🍁അനന്തഭദ്രം🍁 ഭാഗം 19

\"സാറിന് എന്നെ മനസ്സിലായോ... ഞാനാ ഈ വീടിന്റെ ഉടമസ്ഥൻ മഹേശ്വരൻ...\"

 ഒട്ടും ജാളിതയില്ലാതെ മഹേശ്വരൻ പറഞ്ഞു നിർത്തിയതും രുദ്രൻ ഒരു പുഞ്ചിരിയോടെ അയാളെ അകത്തേക്ക് ക്ഷണിച്ചു.... വീടിനുള്ളിലേക്ക് കയറിയതും ഫോറിൻ മദ്യത്തിന്റെ രൂക്ഷഗന്ധം അയാളുടെ നാസികയിലേക്ക് തുളച്ചുകയറി....

\"\" ഇരിക്കു....\"\" മുന്നിലുണ്ടായിരുന്ന ചെയർ വലിച്ചിട്ടു കൊണ്ട് രുദ്രൻ ആവശ്യപ്പെട്ടതും മഹേശ്വരൻ ചെയറിലേക്ക് പതിയെ അമർന്നു... അയാൾക്ക് തൊട്ടരികിലായി രുദ്രനും സ്ഥാനം പിടിച്ചു...

 \"\'എന്റെ പൊന്നു സാറേ... സത്യമായിട്ടും അനന്തൻ കൊണ്ടുവന്നതുകൊണ്ടാ ഞാൻ ഈ വീട് ആദ്യം കൊടുക്കുന്നില്ല എന്ന് പറഞ്ഞത്... അവൻ എന്റെ വാക്ക് കേട്ടില്ല... അത് വേറെ കാര്യം....\"\"

 രുദ്രൻ സംശയത്തോടെ മഹേശ്വരനെ നോക്കി...

\"\" അയ്യോ അതിൽ സാറ് ഇത്ര അത്ഭുതപ്പെടാൻ ഒന്നുമില്ല .എന്റെ ഭാര്യ സുഭദ്രയുടെ പേരിൽ ആണ് ഈ വീട്... അവളോട് സമ്മതം വാങ്ങിയാ അനന്തൻ സാറിനെ ഈ വീട്ടിലേക്ക് കൊണ്ടുവന്നത്.... \"\"

\"\"അത് അവിടെ നിൽക്കട്ടെ.... വന്നു കയറിയവനെ നാലാം നാൾ ഇവിടുന്ന് അടിച്ച് ഇറക്കണം എന്ന് തന്നെയാണ് ഞാൻ കരുതിയത്.... പക്ഷേ അപ്പോഴല്ലേ അറിഞ്ഞത് രുദ്രദേവ് കൺസ്ട്രക്ഷൻ ഗ്രൂപ്പ് ഓഫ് ബിൽഡേഴ്സിന്റെ ഉടമ രുദ്രദേവാണ് വന്നതെന്ന്........ സാറിനെ പോലെയുള്ള ഒരാൾക്ക് അല്ലാതെ വേറെ ആർക്കാണ് ഞങ്ങൾ വീട് കൊടുക്കുക....\"\"


 മഹേശ്വരന്റെ വർത്തമാനം കേട്ട് രുദ്രൻ അറിയാതെ ചിരിച്ചു പോയി....

\"\" സാറിനെ പോലെ ഒരാളുടെ സ്ഥാപനം നമ്മുടെ നാട്ടിൽ വരുക എന്നു പറഞ്ഞാൽ അത് ചില്ലറ കാര്യമാണോ...? ഇവിടുത്തെ കർഷക തൊഴിലാളി വർഗ്ഗങ്ങൾ ചിലപ്പോൾ അതിനോട് എതിർക്കും.... പക്ഷേ പോകാൻ പറ സാറേ...\"

 മഹേശ്വരൻ ഓരോന്ന് പറയുമ്പോഴും തനിക്ക് കിട്ടിയ ഇരയെ സന്തോഷത്തോടെ നോക്കി കാണുകയായിരുന്നു രുദ്രൻ....

