🧡ഒരു അൺറൊമാന്റിക് ഡേറ്റ് 🧡

രാത്രിയിൽ മേല് കഴുകി റൂമിലേക്ക് വന്നപ്പോഴേക്കും പാറു അവളുടെ ഡ്യൂട്ടി തുടങ്ങിയിരുന്നു..... ഞാൻ ഒരു ചിരിയോടെ റൂമിലെ ജനൽ അടയ്ക്കാൻ അവിടേക്ക് നടന്നു.... ജനലിന് പുറത്തുകൂടെ നോക്കിയാൽ കുറച്ചു ദൂരെയായി വെളിച്ചത്തിൽ മുങ്ങി നിൽക്കുന്ന നഗരം കാണാം... പത്തു മണി കഴിഞ്ഞെങ്കിലും ഇപ്പോഴും വണ്ടികൾ തലങ്ങും വിലങ്ങും പോകുന്നുണ്ട്.... കുറച്ചു നേരം കാറ്റും കൊണ്ട് എന്തൊക്കെയോ ഓർത്തു നിന്നു പിന്നീട് ജനൽ അടച്ചു കർട്ടനും വലിച്ചിട്ടു ബെഡിലേക്ക് വന്നു കിടന്നു

പാറു അവളുടെ ഭാവിഭർത്താവുമായി കുറുകുന്നുണ്ട്... ഇതിനി അവസാനിക്കണമെങ്കിൽ പാതി രാത്രി ആകും... ഞാൻ ലൈറ്റ് ഓഫ്‌ ചെയ്തു ഫോൺ എടുത്തു.... നാളെ എന്റെ ബർത്ത്ഡേ ആണ്... വാട്സ്ആപ്പ് തുറന്നു നോക്കിയപ്പോൾ കിച്ചൂന്റെ മെസേജ് ഉണ്ട്..... ഒരു കുഞ്ഞാവ ബാക്ക് കുലുക്കി കാണിക്കുന്ന എന്റെ സ്റ്റിക്കറിനു മറുപടി ആയി "kelikkalle mwole"എന്നെഴുതിയ സ്റ്റിക്കർ ഇങ്ങോട്ട് അയച്ചിരിക്കുന്നു.....അവനൊരു ഗുഡ് നൈറ്റ്‌ മെസ്സേജ് അയച്ചു spottify ഓപ്പൺ ചെയ്തു.... പഴയ റൊമാന്റിക് സോങ്‌സ് എടുത്തു പ്ലേ ചെയ്തു.... നന്നായി സൗണ്ട് കൂട്ടി ഇയർ പോഡ്സ് ഒന്നുകൂടെ ചെവിയിലേക്ക് അമർത്തി വെച്ചു കിടന്നു..... ഇല്ലെങ്കിൽ അപ്പുറത്തെ കുറുകല് കെട്ട് എന്റെ ഷുഗർ കൂടും....

എന്തായാലും രാത്രി പന്ത്രണ്ടു മണി ആകുമ്പോൾ കിച്ചു വിളിക്കും അത്കൊണ്ട് ഉറങ്ങാതെ കിടന്നു.... കഴിഞ്ഞാഴ്ച പാറുന്റെ ബർത്ത്ഡേ ആയിരുന്നു... പന്ത്രണ്ടു മണിക്ക് അവളുടെ വുട്ബി വീഡിയോ കാൾ ചെയ്തു....അവിടെ ആ പുള്ളി കേക്ക് വാങ്ങിച്ചിട്ടുണ്ടായിരുന്നു അതിലെ കാൻഡിൽ ഊതികെടുത്താൻ ഇവിടിരുന്ന പാറുനോട് പറയുന്നതും അവളുറക്കെ ചിരിച്ചു ഊതുന്നതും എല്ലാം ഞാൻ അത്ഭുതത്തോടെ നോക്കിക്കണ്ടു.....

