ഇനി.......

കയ്യിലെ സ്പെയർ കീ ഉപയോഗിച്ച് ലോക്ക് തുറന്നു അകത്തു കയറി

ഫ്രിഡ്ജിൽ നിന്ന് കൊറച്ചു തണുത്ത വെള്ളം കുടിച്ചിട്ട് നേരെ എന്റെ റൂമിലേക്ക് പോയി

ഡ്രസ്സ്‌ പോലും മാറാൻ നിൽക്കാതെ ഞാൻ കയറി കിടന്നു

ഷീണം കൊണ്ടാണോ എന്തോ അപ്പോൾ തന്നെ മയങ്ങിപ്പോയി....

-----------------------

അമ്മയെ ആണ് ഞാൻ ആദ്യമേ വീട്ടിൽ കയറിയപ്പോ തിരഞ്ഞത് 

പുതിയതായി വന്ന ആളും കൂടെ കാണുമെന്നു എനിക്ക് ഉറപ്പായിരുന്നു

ഊഹം തെറ്റിയില്ല.. അമ്മയുടെ മുറിക്ക് മുൻപിൽ പെണ്ണുങ്ങളുടെ ഒരു പട തന്നെ ഉണ്ടായിരുന്നു 

അവർക്കിടയിലൂടെ ഞാൻ അകത്തേക്ക് കയറി

അവിടെ കണ്ടു അമ്മയുടെ തോളിൽ മുഖമമർത്തി കരയുന്ന ഒരു പെണ്ണികുട്ടിയെ

അവിടെ കൂടി നിന്നവർ പറയുന്നത് കേട്ടാണ് ഞാൻ അറിഞ്ഞത് അവർക്ക് ഏകദേശം ഇരുപത് വയസ്സിനടുത്തു പ്രായം ഉണ്ടെന്നു.. പക്ഷെ കണ്ടാൽ അത്ര പോലും തോന്നുകയുമില്ല

വെളുത്തു മെലിഞ്ഞു നല്ല നീളമുള്ള മുടിയുള്ള ഒരു പാവം ചേച്ചി.. പാവം ആയതു കൊണ്ടാവുമല്ലോ ഇങ്ങനെ കരയുന്നത്... ഇങ്ങനെ ഒക്കെ മനസ്സിൽ കരുതി ഞാൻ എന്റെ മുറിയിലേക്ക് നടന്നു

അവിടെ അമ്മാവന്മാരുടെ ഒരു കൂട്ടം തന്നെ ഉണ്ടായിരുന്നു

അവർക്കൊക്കെ നടുവിൽ തലക്ക് കയ്യും കൊടുത്തിരിക്കുന്ന ചേട്ടനും

ഇങ്ങനെ ഒക്കെ ജീവിതത്തിൽ ആദ്യമായി കാണുന്ന ഞാൻ എല്ലാവരെയും നോക്കിക്കൊണ്ട് അവിടെ കറങ്ങി നടന്നു

ചിലർ കരയുന്നു.. ചിലർ ദേഷ്യപ്പെടുന്നു.. വേറെ ചിലർ കുറ്റങ്ങൾ കണ്ടു പിടിച്ചുകൊണ്ടു നടക്കുന്നു

എല്ലാം ഒന്ന് കെട്ടടങ്ങിയത് രാത്രിയോടെ ആയിരുന്നു

ഒടുക്കം അമ്മയുടെ മടിയിൽ കിടന്നപ്പോ അമ്മ പറയുന്നത് കേട്ടു

ആ ചേച്ചിയെ ഇനി അവരുടെ വീട്ടുകാർക്ക് വേണ്ടെന്ന്.. അത് പറഞ്ഞായിരുന്നു ഉമ്മറത്തു നിന്ന് കൊറച്ചു പേർ ഉച്ചത്തിൽ സംസാരിച്ചത് 

പിന്നെ ആണ് അച്ഛൻ പറഞ്ഞത് എന്റെ മോൾ ആയി തന്നെ ഇവിടെ ഞാൻ വളർത്തിക്കോളാം..ചേട്ടന് കല്യാണപ്രായം ആകുമ്പോൾ  അവരെ കെട്ടിച്ചോളാം എന്നൊക്കെ

\"അപ്പൊ ആ ചേച്ചി ഇവിടെ ആണോ അമ്മേ ഇനി നിൽക്കാൻ പോണത്..?

