ഭാഗം 43

💞പ്രണയിനി💞


അപ്പു.. അങ്ങനെന്തോ ലെ പേര്... ഡോക്ടർ ചോദിച്ചതും അവൻ തലയാട്ടി.

ആ മീനൂന് ഇവിടെ വന്നാൽ തന്നെ കുറിച്ച  പറയാൻ ഉള്ളു..

എന്റെ കാര്യത്തിൽ തീരുമാനമായി.... മീനു മനസിൽ ഉറപ്പിച്ചു. പറയരുത് എന്നൊക്കെ അവൾ കഥകളിയിലൂടെ പറയാൻ നോക്കുന്നുണ്ടെങ്കിലും അയാൾ ചിരിച്ചുകൊണ്ട് പറഞ്ഞുകൊണ്ടിരുന്നു..

മീനു ഇവിടെ വരുമ്പോൾ തോട്ട് തുടങ്ങും എന്റെ അലോഷിചാച്ചാ.... വിളിക്കുന്ന കേട്ടാൽ തോന്നും അവളുടെ മടിയിൽ ഇട്ടാണ് എനിക്ക് പേരിട്ടതെന്ന്... ഡോക്ടർ കളിയായി പറഞ്ഞതും മീനു അവിടെ ഇരുന്ന് ഉരുകാൻ തുടങ്ങി..

അപ്പു തിരിഞ്ഞ് അവളെ നോക്കി. അവൾ ഒന്ന് ഇളിച്ചു കാണിച്ചു.

എന്റെ മാഷേ ഇയാക്ക് ഇവളെ ഒന്ന് പ്രേമിച്ചൂടെ... അതിനൊക്കെ പരാതി കേൾക്കുന്നത് ഞാൻ ആണ്... അപ്പുവേട്ടൻ നോക്കുന്നില്ല കാണുന്നില്ല... കഴിക്കുന്നില്ല... ഉറങ്ങുന്നില്ല... പറഞ്ഞു കഴിഞ്ഞപ്പോഴേക്കും ഡോക്ടർ ചിരിച്ചിരുന്നു..

ഇങ്ങേരുടെ ചിരി മിക്കവാറും എന്റെ കൊലച്ചിരി ആവും.

അവൾ ദയനീയമായി അപ്പുവിനെ നോക്കി. അവിടെ മുഴുവൻ വീർത്തു കെട്ടി ഇപ്പൊ പൊട്ടും എന്ന രീതിയിൽ ആയിട്ടുണ്ട്...

ദൈവമേ... എന്റെ പല്ലുകളെ നി കാത്തോനെ.... എണ്ണത്തിൽ കുറവ് വരുത്തല്ലേ... എന്റെ മുഖത്തിന്റെ ഷേപ്പ് മാറ്റല്ലേ.... മീനു മനസ്സിൽ പറഞ്ഞോണ്ടിരുന്നു...

അപ്പു ഡോക്ടറിനെ നോക്കി ഒന്ന് ചിരിക്കാൻ ശ്രമിച്ചു.

നിങ്ങളുടെ കല്യാണം ചെറുപ്പത്തിലെ പറഞ്ഞു വെച്ചതല്ലെ....

അപ്പു വിളറിയ ഒരു ചിരി കൊടുത്തു..

പിന്നെന്താ ഇയാൾ മീനൂനെ ഒന്ന് നോക്കുക കൂടെ ചെയ്യാത്തെ മോശം അല്ലേ.... പകുതി കളിയായും പകുതി സീരിയസ് ആയും അയാൾ പറഞ്ഞു.

മീനുവിന് അവിടുന്ന് എങ്ങനേലും ഒന്ന് ചാടിയാൽ മതിയാരുന്നു എന്ന് തോന്നി.

എന്നാൽ ഞങ്ങൾ അപ്പു എഴുനേൽക്കാൻ ആഞ്ഞുകൊണ്ട് പറഞ്ഞു..

ഹാം.. ചെല്ല് ചെല്ല്.. അല്ല മീനുവേ നിന്റെ ഇന്ഹയ്‌ലർ എന്തെ.....

അത് വീട്ടിൽ... അവൾ കൈ പിന്നിലോട്ട് ആക്കി കൊച്ച് കുട്ടികളെ പോലെ പറഞ്ഞു..