അവളുടെ ചേട്ടായി നല്ല റൊമാന്റിക് ആണെന്ന് അവൾ ഇടയ്ക്ക് ഇടയ്ക്ക് പറയുന്നത് കേൾക്കാം..... കിച്ചന്റെ കാര്യം എന്നോട് ചോദിക്കുമ്പോൾ ഞാനും തലയാട്ടും പിന്നെ പുള്ളി നല്ല റൊമാന്റിക് അല്ലെ..... സത്യം എനിക്കല്ലേ അറിയൂ..... കഴിഞ്ഞ പതിമൂന്ന് വർഷമായി എന്റെ ബെസ്റ്റ് ഫ്രണ്ട് ആണ് കിച്ചു..... ആ ബന്ധം പ്രണയത്തിലേക്ക് എത്തിയിട്ട് ഇപ്പോൾ ഒരു വർഷം ആകുന്നു....കല്യാണത്തിന് ഇപ്പോൾ സമയം അല്ലാത്തത്കൊണ്ട് വീട്ടുകാരുടെ സമ്മതത്തോടെ പ്രണയിക്കുന്നു.....പ്രണയിക്കുന്നു എന്ന് പറയുമ്പോൾ അതിലെവിടെയോ ഒരു അതിശയോക്തി ഇല്ലേ എന്നൊരു തോന്നൽ എനിക്ക് ഉണ്ടാകാറുണ്ട്

ഏറ്റവും അടുത്ത സുഹൃത്തുക്കളായിരുന്നത് കൊണ്ട് ഇപ്പോഴും ഞങ്ങൾക്കിടയിൽ പ്രണയത്തെക്കാൾ കുറച്ചുകൂടെ മുന്നിട്ട് നിൽക്കുന്നത് സൗഹൃദം തന്നെയാണ്.. അവനോ ഞാനോ തീരെ റൊമാന്റിക് അല്ല.... ഉള്ളിൽ പരസ്പരം ഒരുപാട് പ്രണയിക്കുന്നുണ്ടെങ്കിലും എനിക്ക് അത് തുറന്നു പ്രകടിപ്പിക്കാൻ എന്തോ ഒരു തടസം ഉണ്ട്..... അവനും അങ്ങനെ തന്നെ ആയിരിക്കാം

ഒരേ നഗരത്തിൽ ജോലി ചെയ്യുന്നത്കൊണ്ട് ഇടയ്ക്ക് ഇടയ്ക്ക് ഞങ്ങൾ കാണാറുണ്ട് അപ്പോഴെല്ലാം ഒന്നുകിൽ ബീച്ചിലോ മറ്റോ പോയി വായിനോക്കി നടന്നു ആളുകളെ നോക്കി അവരെ കമന്റ്‌ അടിക്കാനും ഏതെങ്കിലും റെസ്റ്റോറന്റിൽ കയറി ഫുഡ്‌ കഴിച്ചു നടക്കുന്നതുമാണ് ഞങ്ങളുടെ പരിപാടി

ഫോൺ വിളിച്ചാലും പ്രണയം ഒഴിച്ച് ഭൂലോകത്തെ എല്ലാം ഞങ്ങൾക്ക് സംസാര വിഷയമാകും ... വാട്സാപ്പിൽ സ്റ്റിക്കർ അയച്ചു കളിക്കും വീഡിയോ കാൾ ചെയ്താൽ ഫിൽറ്റർ മാറ്റിയും സ്ക്രീൻ ഷോട്ട് എടുത്തും കളിക്കും.... സത്യമാണ് അവൻ ഒട്ടും റൊമാന്റിക് അല്ല....(ഞാനും.... )ഇങ്ങനെയാണേൽ കല്യാണം കഴിഞ്ഞാലുള്ള അവസ്ഥയോ.... Spotify പ്ലേലിസ്റ്റിലെ റൊമാന്റിക് പാട്ടുകളും ഇത്ര നാളും കണ്ട് തീർത്ത റൊമാന്റിക് സിനിമകളും ഷെൽഫിലെ പ്രണയ നോവലുകളും എന്നേ നോക്കി പല്ലിളിച്ചു ചിരിക്കുന്ന പോലെ.....

ഇങ്ങനെയുള്ള ചിന്തകൾക്കൊടുവിൽ എപ്പോഴോ ഞാൻ അഗാധമായ ഉറക്കത്തിലേക്ക് വഴുതി വീണു.... രാവിലെ പാറു കുലുക്കി വിളിച്ചപ്പോഴാണ് ഞാൻ ഉണർന്നത്.... അവളുടെ വക ബർത്ത്ഡേ ഗിഫ്റ്റ് ആയി കെട്ടിപിടിച്ചു ഒരുമ്മയൊക്കെ തന്നു.... ഫോൺ എടുത്തു നോക്കി കിച്ചുന്റെ കാൾ ഒന്നുമില്ല.... മെസ്സേജും അയച്ചിട്ടില്ല.... വേറെ കുറച്ചു ഫ്രണ്ട്സ് മെസ്സേജ് അയച്ചു സ്റ്റാറ്റസ് എല്ലാം ഇട്ടിട്ടുണ്ട്... അവർക്കൊക്കെ മറുപടി കൊടുത്തു കുളിക്കാൻ കയറി

