🌺തുളസിക്കതിർ 🌺 ഭാഗം...2

തുളസിയുടെ ഓർമ്മകൾ 10 വർഷം പിന്നിലേക്ക് സഞ്ചരിച്ചു.....

 ദാവണിയുടെ തുമ്പ് ഒരല്പം പൊക്കി.. ശബ്ദം ഉണ്ടാക്കാതെ തുളസി ശ്രീഹരിയുടെ റൂമിലേക്ക് പ്രവേശിച്ചു... അവൻ മുറിയിൽ തിരിഞ്ഞിരിക്കുകയാണ്.... പിന്നിൽ നിന്നും വന്ന തുളസിയെ അവന് കാണാൻ കഴിയില്ല എന്ന് അവൾക്കു ഉറപ്പായിരുന്നു..പക്ഷേ അവളുടെ സാന്നിധ്യം അവൻ തിരിച്ചറിഞ്ഞിരുന്നു... വീൽചെയറിൽ ഇരുന്ന് എന്തോ കുത്തിക്കുറിക്കുകയാണ് ശ്രീ... അവൾ ശബ്ദമുണ്ടാക്കാതെ അവന്റെ കൈപ്പട പുസ്തകങ്ങൾ നിരത്തി വെച്ചിരിക്കുന്ന ഷെൽഫിന് അരികിലേക്ക് നീങ്ങി.....


\" നിന്നോട് എത്ര തവണ പറഞ്ഞിട്ടുണ്ട് തുളസി ആരുമില്ലാത്തപ്പോൾ ഇങ്ങോട്ടേക്ക് വരരുതെന്ന്.....\"

 എഴുതുന്നതിനിടയിൽ മുഖമുയർത്തി പിന്നിലേക്ക് തല അല്പം ഒന്ന് ചെരിച്ച് തുളസിയോട് ശ്രീ ചോദിച്ചപ്പോൾ തുളസി ശരിക്കും അത്ഭുതപ്പെട്ടു.....

\" ഞാൻ വന്ന കാര്യം ശ്രീയേട്ടൻ എങ്ങനെ അറിഞ്ഞു..?.. \"നഖം കടിച്ച് ആശങ്കയോടെ അവളത് ചോദിച്ചപ്പോൾ ശ്രീ വീണ്ടും എഴുത്തിലേക്ക് തിരിഞ്ഞു...

 \"നീ വന്ന കാര്യം ഞാൻ അറിയാതിരിക്കണമെങ്കിൽ ആദ്യം നീ ആ കൊലുസ് ഊരി വെക്കണം.... നീ എത്ര പമ്മി എന്റെ മുറിയിലേക്ക് വന്നാലും ആ കൊലുസ് അതിന് സമ്മതിക്കില്ല....\"

 ശ്രീ അത് പറഞ്ഞതും അവൾ കാലിലേക്ക് ഒന്ന് നോക്കി ചമ്മിയ മുഖത്തോടെ നഖം കടിച്ചു .....

\"മം... വന്നതിന്റെ ഉദ്ദേശം എന്താ..?\"
 അല്പം ഗാംഭീര്യം നിറഞ്ഞ ശബ്ദത്തിൽ തുളസിയോട് ശ്രീ ചോദിച്ചു:

\" ശാരദ ഓപ്പോള് പറഞ്ഞിരുന്നു അവരെല്ലാം ഒരു കല്യാണത്തിന് പോവാ... ശ്രീയേട്ടൻ ഇവിടെ ഒറ്റക്കെ ഉള്ളൂ .. അതുകൊണ്ട് ഇടയ്ക്ക് ഒന്ന് വന്നു നോക്കണം എന്ന് .......\"

\" അമ്മ അങ്ങനെ പലതും പറയും എന്നുവച്ച് നിന്നോട് ഇങ്ങോട്ടേക്ക് വരരുതെന്ന് ഞാൻ പറഞ്ഞിട്ടില്ലേ...?.. മനുഷ്യന് മനസ്സമാധാനം തരില്ല എന്ന് ഉറപ്പിച്ചിരിക്കുകയാണോ നീ...\"

 അവൻ അത് പറഞ്ഞതും തുളസിയുടെ കണ്ണുകൾ നിറയാൻ തുടങ്ങി...... തുളസി പതിയെ വന്ന് ശ്രീയുടെ വീൽചെയറിന് അരികിൽ മുട്ടുകുത്തിയിരുന്നു......