നി എന്റെ കൈയിൽ നിന്ന് വാങ്ങും... അത് കൂടെ കൊണ്ട് നടക്കണം എന്ന് പറഞ്ഞിട്ടുള്ളത് അല്ലേ...

അത് അതിപ്പോ അങ്ങനെ ശ്വാസം മുട്ടൽ വരാറില്ല ഇല്ലാ...അതാ...മീനു കൊച്ചു കുട്ടികളെ പോലെ ചുണ്ട് പിളർത്തി പറഞ്ഞു.

ആഹ് എന്തായാലും അപ്പോഴും അത് കൂടെ കാണണം കേട്ടോ.. അയാൾ ശാസന പോലെ പറഞ്ഞു.

അവൾ പല്ല് കാട്ടി ചിരിച്ചു അപ്പുവിന്റെ കൂടെ പുറത്തേക്ക് ഇറങ്ങി.

ഡോർ കഴിഞ്ഞതും മീനു കവിൾ രണ്ടും പൊത്തി പിടിച്ചു... ഇവളെന്താ ഈ കാണിക്കുന്നെ  എന്നും നോക്കി ശ്രദ്ധ ഇരുന്നു.

അപ്പു കലിപ്പിൽ കാറിന് അടുത്തേക്ക് നടന്നു.. അവന്റെ നടപ്പ് കണ്ടപ്പോൾ തന്നെ അകത്ത് എന്തോ കാര്യം നടന്നിട്ടുണ്ടെന്ന് ശ്രദ്ധക്ക് മനസിലായി..

എന്താടി... അപ്പുവിന് പിന്നാലെ നടക്കുമ്പോൾ ശ്രദ്ധ ചോദിച്ചു...

ആ കള്ള കിളവൻ അലോഷി എല്ലാം കുളമാക്കി....

എന്തെ നിന്റെ പ്രേമ കഥ നി അയാളോടും പറഞ്ഞിട്ടുണ്ടാരുന്നോ...

ഉം... അല്ല നിനക്ക് എങ്ങനെ അത് മനസിലായി...

നിന്നെ ഞാൻ ഇന്നും ഇന്നലെയും അല്ലാലോ കാണാൻ തുടങ്ങിയത്.

എന്നിട്ട്... ഒരു അടിക്കുള്ള സ്കോപ്പ് ഉണ്ടോ.

ഇണ്ടാവും.... മീനു ചിണുങ്ങിക്കൊണ്ട് പറഞ്ഞു.

പൊളി.... ശ്രദ്ധ ചിരിച്ചു...

കാറിന്റെ ചുറ്റിനും വെരുകിനെ പോലെ അപ്പു തേക്ക് വടക്ക് നടന്നു..

എവിടെപ്പോയി കിടക്കുവായിരുന്ന രണ്ടും... അപ്പു ചീറി..

അത് പിന്നെ അവിടുന്ന് ഇവിടെ വരെ നടക്കണ്ടേ.... നിന്നോട് ഓടിപ്പോവൻ ഞങ്ങൾ പറഞ്ഞോ... ഹല്ല പിന്നെ... ശ്രദ്ധ ഒന്ന് പുച്ഛിച്ചുകൊണ്ട് കാറിന്റെ ഡോർ തുറന്ന് അകത്ത് കേറി..

മീനു കാറിൽ കേറാൻ തിരിഞ്ഞു നിന്നതും അപ്പു കൈക്ക് പിടിച്ചു വലിച്ചു കവിളത്ത് ആഞ്ഞോരെണ്ണം കൊടുത്തു...

മേലാൽ ആ തോടിന്റെ വഴിക്ക് പോലും പോയേക്കരുത്... കേട്ടല്ലോ.... അതൊരു അലർച്ച ആയിരുന്നു.. കുറച്ചു പേര് അവരെ തന്നെ നോക്കി നിന്നു.

മീനു കവിളത്തും കൈ വെച് അവിടെ തന്നെ നിന്നു... കണ്ണിൽ നിന്നു വെള്ളം ഒഴുകുന്നത് കണ്ടപ്പോൾ അവനു അവൾ കരയുകയാണെന്ന് മനസിലായി.. അവൻ വേഗം ഡ്രൈവിംഗ് സീറ്റിൽ കേറി ഡോർ അടച്ചു.