അടുത്തുള്ള അമ്പലം കുറച്ചധികം ദൂരമുള്ളത് കൊണ്ട് അടുത്തുള്ള പള്ളിയിൽ പോയി പ്രാർത്ഥിച്ചു...ഇന്ന് ഞായറാഴ്ച ആയത്കൊണ്ട് ഓഫീസ് ഇല്ല.... പാറുന്റെ വിദേശത്തുള്ള ആന്റിയുടെ ഒഴിഞ്ഞ ഫ്ലാറ്റിലാണ് ഞങ്ങളുടെ താമസം.......തിരികെ വന്നപ്പോൾ വീട്ടിൽ നിന്നും എല്ലാവരും വിളിച്ചു... ഇതുവരെ ഞാൻ പ്രതീക്ഷിച്ച ആളുടെ വിളി മാത്രം വന്നില്ല....

പാറു എനിക്ക് വേണ്ടി കഷ്ടപ്പെട്ട് എന്റെ ഫേവറിട് കിണ്ണത്തപ്പം ഉണ്ടാക്കിയിട്ടുണ്ട്... അതും കഴിച്ചു ഇരുന്നപ്പോഴാണ് കിച്ചു വിളിക്കുന്നത്....11 30 ആകുമ്പോൾ റെഡി ആയി നിൽക്കാൻ... പുറത്തോട്ട് പോകാം എന്ന് മാത്രം പറഞ്ഞു.... ദുഷ്ടൻ ഇപ്പോഴും വിഷ് ചെയ്തില്ല....

ഞാനൊരു ബ്ലാക്ക് ആൻഡ് വൈറ്റ് സ്ട്രിപ്പ് വരുന്ന ഷോർട് ടോപ്പും ബ്ലാക്ക് സ്‌കർട്ടും എടുത്തിട്ടു... അത്യാവശ്യം ഒരുങ്ങി തന്നെയാണ് ഇറങ്ങിയത്

"So.. റൊമാന്റിക് ഡേറ്റ് ആണോ പോന്നുസേ....."

പാറുന്റെ ചോദ്യത്തിന് ഒന്ന് ചിരിച്ചു കാണിച്ചു താഴേക്ക് പോയി.... റൊമാന്റിക് ഡേറ്റ്.....

പാർക്കിങ് ഗേറ്റിന്റെ മുന്നിൽ കുറച്ചധികം നേരം പോസ്റ്റ്‌ ആയി നിന്നു... കുറച്ചു സമയം കഴിഞ്ഞപ്പോഴാണ് ഒരു ബ്ലാക്ക് ഹോണ്ട സിറ്റി അടുത്തേക്ക് കൊണ്ട് വന്നു നിർത്തിയത്.... ഗ്ലാസ്‌ താഴ്ത്തിയപ്പോഴാണ് അത് കിച്ചു ആണെന്ന് കണ്ടത്

അപ്പോഴേ ഞാൻ പറഞ്ഞില്ലേ ഇവൻ ഒട്ടും റൊമാന്റിക് അല്ലെന്ന്.. കിച്ചുനോട് ചേർന്നിരുന്നു മഴ മൂടി കെട്ടി മനോഹരമായ ഈ ദിവസത്തിൽ അവന്റെ ബുള്ളറ്റിൽ ഒരു റൊമാന്റിക് റൈഡിനു പോകാൻ നിന്ന ഞാനിപ്പോ ആരായി.... അവൻ വിളിച്ചപ്പോൾ ചിന്തയിൽ നിന്നും ഉണർന്നു കോ ഡ്രൈവിംഗ് സീറ്റിലേക്ക് കയറി

"വണ്ടിക്ക് ചെറിയൊരു ജലദോഷം അതാ കാർ എടുത്തത്..."