\" ഇഷ്ടമുള്ളത് കൊണ്ടല്ലേ ശ്രീയേട്ടാ ഞാൻ ഇടയ്ക്കിടയ്ക്ക് ഓടി വരണേ.... ? ശ്രീയേട്ടൻ എന്താ എന്റെ ഇഷ്ടം മനസ്സിലാക്കാതെ....\"

\" എത്ര തവണ പറഞ്ഞു തുളസി ഞാൻ നിന്നോട്... എനിക്ക് നിന്നെ ഇഷ്ടമല്ല ആ കണ്ണോടെ എനിക്ക് നിന്നെ കാണാൻ കഴിയില്ല എന്ന്....\"

\" അതാ ഞാനും ചോദിക്കണേ എന്താ കണ്ടാല്... ഒന്നുമില്ലങ്കിലും ഞാൻ ശ്രീയേട്ടന്റെ ഉറപ്പാണല്ലോ...? പിന്നെന്താ കുഴപ്പം....?\"

\" എന്നെ വെറുതെ ദേഷ്യം പിടിപ്പിക്കരുത് തുളസി നീയ്... പൊയ്ക്കോ ഇവിടന്ന്...\".

\" ശ്രീയേട്ടൻ ദേഷ്യപ്പെടണ്ട ഞാൻ പൊയ്ക്കോളാം... അതിനുമുമ്പ് ഇത് തരാനാ വന്നത്... \"തുളസി കയ്യിൽ ഉണ്ടായിരുന്ന പുസ്തകം അവന് നേരെ നീട്ടി.... ശ്രീ അത്ഭുതത്തോടെ അവളെ നോക്കി....

\" നോക്കണ്ട ശ്രീയേട്ടൻ എഴുതിയത് തന്നെയാ... ശ്രീയേട്ടൻ അറിയാതെ ഓപ്പോള് എനിക്ക് കുറച്ച് കൈയെഴുത്ത് തന്നിരുന്നു.....\" തുളസി പറയുന്നത് കേട്ടതും ശ്രീ അവളെ ദേഷ്യത്തോടെ നോക്കി....


\" ഇങ്ങനെ നോക്കി പേടിപ്പിക്കേണ്ട... ഇപ്പോൾ ഒന്നുമല്ല കുറെനാൾ മുൻപാ ഓപ്പോള് തന്നത്... ഞാനത് പ്രസിദ്ധീകരണത്തിന് അയച്ചിരുന്നു.... ഇന്നലെ പുസ്തകം കൈ കെട്ടി.... ആദ്യ കോപ്പി ശ്രീയേട്ടൻ വായിക്കണമെന്ന് തോന്നി അതാ കൊണ്ട് തന്നെ.......\"

\" ഞാനിവിടെ നിൽക്കുന്നത് ശ്രീയേട്ടന് ഒരു ബുദ്ധിമുട്ടാണ്ന്ന് അറിയാം അതുകൊണ്ട് പോകുവാ.... \"അത്രയും പറഞ്ഞ് നിറഞ്ഞ മിഴികൾ തുടച്ചുകൊണ്ട് തുളസി ഓടിപ്പോയി.... അവൾ പോയ വഴിയെ അവൻ നോക്കി നിന്നു.... തുളസി കൊണ്ട് തന്ന പുസ്തകത്തിലൂടെ അവൻ വിരലുകൾ ഓടിച്ചു.....

 തന്റെ കൈയെഴുത്തുകൾ ഒരു പുസ്തകമായി മാറണമെന്ന് ഒരുപാട് ആഗ്രഹിച്ചിരുന്നു... ആ വലിയ ആഗ്രഹമാണ് ഇന്ന് തുളസി നിറവേറ്റി തന്നത്... തന്റെ ആദ്യ പുസ്തകം.... 