ശ്രദ്ധ ആകെ കിളി പാറി ഇരിക്കാന്... ഇപ്പൊ ആരാ പടക്കം പൊട്ടിച്ചേ...

ശ്രദ്ധ ഡോർ തുറന്ന് ഇറങ്ങാൻ പോയപ്പോഴേക്കും അപ്പു തിരിഞ്ഞ് കലിപ്പിൽ നോക്കി.

നി എവിടെറങ്ങി പോവാ....

അത് ഞാൻ മീനു.....

മീനു...ഡീ വേണേൽ കേറ്..... അല്ലേൽ തന്നെ നടന്നു വരേണ്ടി വരും...

മീനു ഞെട്ടി ഡോർ തുറന്ന് അകത്ത് കേറി..

അവന്റെ അഞ്ചു വിരലും അവളുടെ കവിളിൽ തെളിഞ്ഞു നിന്നു. ശ്രദ്ധ അവളെ തോണ്ടി വിളിച്ചു...

അവൾ നിറ കണ്ണുകളോടെ അവളെ നോക്കി ഒന്ന് ചിരിച്ചു.

ഇതിപ്പോ എന്തിനാ കിട്ടിയേ..... ശ്രദ്ധ നിഷ്കു ഭാവത്തിൽ ചോദിച്ചു..

ഓ... പുര കത്തുമ്പോ തന്നെ വാഴ വെട്ടണം....അവൾ പിറുപിറുത്തു..

ഇനി തോട്ടിൽ പോവരുത് പോലും.... അവൾ പതുക്കെ പറഞ്ഞു കൊണ്ട് അവനെ നോക്കി ഒന്ന് പുച്ഛിച്ചു..

അപ്പൊ ഇനി ഒരെണ്ണം കൂടെ ഇണ്ട് ലെ...

മീനു അവളെ നോക്കി..

അല്ല എന്നാലല്ലേ കണക്ക് ശരി ആവു...

പോടീ കോപ്പേ.... ഇത് എല്ലാത്തിനൂടെ ഉള്ളതാ...

ഇഹ്ഹ്... ശ്രദ്ധ ചിരിച്ചു...

അതെ അപ്പു എന്നെ ഇവിടെ വിട്ടേക്ക് ഞാൻ പോന്നുന്റെ വീട്ടിൽ കേറിയിട്ട് വരാം.. നാളെ പോവല്ലേ....ഒരു വളവ് തിരിഞ്ഞപ്പോൾ ശ്രദ്ധ പറഞ്ഞു


ശ്രദ്ധ പറഞ്ഞതും മീനു ഞെട്ടി അവളുടെ കൈയിൽ മുറുക്കി പിടിച്ചു...

അവളുടെ കണ്ണുകൾ പോവല്ലേ... എന്ന് പറയാതെ പറയുന്നത് അവൾക്ക് മനസിലായി..

അപ്പു ഒന്നും മിണ്ടാതെ വണ്ടി ഒതുക്കി നിർത്തി..

അപ്പൊ ഓൾ ദി ബെസ്റ്റ്... ശ്രദ്ധ മീനൂന്റെ ചെവിയിൽ പറഞ്ഞു കാറിൽ നിന്ന് ഇറങ്ങി...

എടി... പട്ടി.... മീനു അവളെ മനസ്സിൽ പ്രാകി..

മീനു ഒന്നും മിണ്ടാതെ വെളിയിലേക്ക് നോക്കി നിന്നു.

കാർ എടുക്കുന്നില്ല എന്ന് കണ്ടതും അവൾ അപ്പൂനെ നോക്കി..

നി ഫ്രണ്ടിൽ കേറ്.... അപ്പു കലിപ്പിൽ തന്നെ പറഞ്ഞു.. മീനു ഒന്ന് ഞെട്ടിയേലും അടുത്ത അടി കൊള്ളാൻ മേലാത്തത് കൊണ്ട് അവൾ മുന്നിൽ വന്നിരുന്നു.

അവൻ സ്പീഡിൽ കാർ എടുത്ത് പോയി...

മീനു ജീവനും കൈയിൽ പിടിച്ചു ഇരുന്നു..