അമ്മയോട് ഞാൻ ചോദിച്ചു.. അതിന് അമ്മ ഒന്ന് ചിരിക്കുക മാത്രം ചെയ്തു.. എന്റെ മുടി ഇളക്കികൊണ്ട് ചേച്ചിയുടെ പേര് എന്നോട് പറഞ്ഞു

\"ദയ.... ദയ എന്നാ ആ ചേച്ചിയുടെ പേര്.... ഇനിതൊട്ട് ചേച്ചി ഇവിടെ ഒണ്ടാവും...\"

അമ്മ എന്നോട് പറഞ്ഞു.... അന്ന് മുതൽ എനിക്ക് ഒരു ചേച്ചിയെ കിട്ടി.. പക്ഷെ ആകെ ഉണ്ടായിരുന്ന ഒരു ചേട്ടൻ പുറത്തായി

രണ്ട് പേരും ഒരുമിച്ചു നിന്നാൽ ശെരിയാവില്ല എന്ന് പറഞ്ഞുകൊണ്ട് അച്ഛൻ ചേട്ടനെ കൊറച്ചു ദൂരെ മാറിയൊരു ഹോസ്റ്റലിൽ ചേർത്തു

അതായിരുന്നു അച്ഛൻ ചെയ്ത ഒരു തെറ്റ്...

ആദ്യമൊക്കെ ചേട്ടൻ മാസത്തിലൊരിക്കൽ വീട്ടിൽ വന്നു ചേച്ചിയെയും ഞങ്ങളേയുമൊക്കെ കാണുമായിരുന്നു

പിന്നെ പിന്നെ വരവ് കുറഞ്ഞു...ഇടക്ക് കോളേജിൽ ചെന്നപ്പോ അറ്റണ്ടൻസ് കുറവും പഠിപ്പിൽ ശ്രദ്ധയില്ലെന്നുമൊക്കെ ടീച്ചർമാർ പറഞ്ഞു

പക്ഷെ എനിക്ക് ചേട്ടൻ ഇല്ലാത്തത്തിന്റെ ഒരു കുറവും അനുഭവപ്പെട്ടില്ല... കാരണം ആ  പോസ്റ്റിലേക്ക് പുതിയ ഒരാളെ എനിക്ക് കിട്ടിയിരുന്നു

ആദ്യമൊക്കെ കരഞ്ഞു വിഷമിച്ചു നടന്നിരുന്ന ദയേച്ചി മെല്ലെ മെല്ലെ വീട്ടുകാരുമായി കമ്പനിയായി

പിന്നെ എന്നോട് അടുത്തു.. ഒരു ചേച്ചിയുടെ സ്നേഹം ഞാൻ അന്ന് ആണ് അനുഭവിച്ചു തുടങ്ങിയത്

എനിക്ക് പ്ലസ് വൺ അഡ്മിഷൻ കിട്ടി വൈകാതെ തന്നെ.. ഒരു വർഷമായി പഠിപ്പ് നിർത്തിയിരുന്ന ചേച്ചിക്ക്  അച്ഛൻ തന്നെ അടുത്തുള്ള ഒരു കോളേജിൽ അഡ്മിഷൻ വാങ്ങി കൊടുത്തു

പഠിക്കാൻ ബുദ്ധിമുട്ടുള്ള വിഷയങ്ങളിൽ ചേച്ചി എന്നെ സഹായിച്ചു.. പകരം ആരുമില്ല എന്ന തോന്നൽ ഇല്ലാത്ത വിധം ഞാൻ ചേച്ചിയെ കൊണ്ട് നടന്നു

അങ്ങനെ ഇരിക്കെ ആണ് ഒരു ദിവസം ടിവി കണ്ടുകൊണ്ടിരുന്ന എന്റെ അടുക്കൽ ചേച്ചി വന്നിരുന്നത്

