അവർക്ക് വാക്കുകൾ കിട്ടുന്നുണ്ടായിരുന്നില്ല....

ഇതെല്ലാം കേട്ട് വാതിലിന് മറവിൽ നിന്ന കിച്ചുവിന് സ്വന്തം സമനില നഷ്ടമാവുന്നത് പോലെ തോന്നി... താൻ കേട്ട കൈപ്പേറിയ സത്യങ്ങളുടെ ആഘാതത്തിൽ അവന്റെ നെഞ്ച് പിടഞ്ഞു. കണ്ണുകൾ നിറഞ്ഞു തൂവി...

  എന്റെ... മോൻ ഇന്ന് വേദനിക്കാൻ കാരണം ഞാനാ ഏട്ടാ....

ചന്ദ്രശേഖരൻ അരുന്ധതിയെ സമാധാനിപ്പിച്ചു. അയാൾക്കും എന്ത് ചെയ്യണമെന്ന് അറിയില്ലായിരുന്നു.

എന്റെ തെറ്റ് കാരണം ന്റെ മോള്  പോലും എന്നെ വെറുത്തു...

അത് കേട്ട് കിച്ചുവിന്റെ നെറ്റി ചുളിഞ്ഞു.

ചന്ദ്രൻ ഭാര്യയെ തന്നിൽ നിന്നടർത്തി സംശയരൂപേണ  അവരെ നോക്കി.. എന്നിട്ട് അവരോടായി ചോദിച്ചു.

മോൾക്ക് അറിയുവോ ഇതൊക്കെ...

മ്മ്... എങ്ങനെയോ.... അറിഞ്ഞു.. (അരുന്ധതി )

കിച്ചു.... (ചന്ദ്രൻ )

ഇത് വരെ അറിഞ്ഞിട്ടില്ല... അറിഞ്ഞാൽ എന്റെ കുഞ്ഞ് എന്നെ വെറുക്കും.... (അരുന്ധതി )

ഇത് കേട്ടപ്പോൾ കിച്ചുവിന്റെ മുഖം വലിഞ്ഞു മുറുകി. അവന് സ്വയം പുച്ഛം തോന്നി. താൻ സ്നേഹിച്ചവർ എല്ലാവരും തന്നെ ചതിക്കുക ആയിരുന്നു എന്നുള്ള ചിന്ത അവനെ കാർന്ന് തിന്നു. എന്ത് കൊണ്ടോ അവന് ആയുവിനെ കാണാൻ തോന്നി. ഇനിയൊന്നും അരുന്ധതിയുടെ നാവിൽ നിന്ന് കേൾക്കാൻ വയ്യെന്ന പോലെ വേഗം തന്നെ അവൻ ആയുവിനെ കാണാൻ അവളുടെ മുറിയിലേക്ക് പോയി.

____________________________❤️

ആയുവിനെ മുറിയിലാക്കി ആദി അവന്റെ റൂമിലേക്ക് പോയിരുന്നു. പിന്നെയവൾ പാറുവിനോട് സംസാരിക്കാൻ തുടങ്ങി. അനു റൂമിൽ ഇല്ലായിരുന്നു നീലുവിന്റെ അടുത്ത് കുഞ്ഞിനെ കളിപ്പിക്കുകയായിരുന്നു അവൾ. നീരജിന്റെ കാര്യം ആയിരുന്നു പാറുവിന് ആയുവിനോട് ചോദിക്കാൻ ഉണ്ടായിരുന്നത്.

ആയു... മോളെ നിന്റെ തീരുമാനം എന്താ...

പാറുവിന്റെ സ്വരത്തിൽ ആകുലത നിറഞ്ഞിരുന്നു. തന്റെ കുഞ്ഞനുജത്തിയോടുള്ള കരുതൽ അവളിൽ പ്രകടമായിരുന്നു.

പേടിക്കണ്ട ചേച്ചി... ഞാൻ ഇനിയും ഓരോന്ന് ആലോചിച്ച് വിഷമിക്കില്ല. നിങ്ങളെ ആരെയും വിഷമിപ്പിക്കില്ല.

ഒരു പുഞ്ചിരിയോടെ പറയുന്നവളെ പാറു കണ്ണിമയ്ക്കാതെ നോക്കി നിന്നു പോയി. ആ പെണ്ണിനോട് അവൾക്ക് സഹതാപം തോന്നി. എന്തൊക്കെ കഷ്ടതകൾ അനുഭവിച്ചിരിക്കുന്നു.

