മയക്കുവെടി ( കവിത)
----------------------------
@ രാജേന്ദ്രൻ ത്രിവേണി 

എന്നാണൊരു മയക്കുവെടി- യെന്നിൽത്തറയ്ക്കുക?
എന്നാണൊരു ഡാർട്ടിന്റെ മുന
ചീറ്റിയെത്തുക?
നാഡികളെന്നാണു മരവിച്ചു പോവുക,
ഏതുവൻകാടിന്റെ ഉള്ളിലാണെത്തുക?

സർവസ്വാതന്ത്ര്യത്തിന്റിരുൾക്കാടുവിട്ട് 
സൂര്യപ്രകാശത്തിന്റെ 
പൊയ്മുഖച്ചുറ്റതിൽ
കാവൽ സൈന്യത്തിന്റെ 
ശരമുനക്കോട്ടയിൽ
വഴിതേടിയലയുവോൻ!
 
നിറമുള്ള വെയിൽകൊണ്ടു കണ്ണുകലങ്ങിയോർ...
ഹൃദയരക്തത്തിന്റെ
നിറമറിയാത്തവർ;
ഹിംസ്ര മൃഗത്തിനെ പേടിച്ചരണ്ട പോൽ
ആട്ടിയോടിക്കാൻ പറകൊട്ടി നില്ക്കവേ;

ചതിവിന്റെ കലയാടി മേയുന്ന
നാട്ടുപ്രമാണിമാർ, കല്പിച്ചരുളിടും
ശക്തമാം ഡാർട്ടിന്റെ രാസായനക്കൂട്ടു
വെടിവെച്ചു കേറ്റും വിദഗ്ധനെ
വേഗം വരുത്തുക, നിറയൊഴിച്ചീടുക,
മയക്കം വിടുംമുമ്പു കാടകം തള്ളുക!

വീണ്ടുമെൻ ദീനമാം ചിഹ്നം വിളികളീ
നാടിന്റെയുള്ളിൽ മുഴങ്ങാതിരിക്കുവാൻ
കാടിന്റെ ഭീതമാം രൗദ്രമൗനങ്ങളിൽ
ശിലകെട്ടിയാഴ്ത്തിരസിച്ചാശ്വസിച്ചിടാം!
ജീവത്പ്രവാഹത്തിന്റെ ആർജിത വീര്യമേ
ശൂന്യമോ നിന്നിലെ സാത്വിക ഭാവന?


(ഡാർട്ട്= എറിയുകയോ വെടിവയ്ക്കുകയോ ചെയ്യുന്ന ഒരു ചെറിയ ഇടുങ്ങിയ കൂർത്ത മിസൈൽ)
മയക്കുവെടിവെക്കാനുപയോഗിക്കുന്ന മരുന്നു നിറച്ച കൂർത്ത സൂചി.