\"\" കുറച്ചു ഫോർമാലിറ്റീസ് ഉണ്ട്.. അത് തീർത്താൽ ഉടൻ തന്നെ പ്രോജക്ട് സ്റ്റാർട്ട് ചെയ്യും....\'\'

 \"\"മഹേശ്വരൻ എന്നല്ലേ പേര് പറഞ്ഞത്...?\"\"

\"\" അതേ സാറേ...\"

\"\" അല്ല തനിക്ക് കാര്യങ്ങളെല്ലാം എങ്ങനെ ഇത്ര വ്യക്തമായി അറിയാം....?.. എല്ലാം കറക്റ്റ് ആയിട്ട് പറയുന്നുണ്ടല്ലോ ..?\"\"

 അതിന് മഹേശ്വരൻ ഒന്ന് പുഞ്ചിരിച്ചു... \"\"എന്റെ മനസ്സിലും ഉണ്ട് സാറേ... ഇങ്ങനെ കുറെ പദ്ധതികൾ... പക്ഷേ തള്ളയും മോളും സമ്മതിക്കേണ്ടേ...?\"\"

\"\" ഏത് ഭദ്രയുടെ കാര്യമാണോ താനി പറയുന്നത്...?\"\"

\"\" ആ അത് തന്നെ... അല്ല അവളെ സാറിന് എങ്ങനെ അറിയാം...\"\'?

\"\" അതോ..അനന്തന്റെ കൂടെ ആദ്യദിവസം ആ കുട്ടി ഇവിടെ വന്നിരുന്നു... പിന്നീട് കണ്ടതേയില്ല...\"\"

\"\' ഓഹോ അതിനിടയിൽ അങ്ങനെയും സംഭവിച്ചോ? അവന്റെ കൂടെ ഊര് തേണ്ടി നടക്കൽ ആണല്ലോ അവളുടെ പണി.....\"\"


 കുറച്ച് സമയം കൊണ്ട് തന്നെ രുദ്രനും മഹേശ്വരനും നല്ലതുപോലെ അടുത്തു... ഈ സമയം കൊണ്ട് തന്നെ ഭദ്ര സുഭദ്രയുടെ ഒന്നാം കെട്ടിലുള്ള കുട്ടിയാണെന്നും... ഭദ്രയോട് അയാൾക്ക് വലിയ താല്പര്യമില്ല എന്നും... താൻ എന്താവശ്യപ്പെട്ടാലും കാശിനു വേണ്ടി മഹേശ്വരൻ അത് നടത്തി തരും എന്നും രുദ്രൻ തിരിച്ചറിഞ്ഞു.... രുദ്രന് കിട്ടിയ ഏറ്റവും വലിയ പിടിവള്ളി ആയിരുന്നു മഹേശ്വരൻ.....

🍁🍁🍁🍁🍁

\"\" ആ സംഭവത്തിനുശേഷം ഭാമ എന്നോട് മിണ്ടിയിട്ടില്ല... ഞാൻ സംസാരിക്കാൻ ചെല്ലുമ്പോൾ എന്നോട് ദേഷ്യപ്പെടും.... അനന്തേട്ടൻ എന്നിൽ നിന്നും എന്തെല്ലാമോ ഒളിക്കുന്നുണ്ട് പറ അനന്തേട്ടാ....\"\"

അനന്തനെ ഇടം വലം വിടാൻ സമ്മതിക്കാതെ കഴിഞ്ഞുപ്പോയ സംഭവത്തിന്റെ രഹസ്യം അറിയാൻ ശ്രമിക്കുകയാണ് ഭദ്ര...