ചേച്ചിയെ ശ്രദ്ധിക്കാതെ ഞാൻ ടിവിയിൽ മാത്രം നോക്കിക്കൊണ്ടിരിന്നപ്പോ സ്വാഭാവികമായും കുശുമ്പിന്റെ അസുഖമുള്ള ദയേച്ചി എന്റെ കയ്യിൽ കടിച്ചു

എന്റെ ശ്രദ്ധ മാറ്റാൻ ചെയ്തത് ആണെങ്കിലും ഞാനത് കാര്യമാക്കി എടുത്തു

പിന്നെ നടന്നതൊരു യുദ്ധം തന്നെ ആയിരുന്നു

വീടിനകം ചുറ്റും ഞാൻ ചേച്ചിയെ ഓടിച്ചു.. പിടി തരില്ലെന്ന ഭാവത്തിൽ ചേച്ചിയും

ഒടുക്കം ഓടി ഞാൻ മുൻവശത്തു എത്തിയതും പെട്ടെന്ന് വെളിയിൽ നിന്ന് കേറിവന്ന അച്ഛന്റെ ദേഹത്തു ഞാൻ തട്ടി

കാര്യമായി ഒന്നും തന്നെ ഇരുവർക്കും പറ്റിയില്ല.. പക്ഷെ വേറെന്തോ ചിന്തയിൽ ആയിരുന്നു അച്ഛൻ അന്ന് ആദ്യമായി എന്നെ തല്ലി.. ഒരുപാട് ചീത്ത വിളിയും... കൂടുതലും ചേട്ടനെ ആയിരുന്നു ചീത്ത വിളിച്ചത് അത് എന്തിനായിരുന്നെന്ന് അപ്പോൾ എനിക്ക് മനസിലായില്ല

പക്ഷെ ആദ്യമായി കിട്ടിയ അടിക്ക് വേദന ഒന്നും ഇല്ലായിരുന്നെങ്കിലും മനസ്സിലെവിടെയോ ഒരു നീറ്റൽ

ഞാൻ മുറിയിൽ കയറി ബെഡിൽ കമിഴ്ന്നു കിടന്നു

എന്തോ അച്ഛൻ എന്നെ തല്ലിയത് എന്നെ ശെരിക്കും വിഷമിപ്പിച്ചു

കരയുക അല്ലായിരുന്നു ഞാൻ പക്ഷെ ഞാൻ പോലും അറിയാതെ കണ്ണിൽ നിന്ന് കണ്ണുനീർ ഒഴുകുന്നുണ്ടായിരുന്നു

അല്പം നേരം കഴിഞ്ഞപ്പോ ശബ്ദത്തിൽ ഉള്ള ഏങ്ങലടിയുടെ ശബ്ദം കേട്ടു

ഞാനല്ല എന്താലും.. പിന്നെ ആരാ..?

തിരിഞ്ഞു നോക്കിയപ്പോ കണ്ടു ദയേച്ചി വാതിക്കൽ നിന്ന് മുഖം പൊത്തി കരയുന്നത്

കണ്ടപ്പോ തന്നെ എനിക്ക് പാവം തോന്നി... അന്ന് ഇവിടെ വന്ന ദിവസം കരഞ്ഞത് അല്ലാതെ വേറെ ഒരു കാര്യത്തിനും എന്റെ ചേച്ചിയെ ഞാൻ കരയിച്ചിട്ടില്ല.. ഇടക്ക് പീരിയഡ് ഒക്കെ ആവുമ്പോൾ വേദന സഹിക്കാനാവാതെ എന്റെ തോളിലൂടെ തലയിട്ട് കിടക്കുമ്പോൾ കണ്ണിൽ നിന്ന് കണ്ണുനീർ പോകുന്നതല്ലാതെ ഇതുപോലെ നിന്ന് കരയുന്നത് എനിക്ക് സഹിക്കില്ല

ഞാൻ വേഗന്ന് തന്നെ ചേച്ചിയെ വിളിച്ചു കട്ടിലിൽ ഇരുത്തി കണ്ണ് തുടച്ചു

\"അയ്യേ.. ദയേച്ചി എന്തിനാ പിള്ളേരെ പോലെ കിടന്നു കാറുന്നെ..?