ആയു... ജീവിതം ഇങ്ങനെയാണ് മോളെ. പ്രതീക്ഷിക്കാത്ത പലതും സംഭവിക്കും. അതിനോടൊക്കെ പൊരുത്തപെട്ട് ജീവിക്കണം. പിന്നെ... ഒന്നും അറിയാത്ത ഒരാളുടെ ജീവിതത്തിലേക്ക് കടന്ന് ചെല്ലുന്നതിലും  നല്ലത് എല്ലാ കാര്യങ്ങളും അറിയുന്ന നീരജിനെ സ്വീകരിക്കുന്നതല്ലേ.....

അറിയാം ചേച്ചി....

പിന്നെന്തോ പറയാൻ വന്ന ആയുവിനെ കാറ്റ് പോലെ എന്തോ പാഞ്ഞു വന്ന് ഇറുകെ പുണർന്നു. ഒരുനിമിഷം വേണ്ടി വന്നു അവൾക്ക് എന്താ സംഭവിച്ചതെന്ന്  മനസ്സിലാവാൻ.

തന്റെ പ്രിയപെട്ടവന്റെ ഗന്ധവും ചൂടും തന്നിലേക്ക് വന്ന് പതിച്ചപ്പോൾ അറിയാതെ അവളും അവനെ ചേർത്ത് പിടിച്ചു ഏറെ പ്രണത്തോടെ. ഉടലാകെ ഒരു തരം അനുഭൂതി പടരുന്നതവൾ അറിഞ്ഞു. തന്റെ തോളിൽ അനുഭവപ്പെട്ട നനവിൽ നിന്നും അവൾക്ക് മനസ്സിലായി അവൻ കരയുകയാണെന്ന്. അവനെ തന്നിൽ  നിന്നടർത്തി മാറ്റാൻ ശ്രെമിച്ച അവളെ അവൻ ഒന്ന് കൂടെ ചേർത്ത് പിടിച്ചു.

ഈ കാഴ്ച്ച കണ്ട് അന്തിച്ചു നിന്ന പാറുവിന് പോലും അവന്റെ അവസ്ഥ കണ്ട് ചെറിയ തോതിൽ സങ്കടം തോന്നി.

ഏറെ നേരം നിശബ്ദമായി കടന്ന് പോയി. അവന്റെ മനസ്സ് ശാന്തമായ പോലെ തോന്നിയപ്പോൾ അവൻ മുഖമുയർത്തി അവളെ നോക്കി. അവളുടെ മുഖത്ത് സംശയം നിഴലിച്ചിരുന്നു.

ആ നനവാർന്ന മിഴികൾ കാണെ അവളിൽ സങ്കടം നിറഞ്ഞു.

എന്ത് പറ്റി ഏട്ടാ.... (ആയു )

അതിനവൻ ഒന്നും മറുപടി നൽകിയില്ല , പകരം അവന്റെ അധരങ്ങൾ അവളുടെ മൂർദ്ധാവിൽ പതിച്ചു കൊണ്ടിരുന്നു ഏറെ പ്രണയത്തോടെ....

അവന്റെ അധരങ്ങളുടെ തണുപ്പിൽ അവളുടെ മിഴികളിൽ കൂമ്പിയടഞ്ഞു. അവൾടെ മിഴികളിൽ നീർതുള്ളികൾ ഉരുണ്ട് കൂടി. പെട്ടെന്ന് അവളുടെ മനസ്സിൽ അച്ഛന്റെയും അമ്മയുടെയും നീരജിന്റെയും ഒക്കെ മുഖം തെളിഞ്ഞു. ഒരു പിടച്ചിലോടെ അവനിൽ നിന്നകന്ന് മാറുമ്പോൾ ഹൃദയം പതിന്മടങ്ങ് ശക്തിയോടെ അവനിലേക്ക് തന്നെ ചായാൻ കൊതിക്കുന്നു, നഷ്ടപ്പെട്ടതെന്തോ തിരികെ കിട്ടിയ സന്തോഷത്തോടെ.

ആയു... അമ്മ... ഞാൻ എല്ലാം അറിഞ്ഞു മോളെ.... സോറി.... നിക്ക് ഒന്നും അറിയില്ലായിരുന്നു...