\"\" എനിക്കറിയില്ല ഭദ്രേ... നിന്നെ കാണാഞ്ഞിട്ട് കാവിലേക്ക് വന്നപ്പോഴാണ് നിന്റെ അപ്പച്ചിയും ഭാമയും സംസാരിച്ചു നിൽക്കുന്നത് കണ്ടത് ....അപ്പോഴാ നിന്നെ ആ സർപ്പങ്ങളുടെ കാവിലേക്ക് അവർ പറഞ്ഞു വിട്ടിട്ടുണ്ട് എന്ന് ഞാൻ അറിഞ്ഞത്... പിന്നെ കൂടുതൽ ഒന്നും ചോദിക്കാൻ ഞാൻ നിന്നില്ല ...നിന്റെ മുഖം മാത്രമായിരുന്നു എന്റെ മനസ്സിൽ....\"\'

 \"\"എന്നോട് കള്ളം പറയാൻ ശ്രമിക്കേണ്ട അനന്തേട്ടാ.... അനന്തേട്ടൻ എന്താ അവിടെ കേട്ടത്.... എന്നോട് കള്ളം പറഞ്ഞാൽ പിന്നെ ഞാൻ മിണ്ടില്ല....\"\"\"

 അവളുടെ അവസാന വാചകത്തിൽ അനന്തൻ ഒന്നു കുഴഞ്ഞു... പറഞ്ഞാൽ പറഞ്ഞതുപോലെ ചെയ്യുന്ന പെണ്ണാണ് ..മിണ്ടില്ല എന്ന് പറഞ്ഞാൽ പിന്നെ മിണ്ടില്ല... ഇതു തന്നെ കൊണ്ട് താങ്ങുകയുമില്ല....

\"\" ഭദ്ര അത് പിന്നെ.... നീ അവളോട് ചോദിക്കുക ഒന്നും വേണ്ട.... സുഭദ്രാപ്പച്ചിയോട് പറയുകയും വേണ്ട...\"\"

 \"\"അപ്പോ എന്തോ കാര്യമായിട്ടുണ്ട്... എനിക്കറിയണം പറ അനന്തേട്ടാ..\"\'. ഭദ്ര അനന്തന്റെ ഷർട്ടിൽ പിടിമുറുക്കി...

\"\" അവൾ കുട്ടിയല്ലേ ഭദ്ര....? പ്രായത്തിന്റെ ഓരോരോ മണ്ടത്തരങ്ങൾ.... അവൾക്ക്...\"\'

 \"അവൾക്ക്...? \"\'ഭദ്ര സംശയത്തോടെ അനന്തനെ നോക്കി....

\"\" അവൾക്ക് എന്നോട് ചെറിയൊരു ഇഷ്ടം.... ആ ഇഷ്ടത്തിന് പുറത്താ അവൾ..\"\"

 ഭദ്ര ഒരു നിമിഷത്തേക്ക് തറഞ്ഞുനിന്നു. കേട്ട വാർത്ത സത്യമായിരിക്കരുതേ എന്ന് ഒരു നിമിഷത്തേക്ക് അവൾ ആഗ്രഹിച്ചു ... ഒരു ശില കണക്കെ നിൽക്കുന്ന ഭദ്രയെ അനന്തൻ ചേർത്തുപിടിച്ചു...

\"\" നെല്ലും പതരും തിരിച്ചറിയാത്ത പ്രായമല്ലേ അവൾക്ക്.... അതുകൊണ്ട് ചെയ്തു പോകുന്നതാ ഓരോന്നും... നമ്മളല്ലേ അതെല്ലാം ക്ഷമിക്കേണ്ടത്.... നീ ഇത് അറിഞ്ഞതായിട്ട് പോലും നടിക്കേണ്ട... നീ അറിഞ്ഞു എന്ന് അറിഞ്ഞാൽ ചിലപ്പോൾ ഭാമയ്ക്ക് നിന്നെ അഭിമുഖീകരിക്കാൻ ബുദ്ധിമുട്ടുണ്ടാകും....\"\"

\"\" അനന്തേട്ടാ എന്നാലും ....അവള് അനന്തേട്ടനെ... എനിക്ക് വിശ്വസിക്കാൻ പോലും കഴിയുന്നില്ല...\"\"

 അനന്തൻ ഒന്നും മിണ്ടാതെ ഭദ്രേ ചേർത്ത് പിടിച്ചു... അത് ഭദ്രകാശ്വാസം പകർന്നു.. അനന്തന്റെ മുറിയിലേക്ക് കയറിവന്ന ഗായത്രി ഈ കാഴ്ച കണ്ട് നാണത്തോടെ തലചരിച്ചു....