🌷ഇലഞ്ഞിമരം പൂത്തപ്പോൾ....🌷
✍️ശ്രീഹരി ശ്രീനിവാസൻ.....


 ശ്രീ കൈകളാൽ തന്റെ മരവിച്ച കാലുകളിൽ തഴുകി... ആ കണ്ണുകളിൽ നിന്നും രണ്ടു തുള്ളി കണ്ണുനീർ ഊർന്ന് വീണു.



\"\" അല്ലെങ്കിലും ശ്രീയേട്ടൻ അങ്ങനെയാ എന്നോട് ഒരു ഇഷ്ടവുമില്ല. ഞാൻ ഒരു പൊട്ടി ,പിന്നെയും പിന്നെയും ചെല്ലും.... എന്നെ ഇഷ്ടപ്പെട്ട എന്താ ശ്രീയേട്ടന്... ? അത്ര ഭംഗിയില്ലാത്തവാളാ ഞാൻ. അതോ ശ്രീകൃഷ്ണവിലാസം തറവാട്ടിലെ ശ്രീഹരിക്ക് ഞാൻ ചേരത്തില്ലേ. ? ആ തറവാട്ടിലെ കുട്ടി തന്നെയല്ലേ ഞാനും.. പിന്നെന്താ ശ്രീയേട്ടന് ഇത്ര കുഴപ്പം......?.\"\"

 ഓരോന്നും പറഞ്ഞ് ദാവണി തുമ്പ് പിടിച്ച കറക്കി തുളസി തറവാട്ടിലേക്ക് കയറി..... ഉമ്മറത്തേക്ക് വന്ന തുളസിയുടെ അമ്മ ചന്ദ്രിക അവളുടെ ഈ പെരുമാറ്റം നോക്കിക്കാണുകയായിരുന്നു....


\" എന്താ കുട്ടി നിനക്ക്.... നീയെന്താ ഓരോന്ന് പറഞ്ഞ് ഇങ്ങനെ പൊറു പൊറുക്കണേ.... അല്ല ശ്രീ മോനെ കാണാൻ പോയിട്ട് എന്തായി.....\"

\" എന്താകാൻ എപ്പോഴും പറയണ പോലെ തന്നെ.... എനിക്ക് സൗന്ദര്യം ഇല്ല പോലും.... മുഖം കഴിയുന്നത്ര വീർപ്പിച്ച് തുളസി പറഞ്ഞു. \"

....\"\" അവൻ അങ്ങനെ പറഞ്ഞേ ?\"\".... ചന്ദ്രിക എന്തോ അറിയാനുള്ള ആകാംക്ഷ പോലെ ചോദിച്ചു....

\"\" എന്തിനാ അങ്ങനെ പറയണേ... അതുതന്നെയാ ശ്രീയേട്ടന്റെ മനസ്സിൽ... കെട്ടാൻ വല്ല്യ തിലോത്തമ്മ വരുമല്ലോ...... നോക്കിയിരിക്കട്ടെ... എനിക്കറിയാം അവസാനം എന്റെ അടുത്ത് തന്നെ വരും...\"\" അത്രയും പറഞ്ഞു അവൾ അകത്തേക്ക് കയറിപ്പോയി.......

\"\" ഈ കുട്ടിക്ക് ഇത് എന്താ പറ്റിയെ... ഇവിടുന്ന് പോയപ്പോൾ ഇങ്ങനെ അല്ലായിരുന്നല്ലോ....? \"\"തുളസിയുടെ പോക്ക് കണ്ട് താടിക്ക് കൈയും കൊടുത്ത് ചന്ദ്രിക പറഞ്ഞു...