ഞാൻ കളിയാക്കികൊണ്ട് ചോദിച്ചു.. ചേച്ചിയെ കളിയാക്കുമ്പോഴും എന്റെ കണ്ണ് നിറയുന്നുണ്ടായിരുന്നു എന്നത് വേറെ കാര്യം

\"ആര് കരഞ്ഞു.. നിനക്ക് തോന്നിയതാവും..\"

പെട്ടെന്ന് കണ്ണ് തുടച്ചുകൊണ്ട് ചേച്ചി പറഞ്ഞു

\"ഉവ്വ.. ഞാൻ കണ്ടാരുന്നു... പത്തിരുപത് വയസ്സ് ആയല്ലോ ചേച്ചി.. എന്നിട്ടും നാണമില്ലേ ഇങ്ങനെ കിടന്നു മോങ്ങാൻ..\"

ചേച്ചിയുടെ മൂഡ് മാറ്റാൻ വേണ്ടി ഞാൻ പറഞ്ഞു.. പക്ഷെ അത് ഏറ്റില്ല

ഞാൻ പറഞ്ഞത് കൂടെ കേട്ട് ഡാം പൊട്ടിയത് പോലെ ഒരൊറ്റ കരച്ചിൽ ആയിരുന്നു

എന്റെ തോളിലേക്ക് കിടന്നു കൊണ്ട് ഒടുക്കത്തെ കരച്ചിൽ..ഏങ്ങലടിയും പദം പറച്ചിലും വേറെ

എന്തൊക്കെയോ കരഞ്ഞുകൊണ്ട് പറയുന്നുണ്ട്.. എനിക്ക് ആണേൽ ഒന്നും മനസിലാവുന്നുമില്ല

ഇടക്ക് സോറി പറയുന്നതും ഞാൻ കാരണം ആണ് എന്നൊക്കെ സ്വയം പഴി ചാരുന്നതുമൊക്കെ കേൾക്കാം

ഞാൻ എല്ലാം കേട്ടിരുന്നു.. അല്ലാതെ ഇതിനിടയിൽ കേറി എന്തെങ്കിലും പറഞ്ഞാൽ വീണ്ടും ചിലപ്പോ  ആദ്യം മുതൽക്കേ തുടങ്ങും 

കരച്ചിൽ ഒക്കെ ഏകദേശം ഒന്ന് കെട്ടടങ്ങിയപ്പോ ഞാൻ ചേച്ചിയെ തട്ടി വിളിച്ചു

ആളിപ്പോഴും എന്റെ തോളിൽ തലവച്ചു കിടക്കുക ആണ്.. ശബ്ദം ഒന്നുമില്ല.. ഇടക്ക് മൂക്ക് വലിക്കുന്ന ശബ്ദം കേൾകാം

\"ചേച്ചി...\"

\"മ്മ്...\"

\"എടി ദയേച്ചി..\"

\"മ്മ്..\"

രണ്ട് തവണ വിളിച്ചിട്ടും മൂളൽ മാത്രം ആയിരുന്നു ഉത്തരം... എന്റെ തോളത്തു തലവച്ചു കിടക്കുന്നത് അല്ലാതെ വേറെ അനക്കമൊന്നുമില്ല.. ഇനി അവിടെ കിടന്നെങ്ങാനും ഉറങ്ങിപ്പോയോ

\"എന്ത് കുംന്ന്...? വാ തുറന്ന് വല്ലതും പറയെടി ചേച്ചി...\"

നീണ്ടു കിടക്കുന്ന ചേച്ചിയുടെ മുടിയിൽ പിടിച്ചു വലിച്ചുകൊണ്ട് ഞാൻ ചോദിച്ചു

\"ആഹ്... ഒന്ന് അടങ്ങി ഇരിക്ക്‌ ജോമോനെ...\"

എന്റെ കഴുത്തിലേക്ക് പല്ലുകൾ ഇറക്കിക്കൊണ്ട് ചേച്ചി പറഞ്ഞു

കാര്യം വലുതായി കടിക്കുക ഒന്നുമില്ലെങ്കിലും അവളുടെ വായിൽ രണ്ട് സൈഡിലുമായി പ്രേതങ്ങളുടെത് പോലെ അല്പം നീണ്ട രണ്ട് കൂർത്ത പല്ലുകൾ ഒണ്ട്

ഇടക്ക് അത് കൊണ്ട് കടി കിട്ടി ശീലമുണ്ടെങ്കിലും ഓരോ തവണ കടി കിട്ടുബോഴും ഒരു പ്രത്യേക സുഖമുള്ള ഒരു വേദന  ആണ്

\"നീയെന്തിനാടി ചേച്ചി കരഞ്ഞേ..?

