാരും
നട്ടം തിരിയുന്നു കാശില്ലാതെ
കിട്ടന്‍ പൊട്ടിച്ച പൊട്ടന്‍ കഥ കേട്ടു
മുട്ടിയുരുമ്മിയിരുന്നു കൂട്ടര്‍
പെട്ടെന്നു കിട്ടനോടൊട്ടിനിന്നിട്ടു
കുട്ടന്‍ ഗമയില്‍ പറഞ്ഞു കേട്ടൊ
കിട്ടനുറുമ്പേ നിന്റെയീ വേലകള്‍
കുട്ടനോടെന്തിനെടുക്കുന്നെടാ
ചട്ടന്‍ കുട്ടപ്പാ നിന്നേപ്പോലെത്രയോ
ചട്ടമ്പിമാരെ ഞാന്‍ കണ്ടിട്ടുണ്ട്‌
പട്ടണമല്ലിതു പെട്ടെന്നുവേണേല്‍
പത്തനംതിട്ടയ്ക്കു തട്ടിവിട്ടോ
പൊട്ടന്‍കഥകേള്‍ക്കാന്‍ നിന്നേപ്പോലൊരു
വട്ടനേം ഇവിടെ കിട്ടുകില്ല
കട്ടായം കുട്ടന്റെ വാക്കു കേട്ടപ്പോള്‍
കിട്ടന്‍ പരുങ്ങി പറഞ്ഞു കുട്ടാ
തട്ടുകേം മുട്ടുകേം ചെയ്യല്ലെയെന്നെ
പെട്ടെന്നിവിടം ഞാന്‍ വിട്ടുകൊള്ളാം !