അവന്റെ സ്വരം ഇടറി. അവന്റെ വാക്കുകൾ നൽകിയ ആഘാതം അവളിൽ പ്രകടമായി.

എന്നോട് ഒന്ന് പറയാരുന്നില്ലേടി.....

പറഞ്ഞിരുന്നെങ്കിൽ നിങ്ങൾ എന്ത് ചെയ്യുമായിരുന്നു. (ആയു )

അവളിലെ ഭാവപകർച്ച അവനെ അത്ഭുതപ്പെടുത്തി..

ഞാൻ... ഞാൻ നിന്നെ വിശ്വസിക്കുമായിരുന്നു. ചേർത്ത് പിടിക്കുമായിരുന്നു. (കിച്ചു )

അതിനവൾ ഒന്ന് പുഞ്ചിരിച്ചു. അതിൽ പുച്ഛം കലർന്നിരുന്നു.

എന്നെ വിശ്വസിക്കുമായിരുന്നോ..... അതോ നിങ്ങളായി തന്നെ ഉപേക്ഷിക്കുമായിരുന്നോ... പറയ്.... (ആയു )

ആയു നീ എന്താ ഇങ്ങനെയൊക്കെ പറയുന്നത്. (കിച്ചു )

ഞാൻ പിന്നെയെന്താ പറയേണ്ടത് കിച്ചുവേട്ടാ. അന്ന്... അന്ന് നിങ്ങളുടെ അമ്മ നിങ്ങളോട് അങ്ങനെയൊക്കെ പറഞ്ഞിരുന്നെങ്കിൽ നിങ്ങൾ എന്നെ വിശ്വസിക്കുമായിരുന്നോ... പറയ്.... സ്വന്തം അമ്മയെ അല്ലേ  നിങ്ങൾ വിശ്വസിക്കുക.... (ആയു )

അതിനവന്റെ കയ്യിൽ മറുപടി ഉണ്ടായിരുന്നില്ല. അവന്റെ തല താഴ്ന്നു പോയി....

ഞാൻ.... ഞാൻ.... നിങ്ങളെ ഉപേക്ഷിച്ചത് നിങ്ങളോട് സ്നേഹം ഇല്ലാത്തത് കൊണ്ടല്ല... മറിച്ച് എന്റെ പ്രണയം എന്റെ ബലഹീനത ആയത് കൊണ്ടാണ്. നിങ്ങൾ... നിങ്ങൾ തന്നെ ഒരുപാട് തവണ എന്നെ വാക്കുകൾ കൊണ്ട് മുറിവേല്പിച്ചിരുന്നു കിച്ചുവേട്ടാ....

അവളുടെ ഏങ്ങലടികൾ ആ മുറിയാകെ ഉയർന്നു കേട്ടു. വാക്കുകൾക്ക് ക്ഷാമം തോന്നി ആ പെണ്ണിന്.

ഇനിയൊരിക്കൽ കൂടെ നിങ്ങളുടെ വാക്കുകൾ എന്നെ മുറിവേൽപ്പിച്ചിരുന്നെങ്കിൽ ഞാൻ.... ഞാൻ... ഹൃദയം പൊട്ടി മരിച്ചു പോവുമായിരുന്നു.......

ഇത് കേട്ട് നിന്ന കിച്ചുവിന്റെ മിഴികൾ നിറഞ്ഞു.

ശെരിയല്ലേ അവൾ പറഞ്ഞത്... അന്നൊരുപക്ഷെ താൻ ഇതൊക്കെ അമ്മ പറഞ്ഞ് അറിഞ്ഞിരുന്നെങ്കിൽ അമ്മയെ വിശ്വസിക്കില്ലായിരുന്നോ....

അവൻ സ്വയം മനസ്സിനോട് ചോദിച്ചു കൊണ്ടിരുന്നു.

ഞാൻ... ഞാൻ... മറ്റൊരു... പുരുഷനെ മനസ്സ് കൊണ്ട് സ്വീകരിക്കാൻ തയാറായി കഴിഞ്ഞു... (ആയു )

അവൻ വിശ്വസിക്കാൻ ആവാതെ അവളെ നോക്കി. ചുണ്ടുകൾ കൂട്ടി പിടിച്ച് വിതുമ്പൽ അടക്കുന്നവളെ കാണെ അവന് സങ്കടം തോന്നി അതിലുപരി ദേഷ്യവും. ആ സമയം അവളുടെ മനസ്സിൽ അച്ഛനോടും അമ്മയോടുമുള്ള സ്നേഹമായിരുന്നു പ്രണയത്തിനുമേൽ മുന്നിട്ട് നിന്നത്.