അവന്റെ പറച്ചില് കെട്ട് ദേഷ്യം വന്നെങ്കിലും നന്നായി ഒന്ന് ഇളിച്ചു കാണിച്ചു.... ജലദോഷം പോലും,അവന് എന്നേക്കാൾ പ്രേമം ആ പാട്ട വണ്ടിയോടാ

കാര്യം ഡേറ്റിന്റെ ഫസ്റ്റ് ഇമ്പ്രെഷൻ പോയെങ്കിലും എനിക്ക് ഏറ്റവും ഇഷ്ടമുള്ള മെലഡീസ് ആണ് കാറിൽ പ്ലേ ചെയ്യുന്നത്... അത്കൊണ്ട് ബൈക്ക് ഇല്ലാത്ത പോരായ്മയൊക്കെ മറന്നു ഞാനാ യാത്ര ആസ്വദിച്ചു

"നമുക്ക് ലഞ്ച് കഴിച്ചാലോ പൊന്നൂസ്..."

അവൻ ചോദിച്ചപ്പോൾ ഞാൻ വേഗം തലയാട്ടി... രാവിലെ കഴിച്ചതൊക്കെ എപ്പോഴേ ആവി ആയി പോയിരുന്നു ....

പാറുന്റെ ബർത്ഡേയ്ക്ക് അവർ ഹോളിഡേ ഇന്നിലാ പോയെ.... അവൾക്ക് സ്പെഷ്യൽ ആയി റൊമാന്റിക് ബ്രൗണി സൺടെയ്സ് എല്ലാം ഉൾപെടുത്തിയ ക്യാൻഡിൽ ലൈറ്റ് ഡിന്നർ ആയിരുന്നു.... അതിന്റെ ഫോട്ടോ അവൾ അന്ന് കാണിച്ചിരുന്നു... നമുക്കും അവിടെ പോകാം എന്ന് പറയാൻ തുടങ്ങുന്നതിനു മുൻപേ ലഞ്ചിനു വേണ്ടിയുള്ള സ്ഥലത്തു കാർ നിർത്തിയിരുന്നു....

മുന്നിലെ ബോർഡ് കണ്ട് ഞാനാകെ പ്ലിംഗ് ആയി.... "പഴങ്കഞ്ഞി കട ".... അടിപൊളി..... ഞാൻ കിച്ചുനെ നോക്കിയപ്പോൾ അവൻ നല്ല സന്തോഷത്തിലാണ്.... പെട്ടെന്ന് എനിക്കും ചിരി വന്നു....

"എന്താടി....."

ഞാൻ ഒന്നുമില്ലെന്ന് തലയാട്ടി അവന്റെ തോളിൽ ഒന്ന് തട്ടിയിട്ട് കാറിൽ നിന്നും ഇറങ്ങി.... എന്നേ വല്ലായ്മയോടെ നോക്കി അവനും പുറത്തേക്കിറങ്ങി

നല്ല വിശന്നിരുന്ന സമയം ആയത്കൊണ്ട് ഞാൻ വേഗം കൈ കഴുകി വന്നു.... മുന്നിൽ ചട്ടിയിൽ കൊണ്ട് വെച്ച പഴങ്കഞ്ഞി കണ്ട് എന്റെ വായിൽ വെള്ളം നിറഞ്ഞു.... മുളക് ചമ്മന്തിയും പപ്പടവും കപ്പയും മീൻകറിയും മോരും അച്ചാറും എല്ലാം കൂടി എന്റെ കണ്ട്രോൾ കളഞ്ഞു.... അതെല്ലാം കൂടി ഒന്നിച്ചു കുഴച്ചു കഴിച്ചപ്പോൾ ക്യാൻഡിൽ ലൈറ്റ് ഡിന്നറിന്റെ ഓർമയെല്ലാം കാറ്റിൽ പറന്നു.....

എനിക്ക് വേണ്ടി സ്പെഷ്യൽ ചെമ്മീൻ ഫ്രൈ അവൻ ഓർഡർ ചെയ്തു...അല്ലേലും എന്റെ കിച്ചു മുത്താണ്..... കുറച്ചു മൂരാച്ചി ആണെങ്കിലും അവൻ സ്നേഹമുള്ളവനാ..... അവനെ ഒന്ന് നന്ദിയോടെ നോക്കി ചെമ്മീൻ ഫ്രൈയെ അറ്റാക്ക് ചെയ്യാൻ തുടങ്ങി....