\"\" നീ എന്തിനാ ചന്ദ്രികേ ഇതൊക്കെ കണ്ട് വ്യാകുലതപ്പെടുന്നത്... ഇത് ഇതിവിടുത്തെ സ്ഥിരം കാഴ്ചയല്ലേ... ? ശ്രീ മോനെ കാണാൻ എപ്പോ പോയാലും ഇതു തന്നെയല്ലേ ഇവിടുത്തെ അവസ്ഥ... \"\"ഇതെല്ലാം കണ്ട് ഉമ്മറത്തേക്ക് ഇറങ്ങി വന്ന മാധവൻ ചന്ദ്രികയോട് പറഞ്ഞു.......

\"\" ഒരു കണക്കിന് അത് നല്ലതാ മാധവേട്ടാ.... തുളസി മോളുടെ മനസ്സ് മുഴുവൻ ശ്രീയാ... പക്ഷെ എന്തൊക്കെ പറഞ്ഞാലും കാലിന് ശേഷിയില്ലാത്ത ഒരുത്തന്റെ കൂടെ നമ്മൾ എങ്ങനെയാ നമ്മുടെ മോളെ പറഞ്ഞുവിടുക....?...\"\"

\" നീ പറഞ്ഞതിലും കാര്യമുണ്ട്.... പക്ഷേ കുട്ടികൾ തമ്മിൽ ഇഷ്ടത്തിലാണെങ്കിൽ അതല്ലേ നടക്കേണ്ടത്.....\"

\" അതിന് ശ്രീമോന് തുളസിയെ ഇഷ്ടം അല്ലല്ലോ...? ..... അവൻ എന്തിനാ എന്റെ കുട്ടിയോട് ഈ ദേഷ്യം കാണിക്കുന്നത് എന്ന് ആർക്കറിയാം.....\"


\" അതെന്തും ആകട്ടെ തുളസി മോൾക്ക് വലിയ പ്രായം ആയില്ലല്ലോ.... മോക്ക് കല്യാണ പ്രായം ആകട്ടെ അപ്പോ ആലോചിക്കാം.... 
 ഇനി ആ സമയത്ത് ശ്രീമോന് തുളസിയെ ഇഷ്ടമാണെങ്കിൽ നമുക്ക് അത് നടത്താം... എന്റെ പെങ്ങൾ ശാരദക്കും അതാ സന്തോഷം.... ഇനി മറിച്ച് ആണെങ്കിൽ അങ്ങനെ........\"

\"മം.. അല്ല മാധവേട്ടൻ ഇതെങ്ങോട്ടാ..?\"ചന്ദ്രിക സംശയത്തോടെ ചോദിച്ചു...


\" ഞാനാ കവല വരെ ഒന്ന് പോയിട്ട് വരാം.. മഴ പെയ്യുന്നു തോന്നുന്നു നീ ആ കുട ഇങ്ങെടുത്ത് താ ചന്ദ്രിക... \"

മുറ്റത്തേക്ക് ഇറങ്ങിയ മാധവൻ മുകളിലേക്ക് നോക്കിയശേഷം ചന്ദ്രകയോട് പറഞ്ഞു....

 ചന്ദ്രിക അകത്തുനിന്നും ഒരു കുട എടുത്തുകൊടുത്തതും മാധവൻ അതുമായി നടന്നകന്നു...

 ശ്രീകൃഷ്ണ വിലാസം തറവാട്ടിലെ ദേവരാജന് രണ്ടു മക്കൾ...മൂത്ത മകൻ ദേവമാധവനും.... ഇളയവൾ ശാരദയും...

 ദേവമാധവനും ഭാര്യ ചന്ദ്രികയ്ക്കും രണ്ടു മക്കൾ.... മൂത്തവൾ തുളസിയും ഇളയവൾ കൃഷ്ണയും...

 ശാരദയ്ക്കും ഭർത്താവ് വാസുദേവനും മൂന്നു മക്കൾ.... മൂത്തവൻ ശ്രീഹരി... ശ്രീഹരിക്ക് ഇളയതായി പിറന്നത് ഇരട്ട കുട്ടികളായിരുന്നു. ... ശ്രീലക്ഷ്മിയും ശ്രീദേവിയും.... 