ആയു... നീ എന്തൊക്കെ പറഞ്ഞാലും നീ എന്നെ മറന്ന് മറ്റൊരാളെ സ്വീകരിക്കില്ല എന്ന് എനിക്ക് വിശ്വാസം ഉണ്ട്. അതിലുപരി ഞാനല്ലാതെ മറ്റൊരാൾ നിന്റെ കഴുത്തിൽ താലി ചാർത്തില്ല....

ഇതും പറഞ്ഞ് അവൾടെ കവിളിലൊന്ന് തലോടി ആ മുറിയിൽ നിന്ന് അകന്ന് പോകുന്നവനെ തെല്ലൊരു അമ്പരപ്പോടെ അവളുടെ കണ്ണുകൾ വീക്ഷിച്ചു.

കിച്ചു പുറത്തേക്ക് ഇറങ്ങിയപ്പോഴാണ് അനു വരുന്നത് കണ്ടത്. അവനെ കണ്ട അവൾ പുഞ്ചിരിയോടെ എന്തോ ചോദിക്കാൻ വന്നതും അവന്റെ വലതു കരം വായുവിൽ ഉയർന്നു താഴ്ന്നതും ഒരുമിച്ചായിരുന്നു. അവൾക്ക് തന്റെ കവിളുകൾ പുകയുന്ന പോലെ തോന്നി... ഒരു നിമിഷം വേണ്ടി വന്നു എന്താണ് നടന്നതെന്ന് മനസ്സിലാവാൻ..

ഏട്ടാ... ഞാൻ...

ഒന്നും പറയണ്ട നീ... ഇത് ഇപ്പോൾ തന്നത് എന്തിനാണെന്ന് വെച്ചാൽ അമ്മയുടെ തെറ്റിനെ മറച്ചു പിടിച്ചതിന്.

അനുവിന് ശ്വാസം വിലങ്ങും പോലെ തോന്നി. അവൻ സത്യങ്ങൾ എല്ലാം അറിഞ്ഞിരിക്കുന്നു.

തന്നെ അവഗണിച്ചു പോവുന്ന തന്റെ കൂടെപിറപ്പിനെ വേദനയോടെ അവൾ നോക്കി നിന്നു.

അന്ന് ഏട്ടനോട് പറയാൻ ശ്രെമിച്ചതാണ് പക്ഷെ ഏട്ടൻ അതൊന്നും കേൾക്കാതെ ഇരുന്നതല്ലേ... എങ്ങനെ അവനെ വിശ്വസിപ്പിക്കണം എന്ന് അവൾക്ക് അറിയില്ലായിരുന്നു.

____________________________❤️

പിറ്റേ ദിവസം അന്നദാനത്തിന് എല്ലാവരും പോയിരുന്നു. അപ്പോഴൊക്കെ ആയു കിച്ചുവിനെ പാടെ അവഗണിച്ചിരുന്നു. പരുപാടിയൊക്കെ വേഗം കഴിഞ്ഞ് എല്ലാവരും തിരികെ വീട്ടിലെത്തി. അന്ന് വൈകിട്ട് തന്നെ കിച്ചുവിന്റെ കുടുംബം തിരികെ പോവാൻ തീരുമാനിച്ചിരുന്നു.

എല്ലാവരും അമ്പലത്തിൽ നിന്ന് വന്നതിന് ശേഷം പതിവ് ചർച്ചകളിൽ മുഴുകി. അപ്പോഴാണ് അച്ഛച്ചൻ കല്യാണക്കാര്യം എടുത്തിട്ടത്. അത് വരെ പുഞ്ചിരിയോടെയിരുന്ന ആയുവിന്റെ മുഖത്തെ പുഞ്ചിരി മാഞ്ഞു... ഹൃദയം ശക്തിയിൽ മിടിക്കാൻ തുടങ്ങി.

എന്താ മോളെ നിന്റെ അഭിപ്രായം.....

രുക്മിണിയമ്മയുടെ ചോദ്യം കേട്ട് എല്ലാവരും ആകാംഷയോടെ ആയുവിനെ ഉറ്റ് നോക്കി.