കഴിച്ചിറങ്ങിയപ്പോൾ തൊട്ടടുത്ത കടയിൽ നിന്നും ഒരു ഡയറി മിൽക്ക് കൂടി വാങ്ങിച്ചു തന്നു.... ഇത്ര അടിപൊളി ലഞ്ച് ഈ അടുത്ത് ഒന്നും കഴിച്ചിട്ടില്ല... പഴങ്കഞ്ഞിയെ വീട്ടിൽ വെച്ച് പുച്ഛിച്ച ദിവസങ്ങൾ ഞാൻ വേദനയോടെ ഓർത്തു.... എന്നാലും കാമുകിയെ ഡേറ്റിനു കൊണ്ട് പോയി പഴങ്കഞ്ഞി വാങ്ങി കൊടുത്ത ലോകത്തിലെ ആദ്യത്തെ കാമുകൻ എന്റെ കിച്ചു ആയിരിക്കും.... എനിക്ക് ചിരി കണ്ട്രോൾ ചെയ്യാൻ പറ്റിയില്ല... ഇപ്പോഴും നിന്നു ചിരിക്കുന്ന കണ്ടാൽ അത് മതി അവന്.... പ്രാന്ത് ആണെന്ന് അവൻ തന്നെ പറഞ്ഞു പരത്തിക്കോളും.....

എങ്ങോട്ടാ പോകുന്നതെന്ന് പോലും അറിയാതെ കുറെ നേരം ഡ്രൈവ് ചെയ്തു.... എനിക്ക് ഇങ്ങനെ വെറുതെ യാത്ര ചെയ്യാൻ വലിയ ഇഷ്ടമാണ്.... ഇതിപ്പോ ഉച്ച സമയം ആണെങ്കിലും നല്ല തണുപ്പും ഒരു മഴയുടെ ലക്ഷണവും ആണ്.... പക്ഷെ മഴ ഇതുവരെ പെയ്തില്ല...... കൂടെ പ്ലേ ചെയ്യുന്ന പാട്ടുകൾ കൂടി ആയപ്പോൾ പ്രത്യേകിച്ച് കാരണം ഒന്നുമില്ലാതെ ഒരുപാട് സന്തോഷം എനിക്ക് തോന്നി..... ആ നിമിഷം ഞാൻ മറ്റേല്ലാം മറന്നു എൻജോയ് ചെയ്തു...... ഒരുപാട് സന്തോഷവും സങ്കടവും വരുമ്പോൾ ഞാൻ നിശബ്ദയായിരിക്കും..... അതറിഞ്ഞു അവനും ഒന്നും മിണ്ടിയില്ല

ബീച്ചിന്റെ സൈഡിൽ വണ്ടി നിർത്തിയപ്പോൾ എന്റെ സന്തോഷം ഒന്നുകൂടെ കൂടി.... എനിക്ക് ഏറ്റവും ഇഷ്ടമുള്ള ഒന്നാണ് കടൽ.. തിരകളെ നോക്കി ഒരു ജന്മം മുഴുവൻ ഇരിക്കാം.... അത്രത്തോളം എനിക്ക് ഇഷ്ടമുള്ള ഒരിടമാണ്...... മഴ ഉണ്ടാകുമെന്നുള്ളത് കൊണ്ടായിരിക്കും അധികം ആളുകൾ ഒന്നുമില്ല..... എനിക്കൊരു പഞ്ഞി മുട്ടായി വാങ്ങി തന്നു അവൻ എന്റെ കയ്യും പിടിച്ചു ചുമ്മാ തീരത്തു കൂടി നടന്നു.... കാല്പാദങ്ങളിൽ ചുംബിക്കാൻ വരുന്ന തിരകളെ കളിപ്പിച്ചു ഞാൻ അവന്റെയൊപ്പം നടന്നു..... എവിടെ പോയാലും അവൻ ഈ കൈ ഇങ്ങനെ മുറുക്കി പിടിക്കും.... ഒരിക്കലും വിടാതെ....

കുറച്ചു നേരം കഴിഞ്ഞപ്പോൾ മഴ പെയ്യാൻ തുടങ്ങി... മഴയത്തു കടൽത്തീരത്തു കൂടി നടക്കാനുള്ള പൂതി കൊണ്ട് ഞാൻ അവിടെ തന്നെ നിന്നു.... ഓടിപ്പോകാൻ നിന്ന കിച്ചു എന്നേ ദേഷ്യത്തോടെ ഒന്ന് നോക്കി

"പ്ലീസ്....."