ഇടക്ക് കാറിന്റെ സ്പീഡ് കുറഞ്ഞപ്പോൾ മീനു അപ്പുവിനെ നോക്കി..

നിനക്ക് എന്തിന്റെ കേടാ.... നാട്ടിൽ കാണുന്നവരോട് എല്ലാം പറഞ്ഞോണ്ട് നടക്കാൻ...

മീനു തലതാഴ്ത്തി ഇരുന്നു.

ഞാൻ നിന്നെ കെട്ടും എന്ന എന്ത് ഉറപ്പാ നിനക്ക്.... നാട്ടിൽ മുഴുവൻ പറഞ്ഞു നടന്നാൽ നിനക്ക് തന്നെയാ മോശം... നാളെ നല്ലൊരു ആലോചന കൂടി വരില്ല... അല്ലേലും നിനക്കൊന്നും പറഞ്ഞാൽ മനസിലാവില്ല... ഞാൻ എത്ര തവണ പറഞ്ഞു എനിക്ക് നിന്നെ ഇഷ്ട്ടം അല്ല എന്ന്.. നാട് നീളെ പറഞ്ഞു നടക്കാൻ... ചെ... നിനക്ക് നാണം ഇല്ലേ... നി എന്താ ഇങ്ങനെ പറഞ്ഞാൽ തലയിൽ കേറില്ലേ.....


അപ്പോഴേക്കും മീനുവിന്റെ കണ്ണുകൾ നിറഞ്ഞു അവളുടെ സർവ നിയത്രണവും പോയിരുന്നു...

ആ... എനിക്ക് പറഞ്ഞാൽ മനസിലാവില്ല... മീനു പൊട്ടിയ.... മീനൂന് നാണം ഇല്ലാ... മീനു പൊട്ടിയയത് നിങ്ങളോടുള്ള ഇഷ്ട്ടം കൊണ്ടാണ്.... നിങ്ങൾ എന്റെ ആണെന്ന് വിശ്വസിച്ചോണ്ടാ.... എത്ര ദേഷ്യം കാണിച്ചാലും എന്നിലേക്ക് തന്നെ വരാൻ ഉള്ളതാണെന്ന് തോന്നിയത് കൊണ്ടാണ്... നിങ്ങക്ക് എന്നെ ഇഷ്ടല്ലേലും അപ്പേട്ട നിങ്ങളെ എനിക്ക് ഒരുപാട് ഇഷ്ട്ടാണ്... നിങ്ങൾ അല്ലാതെ മീനൂന്റെ ജീവിതത്തിൽ മറ്റൊരാൾ കാണില്ല.... കല്യാണം ആലോചിച്ചു അപ്പുവേട്ടൻ ബുദ്ധിമുട്ടേണ്ട....

കുഞ്ഞിന്നാൾ മുതൽ കേൾക്കണത് ആണ്.. അപ്പു മീനൂന്റെയാ മീനു അപ്പൂന്റെയാ എന്ന്... നിങ്ങളുടെ മനസ്സിൽ ഒന്നും ഇല്ലേലും എന്റെ മനസിൽ ഉണ്ട് ഒരുപാട് സ്വപ്‌നങ്ങൾ.

മീനു കരച്ചിലോടെ പറഞ്ഞു നിർത്തിയതും അപ്പുവിന് പറയാൻ വാക്കുകൾ ഉണ്ടായിരുന്നില്ല...

അപ്പോഴേക്കും വീട് എത്തിയിരുന്നു...


മീനു ഡോർ തുറന്ന് വെളിയിലേക്ക് ഇറങ്ങി നടന്നു...

മീനു.... അപ്പു പിന്നിൽ നിന്ന് വിളിച്ചു.

വേണ്ടാ അപ്പുവേട്ട... എനിക്ക് മനസിലാകും... മീനു പൊട്ടി... ഇനി ആരോടും പറയില്ല... മറക്കാൻ പറയരുത് പറ്റില്ല... ഇനി മുന്നിൽ പോലും വരില്ല...

മീനു അതല്ല.... അപ്പു പറയാൻ തുടങ്ങും മുൻപേ മീനു കരഞ്ഞുകൊണ്ട് അകത്തേക്ക് ഓടി...
💞💞💞


മാഷേ...... ശിവയുടെ നെഞ്ചിൽ വിരൽ കുത്തികൊണ്ട് മാളു ആർദ്രമായി വിളിച്ചു..

