തീരാത്ത യാത്ര
           -----------------


ലക്ഷങ്ങൾ, കോടികൾ,
പരസഹസ്ര കോടികൾ;
തനിയെ നടന്നയീ പാതയിലൂടെ ഞാൻ;
പുണ്യപാപത്തിന്റെ ഇരുമുടിക്കെട്ടുമായ്
വീണ്ടും തിരിക്കുന്ന തീർഥയാത്ര!

ശരണ മന്ത്രത്തിന്റെ ആഴിതന്നുള്ളിലും
തീർഥക്കുളത്തിന്റെ കുളിരറിയാത്തവൻ!
ഒരുകാലു വെക്കുവാൻ
ഇടതേടി, അറിയാതെ
മുന്നോട്ടു നീങ്ങും
ജനപ്രവാഹത്തിലും
ഏകാകിയായി ഞാൻ മാറുന്ന യാത്ര!
മൂവാറു പടികേറി കൈകൂപ്പി നിന്നാലും
വ്യർഥമാകുന്നയീ യാത്ര,
ഒരു ദുഃഖ യാത്ര...
സ്വാമിയെ കാണാത്ത യാത്ര,
നിന്നിലെ എന്നിനെ
കാണാത്ത യാത്ര!

എന്നു ഞാനെന്നുടെ സ്വാമിയാകുന്നുവോ,
എന്നെന്റെ ഉള്ളിലാ തത്ത്വമസി തെളിയുന്നുവോ;
അന്നുവരേക്കുമീ കൂട്ടത്തിലേകനായ്
തുടരേണ്ടതാകുന്ന തീർഥയാത്ര!

മുമ്പും, മുമ്പിന്റെ മുമ്പും
അതിലേറെ മുമ്പും
യാത്രകളിലൊക്കയും
തട്ടി ഞാൻ വീഴാൻ തുടങ്ങിയ കല്ലുകൾ;
പുഞ്ചിരിക്കുന്നുണ്ട്...
ഏകാന്ത പഥികന്റെ ഹൃത്തിലെ
അന്ധകാരക്കോണിൽ
തെളിയാ വിളക്കിന്റെ
ദുർഗതിയോർക്കയാൽ!