\"\' അനന്തൂട്ടാ\"\".... ഗായത്രി വിളിച്ചതും ഇരുവരും പരസ്പരം ആകുന്നു നിന്നു... ഭദ്ര ഗായത്രി കാണാതെ കണ്ണുനീർ തുടച്ചുമാറ്റി...

 \"\"അമ്മ എന്താ ഇവിടെ....?.\"\"... അനന്തൻ ചമ്മലോട് ചോദിച്ചു....

\"\" അതവിടെ നിൽക്കട്ടെ... ഭദ്രമോൾ എന്താ ഇവിടെ...? നീ വന്നിട്ട് നേരെ അനന്തൂട്ടന് അടുത്തേക്ക് പോന്നു അല്ലേ. ? അനന്തൂട്ടൻ ഇല്ലാത്തപ്പോൾ ഓടിവന്ന് എന്നെ കെട്ടിപ്പിടിക്കുന്ന പെണ്ണാ..\"\"..ഗായത്രി അത് പറഞ്ഞതും അനന്തനും ഭദ്രയും പരസ്പരം നോക്കി....

 ഗായത്രി ഭദ്രക്കരിക്കിലേക്ക് നീങ്ങി നിന്നു...

\"\" അയ്യേ ഞാൻ ചുമ്മാ പറഞ്ഞതല്ലേ... എന്റെ മക്കൾ രണ്ടുപേരുടെയും സ്നേഹം ഒരിക്കലും കുറയരുത്... ഇതുപോലെ ജീവിതാവസാനം വരെ രണ്ടുപേരും പരസ്പരം ചേർന്ന് നിൽക്കണം.... എന്റെ കുട്ടികളെ കണ്ടിട്ട് എല്ലാവർക്കും കുശുമ്പ് തോന്നണം....\"\"

 ഭദേ ചേർത്ത് പിടിക്കുന്നതിനോടൊപ്പം അനന്തന്റെ കവിളിലായി തഴുകി കൊണ്ട് ഗായത്രി പറഞ്ഞു.....

 ഗായത്രിയുടെ വാക്കുകൾ കേട്ടതും ഭദ്രയിൽ അത്രയും നേരം നിലകൊണ്ടിരുന്ന സങ്കടം ഒലിച്ചു പോകുന്നതായി അവൾക്ക് തോന്നി....

 അനന്തനും ഭദ്രയും ഗായത്രിയെ പുണർന്നു.....

🍁🍁🍁🍁🍁

\"\' കുറച്ച് അനിഷ്ടങ്ങൾ ഉണ്ടായിട്ടുണ്ട് ജ്യോത്സ്യരെ എനിക്ക് ഈ ജാതകത്തിന്റെ ഗ്രഹനില ഒന്നറിയണം...\"\'

 കയ്യിൽ ഉണ്ടായിരുന്ന ഭദ്രയുടെ ജാതകം സുഭദ്ര കൃഷ്ണൻനമ്പൂതിരിക്ക് നേരെ നീട്ടി...

 നടന്നത് ഓരോന്നും മനസ്സിലേക്ക് വന്നപ്പോൾ ആദ്യം ഓർത്തത് നാട്ടിലെ പേര് കേട്ട കൃഷ്ണ നമ്പൂതിരിയുടെ വാക്കുകളായിരുന്നു.... ഒരിക്കൽ തന്നെയും ഭദ്രയും അമ്പലത്തിൽ വച്ച് കണ്ടപ്പോൾ ഭദ്രയുടെ ജാതകം നോക്കണമെന്ന് നമ്പൂതിരി പറഞ്ഞിരുന്നു.... അനിഷ്ടങ്ങൾ വരാൻ പോകുന്നു എന്ന് അന്ന് അദ്ദേഹം പറഞ്ഞപ്പോൾ വിശ്വസിച്ചിരുന്നില്ല... പക്ഷേ ഇന്നെന്തോ അതെല്ലാം ശരിയായി തോന്നി....