മ്മ്........കൈയിൽ നിവർത്തി വെച്ച ബുക്കിൽ കണ്ണോടിക്കുന്നതിനിടയിൽ ശിവ മൂളി...

ഞാൻ.... ഞാനെ ഒരു കാര്യം പറയട്ടെ...

ഉം പറഞ്ഞോ.....അവൻ ബുക്കിൽ നിന്ന് കണ്ണെടുക്കാതെ തന്നെ പറഞ്ഞു..

മാഷേ ഇങ്ങട്ട് നോക്കി.... അവൾ കേറുവോടെ വിളിച്ചു....

അവൻ ബുക്ക് മടക്കി വെച് അവളെ നോക്കി

ഇതെന്താ ഇപ്പൊ ഇങ്ങനെ ഒരു മുഖവുര...

ഇഹ്ഹ്... മാളു ഇളിച്ചു..

എന്തോ കള്ളത്തരം ഉണ്ടല്ലോ...

ഏയ്യ്... മാളു കണ്ണ് വെട്ടിച്ചു...


മ്മ് പറ... എന്താ കാര്യം കേൾക്കട്ടെ....

അതെ.... അതില്ലേ...

ഏത്...ഏതില്ലേ......

മാഷേ..... അവൾ ചിണുങ്ങിക്കൊണ്ട് വിളിച്ചു..

അല്ല നി വാലും തുമ്പും ഇല്ലാണ്ട്... ഒന്ന് പറ...അവൻ നെറ്റി ചുളിച്ചു പറഞ്ഞു.

ഓ.. എന്നാൽ പറയുന്നില്ല അവൾ തിരിഞ്ഞു കിടന്നു..

അയ്യോടാ പിണങ്ങല്ലേ.... അവളെ തിരിച്ചു കിടത്തി കൊണ്ട് അവൻ പറഞ്ഞു..

അവൾ ഒന്ന് ചിരിച്ചു..

മ്മ് പറ കേൾക്കട്ടെ.... അവൻ അവളെ തന്നെ നോക്കിക്കൊണ്ട് ചോദിച്ചു


അതെ....

ഇനി അതെയും പറഞ്ഞോണ്ട് ഇരുന്നാലുണ്ടല്ലോ... അവൻ പുരികം പൊക്കി പറഞ്ഞു..

ഇല്ലാ പറയുന്നില്ല....

മ്മ്...

നമ്മുടെ സച്ചു ഇല്ലേ....

ആ ഉണ്ട്...

അവൾ ഇപ്പോൾ ഹോസ്റ്റലിൽ അല്ലേ നിൽക്കണേ....

ആണ് അതിനു...

ഒന്നാമതെ അവൾക്ക് അവിടുത്തെ ഫുഡ് ഇഷ്ട്ടം അല്ല... തന്നെ അല്ല... അവിടുന്ന് വരുമ്പോ അവൾ ആകെ കോലം കേട്ടിട്ട് ആണ്...അപ്പൊ...

അപ്പൊ...

അപ്പൊ അമ്മ(ശിവയുടെ ) പറഞ്ഞു അവളെ എന്തിനാ ഹോസ്റ്റലിൽ നിർത്തുന്നെ... അവളെ ഇവിടെ നിർത്തിക്കൂടെ എന്ന്... മാളു നഖം കടിച്ചു പറഞ്ഞു..

അത് കണ്ട് അവനു ചിരി പൊട്ടി...

എന്റെ പൊന്നു മാളു നി ഇതിനാണോ കിടന്ന് ഉരുണ്ട് കളിച്ചേ....

അല്ല കേട്ടപ്പോ എനിക്കും നല്ലതാണ് എന്ന് തോന്നി... മാഷ് എന്ത് പറയും എന്ന് അറിയത്തോണ്ട്....

ഞാൻ എന്ത് പറയാനാ.... സച്ചു ഇവിടെ നിൽക്കുന്നതിൽ എനിക്കും സന്തോഷമേ ഉള്ളു...അല്ല അതിനു അവൾ സമ്മതിക്കോ....



തുടരുന്നു.....