പെൺകുട്ടികളുടെ ജനനശേഷം അധികം വൈകാതെ തന്നെ ഭർത്താവ് വാസുദേവനും ശ്രീഹരിയും സഞ്ചരിച്ച വാഹനം അപകടത്തിൽ പെടുകയും വാസുദേവൻ മരണപ്പെടുകയും ചെയ്തു... ആ അപകടത്തിൽ ശ്രീഹരിക്ക് നഷ്ടമായത് അവന്റെ കാലുകളായിരുന്നു.... അതിനുശേഷം ശ്രീഹരിക്ക് കൂട്ടായി ഒരു വീൽചെയർ കൂടി വന്നു..... കുടുംബത്തിന് താങ്ങാവേണ്ട താൻ ഓരോ നിമിഷവും അമ്മയ്ക്കും പെങ്ങമ്മാർക്കും ഭാരമായി തീരുകയാണ് എന്ന തോന്നൽ ശ്രീ ഹരിയെ തളർത്തി....... പതിയെ പതിയെ ദേഷ്യം അവനു കൂട്ടായി വന്നു... എല്ലാത്തിനോടും ഒരു തരം വിരക്തിയായിരുന്നു അവന്.


 ശ്രീഹരി തുളസിക്കുള്ളതാണെന്ന് വാസുദേവന്റെ മരണത്തിനു മുൻപേ അവർ പറഞ്ഞു വെച്ചതാണ്..... കളിച്ചു നടന്ന അവരിലും ആ ഇഷ്ടം വളർന്നിരുന്നു.... പക്ഷേ പിന്നീട് ശ്രീഹരിക്ക് വിവാഹത്തെക്കുറിച്ചും കുടുംബജീവിതത്തിനെകുറിച്ചും ആഗ്രഹമില്ലാണ്ടായി..... പക്ഷേ തുളസിയുടെ മനസ്സിൽ നിന്നും ആ ഇഷ്ടം പോയതുമില്ല....


\"\" എന്താ ചേച്ചി ഒരു മൂകഭാവം....\" മുറിയിലെ ബെഡിൽ കമിഴ്ന്നു കിടക്കുന്ന തുളസിക്കാരിലേക്ക് വന്ന കൃഷ്ണ ചോദിച്ചു....

\" ഒന്നുമില്ലെടി ഒരു തലവേദന....\" തുളസി എങ്ങനെയോ പറഞ്ഞു ഒപ്പിച്ചു....

\" ഈ തലവേദന ശ്രീയേട്ടൻ അല്ലേ...?.... ചേച്ചി ഇന്ന് അവിടെ പോയിരുന്നു അല്ലേ....\"

 തുളസിയോടൊപ്പം ബെഡിൽ ഇരിന്നുകൊണ്ട് കൃഷ്ണ ചോദിച്ചു....

\" നിനക്ക് എങ്ങനെ മനസ്സിലായി\".... തുളസി ഗൗരവത്തോടെ കൃഷ്ണയോട് ചോദിച്ചു...

 \"അതിപ്പോ മനസ്സിലാക്കാൻ എന്തിരിക്കുന്നു.... ചേച്ചി അവിടെ പോയി , ശ്രീയേട്ടൻ വഴക്ക് പറഞ്ഞു.. അവിടം മുതൽ ഇവിടെ വരെ ശ്രീയേട്ടനെ കുറ്റവും പറഞ്ഞു കൊണ്ട് തിരിച്ചുവന്നു.... ദാ ഇപ്പോൾ മുറിയിലെ കട്ടിലിൽ കമന്ന് കിടന്ന് സങ്കടപ്പെടുന്നു ..... വർഷം അഞ്ചാറായി ചേച്ചി ഞാനിത് തന്നെ കാണാൻ തുടങ്ങിയിട്ട്....\"


\" ശ്രീയേട്ടന് എന്നെ ഇഷ്ടമല്ലേടി.. ഞാൻ എന്ത് ചെയ്തിട്ടാ...ഇനി ഞാൻ ശ്രീയേട്ടന് കൊടുത്ത സ്നേഹം കുറഞ്ഞു പോയോ.... അതോ ഇനി ശ്രീയേട്ടന്റെ മനസ്സിൽ ആരെങ്കിലും കാണുമോ....\"

 വിഷാദ ഭാവത്തോടെ പറയുന്ന തുളസിയെ കണ്ടതും കൃഷ്ണ അവളുടെ മുഖം പിടിച്ചുയർത്തി....