 തറവാട്ടിൽ ആരുമറിയാതെ ചുരട്ടി പിടിച്ച ഭദ്രയുടെ ജാതകവുമായി സുഭദ്ര നേരെ വന്നത് ജോത്സ്യന് അരികിലേക്ക് ആയിരുന്നു...


 നമ്പൂതിരി സൂക്ഷ്മതയോടെ ഭദ്രയുടെ ജാതകം പരിശോധിച്ച് കവടി നിരത്തി.....

 ആമുഖത്ത് മിന്നി മറയുന്ന വ്യാകുലത സുഭദ്ര ശ്രദ്ധിച്ചു....

\"\" എന്താ എന്താ ജോത്സ്യരെ\"\"?....... സുഭദ്രയുടെ ശബ്ദം താന്നിരുന്നു....

\"\"അപ്പോൾ എന്റെ സംശയങ്ങൾ തെറ്റിയില്ല..ഒരു സംശയമുള്ളതിനാലാണ് ഞാൻ സുഭദ്രയോട് ഭദ്രയുടെ ജാതകം കൊണ്ടുവരാൻ പറഞ്ഞത്.. \"\'

 ജോത്സ്യൻ പറയാൻ പോകുന്നത് എന്താണെന്ന് അറിയാൻ സുഭദ്ര കാതോർത്തു...

\"\"ഇനി ഏഴ് ദിനവും 14 നാഴികയും കഴിയുന്ന നിമിഷം... ഈ കുട്ടിയുടെ ജീവിതം മാറും...\"\"

\"\" എന്നുവച്ചാൽ...?\"\"

\"\" സുഭദ്രയ്ക്ക് സീതയുടെ പുനർജന്മരഹസ്യം അറിയുമോ ..?വേദനാരായണൻ എന്ന മുനിക്ക് പിറന്ന \'വേദവതി\'യെന്ന പുത്രി, വിഷ്ണു‌വിനെ ഭർത്താവായി കിട്ടണമെന്ന മോഹത്താൽ വനത്തിൽ ഏകാകിനിയായി തപസ്സ് ചെയ്തു.. ഈ സമയത്ത് കാമാതുരനായ രാവണന്റെ ഉപദ്രവത്തിൽനിന്നും രക്ഷപ്പെടാൻ വേണ്ടി ജീവാഗ്നിയാൽ ആത്മാഹൂതി ചെയ്തവളുടെ പുനർജന്മമാണ് സീത....\"\" അതുപോലെ ഒരു ജന്മമാണ് ഭദ്രയുടേതും...\"

\"\" എനിക്കൊന്നും മനസ്സിലാകുന്നില്ല. തിരുമേനി ഒന്ന് തെളിച്ച് പറ.... \"\"

\"\"ഭദ്രയുടെ ജാതകത്തിൽ രണ്ടു പുരുഷന്മാരുടെ സാന്നിധ്യമുണ്ട്....\"\'


 \"\'എന്നുവെച്ചാൽ എന്റെ കുട്ടിക്ക് രണ്ട് വിവാഹം ഉണ്ടെന്നാണോ...?......\"\'

 \"\"അത് വ്യക്തമായി പറയാൻ കഴിയില്ല... അതേത് രീതിയിലും ആവാം....\"\'

 \"\'സൗഭാഗ്യങ്ങളുടെ ഒരു രാജയോഗം പോലും ഇല്ലാത്ത വെറും സാധാരണ ജാതകമാണ് ഭദ്രയുടേത്....മകം നക്ഷത്രത്തിന്റെ ആദ്യപാദത്തിൽ ജനിച്ച ഭദ്ര കടമ്പകൾ ഇനിയും ഒരുപാട് കടക്കാനുണ്ട്...\"\'\'

\"\" ഭർത്തുഗ്രഹത്തിൽ കാലെടുത്തുവെക്കുന്ന നാൾ മുതൽ ദുരന്തങ്ങളുടെ ഘോഷയാത്രയായിരിക്കും ഭദ്രയ്ക്ക്......\"\"