എനിക്ക്... എനിക്ക് സമ്മതമാണ്....

എനിക്ക് സമ്മതമല്ല.....

ആയു പറഞ്ഞ് പൂർത്തിയാക്കും മുൻപ്  നീരജിന്റെ വാക്കുകൾ ആ മുറിയാകെ പ്രതിധ്വനിച്ചു.

അവന്റെ ആ പ്രവർത്തിയിൽ ആയുവുൽപ്പടെ എല്ലാവരിലും അത്ഭുതം നിറഞ്ഞു.

നീരൂട്ടാ... നീ... നീ ശെരിക്കും ആലോചിച്ചോ...
(നീലു )

അതെ ചേച്ചി... ഇനിയിതിൽ എനിക്ക് ഒന്നും പറയാനില്ല.

ഇതും പറഞ്ഞ് മുകളിലേക്ക് പോവുന്നവനെ നോക്കി രുദ്രനൊന്നു നെടുവീർപ്പിട്ടു. രംഗം ശാന്തമാക്കാൻ വേണ്ടി രുക്മിണിയമ്മ പറഞ്ഞു...

അവന് ഇഷ്ടല്ലാച്ചാൽ നമുക്ക് ആയുവിന് വേറെ ചെക്കനെ നോക്കാം... രുദ്രാ... നീയ് അതിനുള്ള ഏർപ്പാട് തുടങ്ങിക്കോ..

അമ്മേ.. ഇപ്പോൾ അത് വേണോ... അവൾ പഠിക്കുവല്ലേ... ഇപ്പോൾ....

രുദ്രനെ പറഞ്ഞു പൂർത്തിയാക്കാൻ സമ്മതിക്കാതെ സുപ്രിയ (കണ്ണന്റെ അമ്മ ) പറഞ്ഞു.

ഞാൻ ഒരു കാര്യം പറഞ്ഞാൽ ആരും തെറ്റായി എടുക്കരുത്. (സുപ്രിയ )

എല്ലാവരുടെ ശ്രെദ്ധയും അവരിലേക്കായി. ആയു നെറ്റി ചുളിച്ച് പ്രിയയെ നോക്കി.

അത്... ആയു മോളെ ഞങ്ങൾക്ക് തന്നൂടെ.. എന്റെ കണ്ണന് വേണ്ടി...

അവരുടെ വാക്കുകളിൽ ആയു മരവിച്ചു പോയിരുന്നു. അവളുടെ കാതുകളിൽ ആരോ ഇയ്യം ഉരുക്കി ഒഴിച്ചത് പോലെയവൾക്ക് തോന്നി. കിച്ചുവിനും ഇതേ അവസ്ഥ തന്നെ ആയിരുന്നു.

ഇത് കേട്ട് കണ്ണന് അതിയായ സന്തോഷം തോന്നി. അവന്റെ മുഖത്ത് ആഗ്രഹിച്ചത് നേടി എടുത്തതിന്റെ സന്തോഷം ആയിരുന്നെങ്കിൽ കിച്ചിവിന്റെ നോട്ടം വന്ന് പതിച്ചപ്പോൾ അത് മാറി മുഖത്ത് ദയനീയത നിറച്ച് അവനെ നോക്കി നിസ്സഹായനായി നിന്നു.

ഞാൻ പറഞ്ഞത് തെറ്റായി പോയെങ്കിൽ എന്നോട് ക്ഷെമിക്കണം മോളോടുള്ള ഇഷ്ടം കൊണ്ട് ചോദിച്ചു പോയതാണ്. (സുപ്രിയ )

ഏയ്... ഇത് നമ്മൾക്ക് ആലോചിക്കാം... അല്ലേ രുദ്രാ.... (രുക്മിണിയമ്മ )

അമ്മേ... ഞങ്ങൾക്ക് കുറച്ച് സമയം വേണം.

ഇതും പറഞ്ഞു രുദ്രൻ അവിടെ നിന്നും തിരികെ മുറിയിലേക്ക് പോയി.

___________________________❤️

ഇതേ സമയം ആദി നീരജിനെ അന്വേഷിച്ചു അവന്റെ മുറിയിലേക്ക് വന്നതാണ്. അപ്പോൾ കണ്ടത് അവൻ ജാലകത്തിലൂടെ പുറത്തേക്ക് നോക്കി നിൽക്കുന്നതാണ്.