ചേച്ചിയുടെ നീളമുള്ള മുടിയിൽ തഴുകികൊണ്ട് ഞാൻ ചോദിച്ചു

\"നീ എന്തിനാ ജോമോനെ കരഞ്ഞേ..?

ഞാൻ ചോദിച്ച അതേ രീതിയിൽ തന്നെ മറുചോദ്യം എത്തി

\"വെറുതെ... അച്ഛൻ എന്നെ തല്ലിയപ്പോ എന്തോ ഒരു...\"

പറഞ്ഞു വന്നത് മുഴുവിപ്പിക്കാതെ ഞാൻ നിർത്തി

തോളിൽ ചാരി കിടന്ന ചേച്ചി തലയുയർത്തി എന്നെ നോക്കി

എന്നെത്തന്നെ നോക്കി നില്കുന്നത് കണ്ട് എന്താണെന്നു ഞാൻ ചോദിച്ചു

\"ഏയ്‌.. ഒന്നുമില്ല...ഒരു മാസം കൂടെ കഴിഞ്ഞാൽ പ്ലസ് ടുവിലെ പരീക്ഷ എഴുതേണ്ട ചെക്കനാ... അവനാണ് അച്ഛൻ തല്ലിയെന്ന് പറഞ്ഞു മോങ്ങുന്നത്...\"

ചേച്ചി എന്നെ കളിയാക്കിക്കൊണ്ട് പറഞ്ഞു

\"അതൊക്കെ ശെരി തന്നെ.. പക്ഷെ ചേച്ചി എന്നാത്തിനാ കരഞ്ഞേ

\"അത് പിന്നെ നീ കരയുന്നത് കണ്ടപ്പോ...\"

എന്നെ നോക്കി ചിരിച്ചു കൊണ്ട് അവൾ പറഞ്ഞു

\"അഹ് കൊള്ളാം...\"

കരഞ്ഞത് കൊണ്ടാണോ എന്തോ രണ്ടാൾക്കും നല്ല വിശപ്പ് തോന്നിയിരുന്നു
അതുകൊണ്ട് ഞാൻ ചേച്ചിയെ കൂട്ടി താഴേക്കിറങ്ങി

ഹാളിൽ ഈ സമയം ടീവി കണ്ടിരിക്കുന്ന അച്ഛനെയും അമ്മയെയും കാണേണ്ടത് ആയിരുന്നു

പക്ഷെ ഇന്ന് ആരെയും കാണുന്നില്ല

\"എന്താ ചേച്ചി ഇന്ന് സീരിയൽ ഒന്നുമില്ലേ..?

ആരെയും കാണാത്തത് കൊണ്ട് ഞാൻ ചേച്ചിയോട് ചോദിച്ചു

അവളും അതേ സംശയത്തിൽ എന്നെ നോക്കി

എന്തായാലും ഞങ്ങൾ കഴിക്കാൻ തീരുമാനിച്ചു അടുക്കളയിലേക്ക് നടന്നു

ചേച്ചി വല്ലപ്പോഴുമേ ഹാളിൽ ഇരുന്നു കഴിക്കു അല്ലാത്തപ്പോ എല്ലാം അടുക്കളയിൽ ഇരുന്നാണ് കഴിക്കാർ

അപ്പോഴൊക്കെ ഞാനും കൂടെ ഇരിക്കും

ചോറ് തിന്നാൽ തോന്നാത്തത് കൊണ്ട് വൈകുന്നേരം അമ്മ ഉണ്ടാക്കിയ ദോശ ചൂടാക്കി തരാമെന്ന് പറഞ്ഞു അവൾ അടുക്കളയിൽ പണി തുടങ്ങി