\"\"ഇല്ല... \"\"\"അരുതാത്തത് എന്തോ കേട്ടതുപോലെ സുഭദ്ര അലറി.. അങ്ങനെ ഒരിക്കലും സംഭവിക്കില്ല ഭദ്രേ ഒരുപാട് സ്നേഹിക്കുന്ന ഒരാളാണ് അവളെ വിവാഹം കഴിക്കാൻ പോകുന്നത്....\"\"

 \"\"അതിന് ഭദ്രയുടെ വിവാഹം ഉറപ്പിച്ചോ...?...\"\'

\"\"ഇല്ല...\"\'അപ്പോഴേക്കും സുഭദ്രയുടെ ശബ്ദം താഴ്ന്നിരുന്നു...

\"\" വിവാഹം ഈ ജാതകക്കാരിക്ക് ഒരു കടമ്പയാണ്....\"\'
 
\"\" യഥാർത്ഥത്തിൽ പറഞ്ഞാൽ സീതാദേവിയുടെ ജാതകമാണ് ഭദ്രയുടേത്.... ഭർത്താവും ഒത്തുള്ള ജീവിതത്തിലേക്ക് കടക്കാൻ ഭദ്രയ്ക്ക് ഒരുപാട് തടസ്സങ്ങൾ ഉണ്ടാകും........ പുണർതം ജാതകനായ രാജയോഗമുള്ള ഒരുവനുമായി മാത്രമേ ഭദ്രയുടെ വിവാഹം നടക്കാൻ പാടുള്ളൂ......\"\"

 പുണർതം നക്ഷത്രം എന്നു കേട്ടപ്പോൾ സുഭദ്രയുടെ മനസ്സിൽ ആശ്വാസം നിഴലിച്ചു.... അനന്തന്റെ നാള് പുണർതം ആണ്...... സുഭദ്ര മനസ്സിൽ ഉരുവിട്ടു..

\"\" ഇനി കൂടുതൽ അറിയാൻ ഒന്നുമില്ല സുഭദ്ര... അധികം വൈകാതെ തന്നെ മംഗല്യ സൗഭാഗ്യം ഞാനാ കുട്ടിയിൽ കാണുന്നു....\"\" അത്രയും പറഞ്ഞ് ജോത്സ്യര്‍ ജാതകം മടക്കിവെച്ചു.

\"\" ശരി ജോത്സ്യരെ... ഞാൻ ഇറങ്ങട്ടെ... \"\"നമ്പൂതിരി ജാതകം തിരിച്ചു കൊടുത്തു... സുഭദ്ര അതുമായി അവിടം വിട്ടിറങ്ങി...

 ജോത്സ്യൻ പറഞ്ഞതിന്റെ ആരംഭം ഭയത്തോടെ കേട്ടിരുന്ന സുഭദ്രയ്ക്ക് അവസാന വാചകം ഊർജ്ജം നൽകി....

 ആരൊക്കെ എത്ര എതിർത്താലും അനന്തനുമായുള്ള എന്റെ കുട്ടിയുടെ വിവാഹം മാത്രമേ ഞാൻ നടത്തു..... ജോത്സ്യരുടെ മുന്നിൽ നിന്നും വീട്ടിലേക്ക് പോകാൻ ഒരുങ്ങിയ സുഭദ്ര മനസ്സിൽ ഒരു ഉറച്ച തീരുമാനമെടുത്തു....


🍁🍁🍁🍁🍁

 ദിവസങ്ങൾ വീണ്ടും കടന്നുപോയി . അനന്തൻ പറഞ്ഞതിനെ കുറിച്ചുള്ള വ്യക്തത അന്വേഷിച്ച് ഭാമയ്ക്ക് മുന്നിലേക്ക് ഭദ്ര പോയില്ല.... ഭദ്രയോട് ഒന്നും അനന്തൻ തുറന്നു പറഞ്ഞിട്ടില്ല എന്ന വിശ്വാസത്തിൽ ഭാമ പതിയെ വീണ്ടും ഭദ്രയിലേക്ക് അടുത്തു...