നിങ്ങളിങ്ങനെ  മാനത്തും നോക്കി  നിന്നോ മനുഷ്യാ... അവൾക്ക് ദേ വേറെ കല്യാണം ആലോചിക്കുന്നു. ഒന്നുല്ലെങ്കിലും നിങ്ങൾക്ക് ലോട്ടറി അടിച്ചതല്ലേ അതും കൊണ്ട് കളഞ്ഞിട്ട് വന്ന് നിൽക്കുന്ന കണ്ടില്ലേ.....

അവൻ ഒരു പുഞ്ചിരിയോടെ ആദി പറയുന്നത് കേട്ട് നിന്നു.

ഉഫ്.... നിങ്ങളുടെ ഒലക്കമേലെ ഈ ചിരി കാണുമ്പോൾ എനിക്ക് ശെരിക്കും നിങ്ങളെ കാലെ വാരി നിലത്തടിക്കാൻ തോന്നുന്നുണ്ടേ...

പറഞ്ഞു കഴിഞ്ഞാണ് ആദി നീരജിന്റെ കണ്ണുകളിലെ നീർതിളക്കം ശ്രെദ്ധിച്ചത്. അവൻ ദയനീയമായി നീരജിനെ നോക്കി.

ഇന്നലെ തന്നെ സമ്മതം അല്ലെന്ന് പറയാൻ തീരുമാനിച്ചതാണ് ആദി. ആയു ഒരിക്കലും എന്നെ പ്രണയിച്ചിട്ടില്ല... ഇനിയൊരിക്കലും പ്രണയിക്കുകയുമില്ല.... ആയുഷിയുടെ പ്രണയം എന്നും കിച്ചുവാണ്...  (നീരജ് )

പക്ഷെ ഏട്ടാ അവൾ....  (ആദി )

അച്ഛനും അമ്മയെയും ഓർത്താണ് കല്യാണത്തിന് സമ്മതിച്ചത്. കൂടാതെ എന്നോടുള്ള കടപ്പാട് കൊണ്ടും.

ആദിയുടെ മുഖത്തെ അമ്പരപ്പ് മനസ്സിലാക്കി നീരജ് തുടർന്നു.

നന്നേ ചെറുതിലെ മുതലേ അവളെ ഞാൻ കാണുന്നതല്ലേ ആദി.. അവളുടെ മനസ്സിൽ എന്താണെന്ന് എനിക്ക് മനസ്സിലാവും...

അവന് ശെരിക്കും നീരജ് ഒരു അത്ഭുതമായി തോന്നി.

എന്തേ അവളെ സ്വന്തമാക്കാനുള്ള ഈ അവസരം മുതലെടുത്തില്ല... (ആദി )

അവളുടെ മനസ്സറിയുന്ന ഞാൻ തന്നെ അവളെ വിഷമിപ്പിക്കണോ. അവൾ സന്തോഷമായി ഇരുന്നാൽ മതി... അവളുടെ ജീവിതത്തിൽ ഒരു താങ്ങായി ഞാൻ ഉണ്ടാവും....

അവന്റെ വാക്കുകളിലൂടെ ആദി അറിയുകയായിരുന്നു നീരജിന് ആയുവിനോടുള്ള പ്രണയം....

___________________________❤️

ഇതേ സമയം കണ്ണൻ ആയുവിനെ കല്യാണത്തിന് സമ്മതിപ്പിക്കാൻ വേണ്ടി മനസ്സിൽ പലതും കണക്ക് കൂട്ടിയിരുന്നു... തന്റെ പദ്ധതികൾ പൂർത്തിയാക്കുന്നതിന്റെ ആദ്യ ചുവടായി കിച്ചുവിനോട് സംസാരിക്കാൻ അവൻ തീരുമാനിച്ചു.

                                        തുടരും.......

അങ്ങനെ നമ്മുടെ സ്റ്റോറി ഹാഫ് സെഞ്ച്വറി അടിച്ചു മക്കളെ... ഇത്രയും വരെ സപ്പോർട്ട് ചെയ്ത എല്ലാവരോടും ഒത്തിരി സ്നേഹം ❤️😘. ഇന്നെങ്കിലും എല്ലാവരും വായിച്ചിട്ട് എനിക്കായി രണ്ട് വരി കുറിക്കണം...