\" അയ്യേ ചേച്ചി എന്തിനാ അങ്ങനെ ചിന്തിക്കുന്നത്... ശ്രീയേട്ടന്റെ മനസ്സിൽ ചേച്ചി അല്ലാതെ വേറെ ആരുണ്ടാകാനാ.....?..... നമുക്കറിയാത്ത ആളല്ലല്ലോ ശ്രീയേട്ടൻ.... പണ്ട് ഇങ്ങനെ അല്ലായിരുന്നല്ലോ... ഇപ്പോ പാതി ശരീരം പോലെ ആ മനസ്സും തളർന്നു പോയിട്ടുണ്ട്... അതിന്റെ ദേഷ്യ ഈ കാണിക്കുന്ന....\"

\" അതൊക്കെ എനിക്കറിയാം.... ഒന്നും വേണ്ട എനിക്ക്... ഒരു താലികെട്ടി എന്നെ കൂടെ കൂട്ടിയാൽ മാത്രം മതി... ഞാൻ നോക്കിക്കോളാം പൊന്നുപോലെ... ഈ ആയുസ്സ് മുഴുവൻ എനിക്കെന്റെ ശ്രീയേട്ടനെ കണ്ടോണ്ടിരുന്നാൽ മാത്രം മതി.....\"

\" ചേച്ചി നോക്കിക്കോ ചേച്ചിയുടെ സ്നേഹം ശ്രീയേട്ടൻ തിരിച്ചറിയും... അതുറപ്പാ...\"

 തുളസിയുടെ കയ്യിൽ പിടിച്ച് കൃഷ്ണ അത് പറഞ്ഞപ്പോൾ അവൾക്ക് തെല്ലൊരാശ്വാസം തോന്നി....

🌺🌺🌺🌺🌺

 പുസ്തകത്തിലെ അവസാന വരിയും വായിച്ചു കഴിഞ്ഞപ്പോൾ ശ്രീയുടെ കണ്ണുകളിൽ നിന്നും രണ്ടു തുള്ളി താഴേക്ക് പതിച്ചു.... തന്റെ അക്ഷരങ്ങൾക്ക് ജീവൻ നൽകിയവളാണ് തുളസി..... പ്രാണനായിരുന്നു അവൾ തനിക്ക് തന്റെ ജീവന്റെ പാതിയായി കണ്ടവളാണ്..... പക്ഷേ എന്തൊക്കെ പറഞ്ഞാലും ഇനി ഒരു ജീവിതം അവരുടെ കൂടെ ഉണ്ടായിരിക്കില്ല....

 എന്തെല്ലാമോ ആലോചിച്ച് അതേ ഇരിപ്പ് തുടരുന്നതിനിടയിലാണ് തോളിൽ ഒരു തണുത്ത സ്പർശം അറിഞ്ഞത്.... തലചരിച്ചു നോക്കിയപ്പോൾ ശാരദയാണ്.....

 \"അമ്മ എന്താ ഇത്ര നേരത്തെ പോന്നേ.... ?കല്യാണം കൂടിയില്ലേ...? \"അപ്പോഴേക്കും പിന്നിലായി ശ്രീലക്ഷ്മിയും ശ്രീദേവിയും വന്ന് നിന്നിരുന്നു....

