സോക്രട്ടീസ്
  -----------------
*\'ഹെംലക്ക്\' വീര്യമൊരു  
ഹർഷോന്മാദമായെൻ 
രസനയിലലിയുമ്പോൾ;

നിത്യ സത്യമാം മൃത്യുവെൻ
കോശാന്തരങ്ങളിലൊരു
സാന്ത്വന ശ്രുതിമീട്ടുമ്പോൾ;

ഞാനറിയാതെന്റെ ആത്മതേജസ്സൊരു
യാത്രാമൊഴി ചൊല്ലുന്നുവോ?

ഇതുമരണമല്ല, നിയത
കർമകാണ്ഡത്തിന്റെ
പുതു കർമഭൂമി തേടും പ്രയാണം!

വിലപിക്കവേണ്ട സഖാക്കളേ 
ഇതു ശിക്ഷയല്ല, കൂടു മാറ്റുന്നൊരു ശുഭനിമിഷം!

ദ്രോഹിയായ്, ശത്രുവായ്,
ഉഗ്രവിഷം തുപ്പും സർപ്പമായെന്നെ
വെറുതെ കളിയാക്കിയോർ;

ശത്രുക്കളല്ല, ശുദ്ധാത്മാക്കൾ;
സ്വന്തമറിവിൻ ചെറുചിപ്പിയിൽ
വിശ്വവിശാലത കണ്ടറിയാത്തവർ!

എന്റെ മരണവൃത്താന്തമൊരു
ശീതനിലാത്തണലായ് പരക്കുകിൽ
അതുതന്നെ ഇജ്ജന്മസുകൃതം!

        .............................


• സോക്രട്ടീസിന് കൊടുത്ത വിഷം.