ഞാൻ ദയനീയതയോടെ പറഞ്ഞെങ്കിലും അവൻ എന്നെയും വലിച്ചു കാറിലേക്ക് കയറി ഇരുന്നു.... അപ്പോഴേക്കും മഴ ശക്തമായി പെയ്യാൻ തുടങ്ങി..... കിച്ചു ഗ്ലാസ്‌ മുഴുവൻ കേറ്റിയിട്ട് സ്റ്റീരിയോ ഓൺ ചെയ്തു കുറച്ചു വോളിയം കൂട്ടി വെച്ചു.... അവൻ തലമുടിയിലെ വെള്ളം കുടഞ്ഞു കളയുന്നുണ്ട്...എനിക്ക് ആകെ ദേഷ്യം വന്നു.... എന്തൊരു സാധനമാ ഇത്... ഇന്നിത്ര നേരമായിട്ടും എന്നേ ഒന്ന് വിഷ് ചെയ്തത് കൂടിയില്ല.... സങ്കടവും ദേഷ്യവും ഒന്നിച്ചു വരുമ്പോഴുള്ള തൊണ്ടയിലെ എരിച്ചിൽ എനിക്ക് കൂടി കൂടി വന്നു.....

"എന്താണ് പൊന്നൂസെ മഴയത്തു കളിക്കാൻ വിടാത്തത്കൊണ്ട് കലിപ്പ് ആണോ...."

അവന്റെ കളിയാക്കിയുള്ള ചോദ്യം കെട്ട് ഞാൻ ദേഷ്യത്തോടെ ഒന്ന് നോക്കി

"എന്നോട് മിണ്ടാൻ വരണ്ട ...."

മുഖം വീർപ്പിച്ചു അത് പറഞ്ഞു കഴിഞ്ഞപ്പോൾ ഒരാശ്വാസം തോന്നി.... തിരിഞ്ഞു പുറത്തേക്ക് നോക്കിയിരുന്നപ്പോൾ അവന്റെ ചിരി എനിക്ക് കേൾക്കാമായിരുന്നു

"പിണക്കം ആണെങ്കിൽ പിണക്കം മാറ്റാൻ ഒരു പാട്ട് പാടി തരാം...."

അവൻ പറയുന്നത് കെട്ട് എനിക്ക് അത്ഭുതം തോന്നി... അത്യാവശ്യം നല്ലതുപോലെ പാടുന്ന ആളാണ് കിച്ചു... സ്കൂളിലൊക്കെ ഫ്രണ്ട്സ് പറയുമ്പോൾ പാടി കൊടുക്കുമായിരുന്നു.... എനിക്ക് വേണ്ടി ഇതുവരെ സ്പെഷ്യൽ ആയിട്ട് പാട്ടൊന്നും പാടിയിട്ടില്ല.... ചില രാത്രികളിൽ ഞാൻ ആലോചിക്കാറുണ്ട് അവൻ പാടി തരുന്നതും അത് കെട്ട് ഞാൻ ഉറങ്ങുന്നതുമൊക്കെ..... അതെന്തോ വല്ലാത്ത പൈങ്കിളി ആയി പോകുമോ എന്നൊരു തോന്നലിൽ ഇതുവരെ അവനോട് അങ്ങനെയൊന്നു ആവശ്യപ്പെട്ടിട്ടില്ല ...

🎶🎶കണ്ടു ഞാന്‍.... മിഴികളില്‍........

ആലോലമാം നിന്‍ ഹൃദയം..........

കേട്ടു ഞാന്‍..... മൊഴികളില്‍........

വാചാലമാം നിന്‍ നൊമ്പരം.....

ഗോപുര പൊന്‍ കോടിയില്‍, അമ്പല പ്രാവിന്‍ മനം...

പാടുന്നൊരാരാധന മന്ത്രം പോലെ

കേട്ടു ഞാന്‍........ മൊഴികളില്‍.........

വാചാലമാം നിന്‍ നൊമ്പരം.......🎶🎶

അവൻ ഓരോ വരി പാടുമ്പോഴും അത് തീർന്നു പോകരുതേ എന്ന് ഞാൻ ശരിക്കും ആഗ്രഹിച്ചിരുന്നു

"ബാക്കിയോ...."

അവൻ പാടി തീർന്നപ്പോൾ ഞാൻ ആകാംഷയോടെ ചോദിച്ചു

"ബാക്കിയോ..... ബാക്കി വാലിട്ടു കണ്ണെഴുതി വെള്ളോട്ട് വളയണിഞ്ഞു നീയെൻ അന്തർജനമാകുമ്പോൾ പാടി തരാം....."