\" അമ്മ അതിന് സമ്മതിച്ചില്ല ഏട്ടാ.... ഏട്ടൻ ഇവിടെ ഒറ്റയ്ക്കാ എന്നും പറഞ്ഞ് കല്യാണം കഴിഞ്ഞതേ ഇങ്ങു പോന്നു..... ചേച്ചിയോട് ഒന്ന് സംസാരിക്കാൻ പോലും നിന്നില്ല.....\"

\" മിണ്ടാതിരുന്നോ നിങ്ങള്..... എന്റെ കുട്ടി ഇവിടെ ഒറ്റയ്ക്ക് ഇരിക്കുമ്പോൾ ഞാനെങ്ങനെ കല്യാണത്തിന് പോയി മനസമാധാനത്തോടെ നിൽക്കുക.... നിങ്ങടെ അച്ഛന്റെ പെങ്ങടെ മോളുടെ കല്യാണം ആയതുകൊണ്ട് മാത്രമാ ഞാൻ പോയത്... നിങ്ങടെ അച്ഛൻ മരിച്ച ശേഷം ആരും ഇങ്ങോട്ടേക്ക് തിരിഞ്ഞു നോക്കിയിട്ടില്ല:.പോകണ്ട എന്ന് കരുതിയതാ ഞാൻ.... പിന്നെ ഇവൻ നിർബന്ധിച്ചത് കൊണ്ട് മാത്രം പോയതാ....\"\"

 ശാരദ ഇരുവരെയും നോക്കി ദേഷ്യത്തോടെ പറഞ്ഞു......

\" അമ്മയ്ക്ക് ഞാനൊരു മനസമാധാനക്കേടാ അല്ലേ....?..... \"ശ്രീ ചോദിക്കുന്നത് കേട്ടതും ശാരദ ഒരു പകപോടെ അവനെ നോക്കി....

\" എന്താ എന്റെ കുട്ടിയെ ഈ പറയണേ... എനിക്ക് നീ സമാധാനക്കേടോ....?.....\"

\" അച്ഛൻ പോയപ്പോൾ കൂടെ ഞാനും പോയാൽ മതിയായിരുന്നു അല്ലേ അമ്മേ... നിങ്ങൾക്ക് ഒരു ബുദ്ധിമുട്ട് ആകില്ലായിരുന്നല്ലോ അപ്പോ ഞാൻ.... അമ്മേ ഒരുപാട് കഷ്ടപ്പെടുത്തുന്നില്ലേ ഞാൻ.... എന്തിനാ എന്നെ ഇങ്ങനെ നോക്കണേ... എന്തെങ്കിലും തന്ന് എന്നെ അങ്ങ് അവസാനിപ്പിച്ചൂടേ അമ്മയ്ക്ക്......\"

\"\" ശ്രീമോനെ... നീ നിർത്തിക്കോ... പറഞ്ഞുപറഞ്ഞ് എന്തുമാകാം എന്ന് ആയോ നിനക്ക്.... പെറ്റ വയറിന്റെ സങ്കടം അത് നിനക്ക് പറഞ്ഞാൽ മനസ്സിലാകില്ല.... ദേവേട്ടൻ പോയപ്പോൾ പാതി ജീവനോടെ ആണെങ്കിലും നിന്നെ എനിക്ക് തിരിച്ചു കിട്ടിയല്ലോ എന്നതായിരുന്നു എന്റെ ആശ്വാസം.... കൊന്നുകളയാൻ ആ അമ്മയോട് തന്നെ നീ പറയരുത്...\"\". ശാരദ സാരി തുമ്പു കൊണ്ട് കണ്ണീര് തുടച്ചു കൊണ്ട് പറഞ്ഞു.

 \"\"അയ്യേ അമ്മ കരയാ.... ഏട്ടൻ ഒരു തമാശ പറഞ്ഞതല്ലേ....? അല്ലേ ഏട്ടാ... \"\"ശ്രീലക്ഷ്മി ശാരദയുടെ തോളിലായി പിടിച്ചു കൊണ്ട് പറഞ്ഞതും ശ്രീഹരിയെ ഒന്നു നോക്കിയശേഷം ശാരദ മുറിവിട്ട് വെളിയിലേക്ക് പോയി..... ശാരദയ്ക്ക് പിന്നാലെ ശ്രീദേവിയും നടന്നു.