ഞാൻ അടുത്ത് തന്നെ ഒരു കസേരയിൽ ഇരുന്നു അവളോട് കോളേജിലെ വിശേഷങ്ങൾ ചോദിച്ചു

അന്ന് നടന്ന കാര്യങ്ങൾ എല്ലാം വള്ളി പുള്ളി വിടാതെ എന്നോടവൾ പറഞ്ഞു

ഞങ്ങൾക്ക് രണ്ട് പേർക്കുമുള്ള ഭക്ഷണമായി കഴിക്കാൻ ഇരുന്നപ്പോൾ ആണ് അമ്മ അടുക്കയിലേക്ക് വന്നത്

വന്നതേ ഞങ്ങളെ ഒന്നും നോക്കാതെ കഴുകാൻ ഉള്ള പാത്രങ്ങൾ കഴുകി വെക്കാൻ തുടങ്ങി

മുഖമെല്ലാം മാറി കരഞ്ഞ ലക്ഷണമുണ്ട്

അത് കണ്ടതെ എന്തോ പ്രശ്നം ഉണ്ടെന്നു എനിക്ക് തോന്നി

അത് ചേച്ചിയോട് പറയാൻ തിരിഞ്ഞപ്പോ അവളും അമ്മയെ തന്നെ നോക്കി ഇരിക്കുവാണ്

അവൾക്കും തോന്നിയിരിക്കണം എന്തോ പ്രശ്നം ഉണ്ടെന്നു

\"എന്ത് പറ്റിയമ്മേ...?

ഞാൻ അമ്മയോട് ചോദിച്ചു

\"ഒന്നുമില്ലെടാ ചെറിയൊരു തലവേദന... നീ വേഗം കഴിച്ചിട്ട് പാത്രം ഇങ് താ.. കഴുകിയിട്ടു വേണം ഒന്ന് കിടക്കാൻ..\"

\"അമ്മ കിടന്നോ.. പാത്രം ചേച്ചി കഴികിക്കോളും..\"

അത് മാത്രം പറഞ്ഞതെ ഓർമ ഉള്ളു.. കഴുകികൊണ്ടിരുന്ന പാത്രം സിങ്കിലേക്ക് എറിഞ്ഞുകൊണ്ട് അമ്മ എന്നോട് ദേഷ്യപ്പെട്ടു

\"അവളില്ലായിരുന്നെങ്കിൽ നീ എന്ത് ചെയ്തേനെ.. എന്ത് പറഞ്ഞാലും ചേച്ചി ചേച്ചി...ഇനിയെല്ലാം സ്വയം ചെയ്യാൻ പഠിച്ചോ മര്യാദക്ക്..\"

അതും പറഞ്ഞമ്മ അകത്തേക്ക് പോയി

എന്താ ഇപ്പൊ ഉണ്ടായേ എന്ന് മനസിലാവാതെ ഞാനും ചേച്ചിയും മുഖമുഗം നോക്കി

അമ്മയും കൂടെ ദേഷ്യപ്പെട്ടപ്പോൾ എനിക്ക് ഉണ്ടായിരുന്ന വിശപ്പും കൂടെ പോയി

എണീക്കാൻ പോയ എന്നെ പിടിച്ചിരുത്തി ചേച്ചി രണ്ട് ദോശ കൂടി കഴിപ്പിച്ചു

അമ്മയുടെയും അച്ഛന്റെയും പെരുമാറ്റം അവളിലും നല്ല വിഷമം ഉണ്ടാക്കിയെന്ന് എനിക്ക് അറിയാവുന്നത് കൊണ്ട് ഒന്നും പറയാതെ അവൾ തന്നത് മുഴുവൻ ഇരുന്നു കഴിച്ചു.. വെറുതെ എന്തിനാ ഞാൻ കൂടെ അവളെ വിഷമിപ്പിക്കുന്നത്