അവൻ എന്റെ കണ്ണിലേക്കു തന്നെ നോക്കി ഒരു കുസൃതി ചിരിയോടെ പറഞ്ഞു.... അവന്റെ കണ്ണുകളിൽ ഇന്ന് വരെ ഞാൻ കണ്ടിട്ടില്ലാത്ത ഒരു ഭാവം.... അത് കാണും തോറും എന്റെ ഹൃദയമിടിപ്പ് വല്ലാതെ ഉയരാൻ തുടങ്ങി.... ഇങ്ങനൊരു നിമിഷം ഇതിന് മുൻപ് ഉണ്ടായിട്ടില്ല..... ആ നിമിഷം ഈ പ്രപഞ്ചത്തിലെ ഏറ്റവും സന്തോഷവതി ഞാൻ ആയിരിക്കും എന്ന് തോന്നി

അവൻ ഒന്നുകൂടെ എന്റെ അടുത്തേക്ക് ചേർന്നിരുന്നു.... മഴയുടെ ശബ്ദമോ കാറിൽ പ്ലേ ചെയ്യുന്ന പാട്ടോ മറ്റൊന്നും ഞാൻ കേട്ടില്ല.... വേറെ ഏതോ ലോകത്തായിരുന്നു അപ്പോൾ....

"ഞാൻ ഇപ്പോൾ നിനക്കൊരു ഉമ്മ തന്നാൽ നീയെന്ത് ചെയ്യും...."

അവന്റെ ചോദ്യം കാതിൽ നിന്നും ഹൃദയത്തിലേക്ക് ഒരു കുളിരായി പടർന്നു കയറി

ഉത്തരം കൊടുക്കുന്നതിനു മുൻപേ അവൻ എന്റെ വലതുകവിളിനെ അവന്റെ അധരങ്ങളാൽ സ്വന്തമാക്കിയിരുന്നു.... അവന്റെ ചുണ്ടുകളിലെ നനവും ചൂടും ഒപ്പം കവിളിൽ കുത്തിക്കയറുന്ന അവന്റെ കുറ്റിത്താടിയും മീശയും ഹൃദയത്തിൽ പുതിയൊരു അനുഭൂതി നിറച്ചു.... കുറച്ചു നേരത്തിനു ശേഷമാണ് അവൻ ചുണ്ടുകൾ പിൻവലിച്ചത്.....

"Happy birthday my life ❣️...."

അവൻ കാതിൽ പതിയെ പറഞ്ഞപ്പോൾ അത്ര നേരം ഉണ്ടായിരുന്ന ആ കുഞ്ഞ് പരിഭവം ഒരു തരി പോലുമില്ലാതെ എങ്ങോ പോയി മറഞ്ഞു.....

"12 മണിക്ക് വിളിച്ചില്ലല്ലോ...."

കള്ളപ്പിണക്കം കാണിച്ചു പറഞ്ഞപ്പോൾ അവൻ ഒരു പിരികം ഉയർത്തി എന്നെയൊന്നു നോക്കി

"എന്റെ പൊന്നൂസ് രാത്രി പത്തര കഴിഞ്ഞാൽ കൂർക്കം വലിക്കുമെന്ന് എനിക്കറിഞ്ഞൂടെ..... പിന്നെ ആനകുത്തിയാൽ പോലും നീ അറിയോ... പിന്നെ അങ്ങനൊക്കെ വിളിച്ചു വിഷ് ചെയ്തായിരുന്നേൽ.... ഇപ്പൊ ഇങ്ങനെ ഇത്ര റൊമാന്റിക് ആയിട്ട് വിഷ് ചെയ്യാൻ പറ്റുമായിരുന്നോ...."

"ഓ അപ്പൊ റൊമാൻസൊക്കെ അറിയാം...."

കളിയാക്കിയതാണെന്ന് തോന്നിയത് കൊണ്ടായിരിക്കും അവൻ എന്നേ ഒന്ന് ഇരുത്തി നോക്കി

"ചേട്ടന്റെ റൊമാൻസ് സമയം ആകുമ്പോൾ പൊന്നുമോൾക്ക് കാണിച്ചു തരാമേ....."