 ഇതിനിടയിൽ മഹേശ്വരനും രുദ്രനും ഇടയിലുള്ള സൗഹ്യദം നല്ല രീതിയിൽ വളർന്നു... രുദ്രന്റെ കൂടെ എന്തിനും ഏതിനും നിൽക്കാൻ മഹേശ്വരൻ തയ്യാറായി..... രുദ്രൻ നീട്ടുന്ന ലക്ഷങ്ങൾ ആയിരുന്നു മഹേശ്വരനെ അതിനു പ്രേരിപ്പിച്ചത്...


\" ഭദ്രേച്ചി അച്ഛൻ അന്വേഷിക്കുന്നുണ്ട് എന്തോ പറയാനുണ്ടെന്ന്.....\"

 കട്ടിലിൻ ചാരിയിരുന്ന് തനിക്ക് ഏറെ ഇഷ്ടമുള്ള പുസ്തകത്തിൽ മുഴുകിയിരിക്കുകയായിരുന്നു ഭദ്ര... അപ്പോഴാണ് ഭാമ അവൾക്കരികിലേക്ക് വരുന്നത്....

\" എന്താ മോളെ...?\"\"

 \"\"അറിയില്ല എന്തോ പ്രധാനപ്പെട്ട കാര്യമാണെന്ന് പറഞ്ഞു... അപ്പച്ചിയും സതീഷേട്ടനും എല്ലാം ഉണ്ട് താഴെ... ചേച്ചി വേഗം താഴേക്ക് വാ...\"\'

 അത്രയും പറഞ്ഞ് ഭാമ മുറിവിട്ട് പുറത്തുപോയി... ഭദ്രയുടെ മനസ്സിൽ സംശയങ്ങൾ ഉടലെടുത്തു......

 അച്ഛൻ എന്തിനായിരിക്കും കാണണം എന്നു പറഞ്ഞത്... സതീഷേട്ടൻ വീണ്ടും എന്തെങ്കിലും ഒപ്പിച്ചു ഉണ്ടാകുമോ . ... അവൾ ഓരോന്നും തന്റെ മനസ്സിനോട് തന്നെ ചോദിച്ചു കൊണ്ടിരുന്നു.... കട്ടിലിൽ നിന്നും എഴുന്നേറ്റ് മുഖമൊന്നു കഴുകിയശേഷം ഭദ്ര താഴേക്ക് ചെന്നു....

 സതീഷന്റെ നോട്ടം ഭദ്രയുടെ ശരീരമാകെ ഒഴുകി നടന്നതും അവൾ പതിയെ കതകിന് പിന്നിലേക്ക് ഒളിച്ചുനിന്നു....

 \"\"നീ ഇത്ര ഒളിക്കാൻ ഒന്നുമില്ല എനിക്ക് നിന്നോടാ സംസാരിക്കാൻ ഉള്ളത് ...ഇങ്ങോട്ട് നീങ്ങി നിൽക്ക്...\"\"

 മഹേശ്വരൻ ഒരു ആജ്ഞ പോലെ പറഞ്ഞതും ഗത്യന്തരമില്ലാതെ ഭദ്ര വാതിലിനു പിന്നിൽ നിന്നും മുന്നിലേക്ക് കയറി നിന്നു.... അപ്പോഴും സതീഷൻ തന്നെ ഒഴിഞ്ഞു നോക്കുന്നത് ഭദ്ര ശ്രദ്ധിക്കുന്നുണ്ടായിരുന്നു..... ഈ സമയം കൊണ്ടു തന്നെ സുഭദ്ര ഉമ്മറത്തേക്ക് വന്നു...

\"\" നിന്റെ വിവാഹം നടത്താൻ ഞാൻ അങ്ങ് തീരുമാനിച്ചു....\"\'

 മഹേശ്വരന്റെ വാക്കുകൾ കേട്ടതും ഭദ്രയുടെ ശരീരം ആകെ വളരുന്നതു പോലെ തോന്നി അവൾക്ക്.... തൊണ്ട കുഴിയിൽ ശബ്ദം കുരുങ്ങിക്കിടന്നു.... സുഭദ്രയും ഒരു പകപോടെ മഹേശ്വരനെ നോക്കി....