പാത്രമെല്ലാം കഴുകി കഴിയുന്നത് വരെ ഞാൻ അവളുടെ കൂടെ തന്നെ ഇരുന്നു

കിടക്കാനായി പോകുമ്പോൾ അവൾ അമ്മയുടെ മുറിയിലേക്ക് പോകുന്നത് കണ്ടു

ഞാനും കൂടെ പോയാലോ എന്ന് ആലോചിച്ചു പിന്നെ വേണ്ടെന്ന് വച്ചു ഞാൻ റൂമിൽ കേറി

ഓരോന്ന് ആലോചിച്ചു വെറുതെ കിടന്നു

പിന്നെ ചേട്ടൻ പണ്ട് ഉപയോഗിച്ചിരുന്ന ഒരു ഫോൺ ഉണ്ടായിരുന്നു എന്റേൽ

അവൻ പുതിയത് എടുത്തപ്പോൾ എനിക്ക് തന്നതാണ്

വലിയ സ്പീഡ് ഒന്നും ഇല്ലാത്ത നെറ്റ് ആണേലും ആവശ്യത്തിന് ഉപയോഗിക്കാൻ പറ്റുന്ന ഒരു സംസാങ്ങിന്റെ ഒരു സെറ്റ് ആണത്

ഫേസ്ബുക്കിൽ കേറി വെറുതെ ഓരോ പ്രൊഫൈലും നോക്കിക്കൊണ്ട് ഇരിക്കുമ്പോൾ ആണ് ചേച്ചി റൂമിലേക്ക് വന്നത്

എന്റെ റൂമിന്റെ ഒപോസിറ്റ് തന്നെ ആണ് അവളുടെ റൂമും

രാത്രി ഇടക്ക് എന്റെ റൂമിൽ വന്നിരിക്കുന്ന പതിവ് അവൾക്കുണ്ട്.. അല്ലെങ്കിൽ ഞാൻ അവളുടെ റൂമിൽ പോയിരിക്കും

പക്ഷെ അമ്മയുടെ റൂമിലേക്കു പോയപ്പോൾ ഉള്ള മുഖമല്ല അവൾക്ക്.. മുഖത്തു ചെറിയൊരു സന്തോഷവും അതുപോലെ തന്നെ സങ്കടവും നിഴലിച്ചു കിടന്നിരുന്നു

എന്റെ കാലിനടുത്തവൾ വന്നിരുന്നു

നിലത്തേക്ക് നോക്കിയാണ് ഇരുപ്പ്

\"ടി ചേച്ചി..\"

\"മ്മ്...\"

\"അമ്മ എന്ത് പറഞ്ഞു..\"

\"ഒന്നും പറഞ്ഞില്ല..\"

ആ പറഞ്ഞത് കള്ളമാണെന്ന് എനിക്ക് അറിയാമായിരുന്നു

\"ഒന്നും പറയാതെ അവിടെ  കഥകളി കളിക്കാൻ ആണോ നീ പോയത്.. നീ കാര്യം പറയെടി ചേച്ചി..\"

അവളുടെ മുടിയിൽ വലിച്ചുകൊണ്ട് ഞാൻ പറഞ്ഞു... മുടിയിൽ വലിക്കുന്നത് ചേച്ചിക്ക് നല്ല ദേഷ്യം വരുന്ന കാര്യം ആണ്.. വേറെ ആരെങ്കിലും ആണെങ്കിൽ ഇപ്പൊ ഒരടി കഴിഞ്ഞേനെ

\"ഈ ചെക്കനിത്.. ഞാൻ പറയാം..\"

\"അങ്ങനെ വേണം നല്ല കുട്ടികൾ ആയാൽ..\"

\"അയ്യെടാ.. മോനാദ്യം മുടിയിൽ നിന്ന് കയ്യെടുക്ക്.. \"

ഞാൻ മുടിയിൽ നിന്ന് കൈ വിട്ട് അവൾ എന്താണ് പറയാൻ പോകുന്നതെന്ന് കേൾക്കാൻ കട്ടിലിൽ നേരെയിരുന്നു

\"അത് നിന്റെ ചേട്ടനെക്കുറിച്ചു പറയാൻ ആയിരുന്നു..\"

\"എന്റെ ചേട്ടനോ.. എപ്പോ തൊട്ടാ അത് എന്റെ മാത്രം ചേട്ടൻ ആയതു...\"