 \"\"എന്തിനാ ഏട്ടാ ഇങ്ങനെയൊക്കെ പറയണേ.... ഞങ്ങളെ വേണ്ടതായോ ഏട്ടന് ....?...\" ഉള്ളിലെ വിഷമം മറച്ചുപിടിച്ച് ശ്രീലക്ഷ്മി ചോദിച്ചു....

\" അതല്ല മോളെ... നിങ്ങൾക്കൊക്കെ ഭാരമായിട്ട് എത്ര കാലം എന്ന് വെച്ചാ ഞാൻ....\"

\" ഏട്ടൻ ചുമ്മാ ഓരോന്ന് സങ്കൽപ്പിച്ചു കൂട്ടുന്നതാ.. ഏട്ടൻ എങ്ങനെയാ ഞങ്ങൾക്ക് ഭാരമാകുന്നത്.... പിന്നെ ഏട്ടാ തുളസി ചേച്ചി വന്നിരുന്നോ?\"

\" വന്നിരുന്നു... നിങ്ങളോട് ഞാൻ പറഞ്ഞിട്ടില്ലേ നിങ്ങൾ എവിടെ എങ്കിലും പോകുമ്പോൾ അവളെ എന്നെ നോക്കാൻ ഏൽപ്പിക്കരുത് എന്ന്.. ഇനി മേലാൽ നിങ്ങൾ ഇത് ആവർത്തിക്കരുത്....\"

\" ഏട്ടൻ എന്തിനാ തുളസി ചേച്ചിയോട് ഇത്ര ദേഷ്യം.... അതൊരു പാവമല്ലേ....? ഏട്ടനെ ഒത്തിരി ഇഷ്മാ അതിന്....\"


\" ഇഷ്ടം... ആ ഇഷ്ടം എനിക്ക് വേണ്ട എന്നാ ഞാൻ പറഞ്ഞത്.. അവൾക്ക് എന്നോടുള്ള ഇഷ്ടംപോലും ഒരു സഹതാപമാ.... ആ സഹതാപം എനിക്ക് ആവശ്യമില്ല.....\"

\" ഞാൻ ഇനി ഒന്നും പറയുനില്ല... ഏട്ടന്റെ തലയിലേക്ക് ഒന്നും കയറില്ല.... ഏട്ടൻ വാശിയും വെച്ചുകൊണ്ടിരുന്നോ... ഒടുവിൽ നല്ലൊരുത്തൻ തുളസി ചേച്ചിയെ മംഗലം കഴിച്ച് കൊണ്ട് പോകും... അപ്പോ നോക്കിയിരുന്ന് സങ്കടപ്പെടാതിരുന്നാൽ മതി....\"

അത്രയും പറഞ്ഞ് ശ്രീലക്ഷ്മി പോകാൻ ഒരുങ്ങിയതും അവൻ അവളുടെ കയ്യിൽ കയറി പിടിച്ചു...

\" എനിക്ക് ഒന്ന് കിടക്കണം നീ എന്നെ ഒന്ന് പിടിക്കുമോ....?.... \"

ശ്രീലക്ഷ്മി അവനെ വീൽചെയറിൽ നിന്നും കട്ടിലിലേക്ക് കിടത്താൻ സഹായിച്ചു.... അവന്റെ കണ്ണുകൾ നിറയുന്നത് ശ്രീലക്ഷ്മി ശ്രദ്ധിക്കുന്നുണ്ടായിരുന്നു.... അവൻ കൈകൾ എടുത്ത് കണ്ണുകൾക്ക് മുകളിൽ വച്ച് ഒന്നും മിണ്ടാതെ കിടന്നു...... അവന്റെ കിടപ്പ് കണ്ടതും ശ്രീലക്ഷ്മിയുടെ ചങ്കൊന്നു പിടഞ്ഞു.... അവൾ ഒന്നും മിണ്ടാതെ മുറിവിട്ട് പുറത്തേക്ക് പോയി....

തുടരും...