 ഉമയും ,സതീഷനും ,ഭാമയും ഈ വാർത്ത കേട്ട് മനസ്സിൽ സന്തോഷിച്ചു... സതീഷിന്റെ മനസ്സിലൂടെ ഭദ്രയും ഒത്തുള്ള നിമിഷങ്ങൾ കടന്നുപോയി...

\"\" അത് മഹിയേട്ടൻ മാത്രം അങ്ങ് തീരുമാനിച്ചാൽ മതിയോ....?.\"\"... സുഭദ്രയുടെ നാവ് ചലിച്ചു....

\"\" ഇവളുടെ കാര്യത്തിൽ പിന്നെ വേറെ ആരാ തീരുമാനമെടുക്കേണ്ടത്....?... ജന്മം കൊടുത്തില്ലെങ്കിലും ഞാനവളുടെ അച്ഛന്....ആരെതിർത്താലും ഞാനീ വിവാഹം നടത്തും.... എന്റെ തീരുമാനത്തെ എതിർക്കാനാണ് ഇവിടെയുള്ളവരുടെ തീരുമാനമെങ്കിൽ തറവാടുകുളത്തിൽ ജീവനോടെ താഴ്ത്തും ഞാൻ....\"\'

 മഹേശ്വരന്റെ വാക്കുകൾ ഭദ്രയിൽ ഭയമുള്ളവയാക്കി.... അവളുടെ ഉള്ളിലേക്ക് അച്ഛന്റെ രൂപം കടന്നുവന്നു....


\"\' ഇന്ന് നിന്നെ ഒരു ചെറുക്കൻ കാണാൻ വരും.. നിനക്കറിയാവുന്ന ആള് തന്നെയാ പേര് രുദ്രദേവ് ....\"\'

 ഭദ്ര ഒരു നിമിഷത്തേക്ക് തറഞ്ഞു നിന്നു പോയി.... അനന്തേട്ടന്റെ കൂട്ടുകാരൻ രുദ്രദേവനെ കുറിച്ച് തന്നെയല്ലേ അച്ഛൻ പറഞ്ഞത്.... അവൾ മനസിൽ വീണ്ടും വീണ്ടും ആ പേര് ഉരുവിട്ടുകൊണ്ടിരുന്നു...


\"\" ഇത് നിനക്ക് ഇഷ്ടപ്പെട്ടാലും ഇല്ലെങ്കിലും രുദ്രനുമായുള്ള നിന്റെ വിവാഹം ഞാൻ നടത്തും.. ഞാൻ പറയുന്നത് അനുസരിച്ച് അവനു മുന്നിൽ കെട്ടി ഒരുങ്ങി നിന്നോളണം.... മറിച്ചാണ് ചെയ്യാൻ ഉദ്ദേശമെങ്കിൽ...?\"

 മഹേശ്വരൻ കൈയുയർത്തി ഭദ്രയോടും സുഭദ്രയോടുമായി പറഞ്ഞു.....

 എന്നാൽ കേട്ട വാർത്ത ഭദ്രേക്കാളും ആഴത്തിൽ പതിഞ്ഞത് ഉമയുടെയും സതീഷന്റെയും ഉള്ളിലേക്ക് ആയിരുന്നു......


 \"സതീശൻ അല്ലാതെ മറ്റൊരുവനോ...?... \"ഉമയുടെ മനസ്സിൽ സംശയങ്ങൾ ഉടലെടുത്തു...



തുടരും.....

 ജോത്സ്യൻ പറഞ്ഞ കാര്യങ്ങളെല്ലാം ഞാൻ കഥയ്ക്ക് വേണ്ടി കയ്യിൽ നിന്ന് ഇട്ടതാണ്..... അതിൽ എന്തെങ്കിലും തെറ്റുണ്ടെങ്കിൽ അറിയാവുന്നവർ ക്ഷമിക്കണം...