ഞാൻ വെറുതെ ഒരു തമാശക്ക് വേണ്ടി ചോദിച്ചു

\"ദേ ചെക്കാ ഞാൻ പറയണത് ആദ്യം കേൾക്ക്.. അല്ലേ ഞാൻ പോവാ നാളെ ക്ലാസ്സ്‌ ഉള്ളതാ...\"

അവൾ കട്ടിലിൽ നിന്ന് എണീറ്റ് പോകാൻ തുടങ്ങി

എങ്ങനെയൊക്കെയോ പറഞ്ഞു വന്നതായിരുന്നു..വെറുതെ ഓരോന്ന് ചോദിച്ചു നശിപ്പിച്ചു

ഞാൻ വേഗം ചേച്ചിയുടെ കൈ പിടിച്ചു കട്ടിലിൽ ഇരുത്തി

\"ഞാൻ ഒന്നും ഇടയിൽ കേറി പറയില്ലിനി.. ചേച്ചി ബാക്കി പറ..\"

\"പറയാൻ മാത്രം ഒന്നുമില്ല.. നിന്റെ ചേട്ടന്റെ കല്യാണം കഴിഞ്ഞു..\"

ചേച്ചി പറഞ്ഞ കാര്യം കേട്ട് ഞാൻ ശെരിക്കും ഞെട്ടിപ്പോയി.. പക്ഷെ അതിനേക്കാൾ എന്നെ അത്ഭുതപ്പെടുത്തിയത് ചേച്ചിയുടെ ഭാവം ആയിരുന്നു

വളരെ കൂൾ ആയിട്ട് ആണ് അവൾ എന്റെ ചേട്ടനെക്കുറിച്ചു സംസാരിച്ചത്

ഒരു തരി വിഷമം പോലും എനിക്കാ മുഖത്തു കാണാൻ കഴിഞ്ഞില്ല

\"ജോ..?

ചേച്ചിയെ തന്നെ നോക്കി വാ പൊളിച്ചിരിക്കുന്ന എന്നെ അവൾ  തട്ടി വിളിച്ചു

\"സത്യം ആണോ പറഞ്ഞെ.. ചുമ്മാ കളിപ്പിക്കല്ലേ..\"

എങ്ങനെയൊക്കെയോ ഞാൻ പറഞ്ഞൊപ്പിച്ചു

മറുപടിയായി എന്റെ രണ്ടു കയ്യും അവളുടെ കയ്യിൽ പിടിച്ചവൾ പറഞ്ഞു

\"സത്യം ആണ് ജോ..ജോയലേട്ടൻ കല്യാണം കഴിച്ചു..അവന്റെ തന്നെ കോളേജിലെ ഏതോ ജൂനിയർ കൊച്ചിനെ... അത് കഴിഞ്ഞിട്ടിപ്പോ ഒരാഴ്ചയായി..\"

\"നിനക്ക് വിഷമമില്ലേ ചേച്ചി...?

ഞാൻ ചോദിച്ചു.. ഒരു തരം നിർവികാര ഭാവം ആയിരുന്നു എനിക്കപ്പോ

\"ഒണ്ട്..അത് നിന്റെ ചേട്ടൻ കല്യാണം കഴിച്ചത് കൊണ്ടല്ല.. ഇനി നിങ്ങളെയൊക്കെ വിട്ട് എനിക്ക് പോണ്ടേ..\"

എന്നെനോക്കി ചിരിക്കാൻ ശ്രമിച്ചുകൊണ്ട് ചേച്ചി പറഞ്ഞു.. അവളുടെ കണ്ണൊക്കെ ചെറുതായി നിറഞ്ഞിരുന്നു

\"എവിടേക്ക് പോകാൻ..?

മനസിലാവാതെ ഞാൻ ചോദിച്ചു.. അതിനവൾ ചിരിച്ചു കൊണ്ട് പറഞ്ഞു

\"ഇനി ഞാൻ എങ്ങനെയാ ജോ ഇവിടെ നിൽക്കുന്നെ.. എന്ത് പറഞ്ഞു നിൽക്കും.. ഇന്നലെ വരെ പറയാൻ ഒരു കാരണം ഉണ്ടായിരുന്നു.. ജോയലിന്റെ പെണ്ണ് ആണെന്ന്.. ഇന്നോ..\"
                                                     -തുടരും