അവൻ അതും പറഞ്ഞു കാറിന്റെ ബാക്ക് സീറ്റിലെ കവറിൽ നിന്നും ഒരു ഗിഫ്റ്റ് എനിക്ക് നീട്ടി.... ഞാൻ അതിന്റെ പൊതി അഴിച്ചു മാറ്റിയപ്പോൾ അവൻ അത് എന്റെ കയ്യിൽ നിന്നും വാങ്ങി ഓരോന്നായി പുറത്തെടുത്തു.... ആദ്യത്തേത് ഒരു ഫോട്ടോ ഫ്രെയിം ആയിരുന്നു..... നാലോ അഞ്ചോ വയസ്സുള്ള കുഞ്ഞ് കിച്ചുന്റെയും ഏതാണ്ട് അതെ പ്രായത്തിലുള്ള എന്റെയും കുഞ്ഞിലേ ഉള്ളൊരു പിക് എഡിറ്റ്‌ ചെയ്തു ഒന്നിച്ചാകി ഓയിൽ പെയിന്റിങ് പോലെ ചെയ്തിരിക്കുന്നു ....അതൊരു ബ്ലാക് ഫ്രെയിമിലാണ് അതിൽ " Happy birthday Ponnuse... love u so much" എന്ന് എഴുതിയിരിക്കുന്നു.... ആ ഫോട്ടോ കണ്ട് എനിക്ക് സന്തോഷം അടക്കാനായില്ല.... അത്ര ക്യൂട്ട് ആയിരുന്നു ആ ഫ്രെയിം

അടുത്ത ഗിഫ്റ്റ് "പ്രേമലേഖനം "എന്ന വൈക്കം മുഹമ്മദ്‌ ബഷീറിന്റെ നോവൽ ആയിരുന്നു.......

"പ്രിയപ്പെട്ട പോന്നുസേ... ജീവിതം യൗവനതീഷ്ണവും ഹൃദയം പ്രേമസുരഭിലവുമായിരിക്കുന്ന ഈ അസുലഭകാലഘട്ടത്തെ എന്റെ പ്രിയസുഹൃത്തു എങ്ങനെ വിനിയോഗിക്കുന്നു......

ഞാനാണെങ്കിൽ എന്റെ ജീവിതത്തിലെ നിമിഷങ്ങൾ ഓരോന്നും പൊന്നൂട്ടിയോടുള്ള പ്രേമത്തിൽ കഴിയുകയാണ്....

ഗാഡമായി ചിന്തിച്ചു മധുരോധരകമായ ഒരു മറുപടിയാൽ എന്നേ അനുഗ്രഹിക്കണമെന്ന് അഭ്യർത്ഥിച്ചുകൊണ്ട്.... പൊന്നൂസിന്റെ കിച്ചു......."

ബുക്ക്‌ എനിക്ക് തരുമ്പോൾ അവൻ പറയുന്നത് കെട്ട് ഞാൻ പൊട്ടിച്ചിരിച്ചു പോയി......

അടുത്ത ഗിഫ്റ്റ് കയ്യിലെടുത്തപ്പോൾ അവന്റെ മുഖത്തെ കള്ളച്ചിരി ഞാൻ ശ്രദ്ദിച്ചു.....

"ലാസ്റ്റ് ഗിഫ്റ്റ്....."

അവനൊരു ചെറിയ ബോക്സ് എനിക്ക് നേരെ നീട്ടിയപ്പോൾ ഞാനത് ആകാംഷയോടെ നോക്കി..... ബോക്സ്‌ തുറന്നു ഉള്ളിലിരിക്കുന്നത് കണ്ട് എന്റെ അടിവയറ്റിൽ നിന്നും ഒരായിരം ചിത്രശലഭങ്ങൾ പറന്നുയരുന്ന പോലെ തോന്നി...... എന്റെ തൊണ്ടയൊക്കെ വരണ്ടു വന്നു...... അവനെ നോക്കാൻ പോലും എനിക്ക് ആവുന്നില്ല.....കണ്ണുകൾ ഇറുക്കിയടച്ചു എങ്ങനെയോ ധൈര്യം സംഭരിച്ചു ഞാൻ അവനെ നോക്കി..... അവൻ എന്നേ തന്നെ നോക്കിയിരിക്കുകയാണ്... എന്നിലെ ഭാവങ്ങളെ അവൻ കണ്ണിമയ്ക്കാതെ നോക്കിയിരുന്നു

"ഇപ്പൊ അല്ല പൊന്നുസേ... നീ എന്റെ മാത്രം ആകുമ്പോൾ.... അപ്പോൾ ഇട്ട് കണ്ടാൽ മതി.... അത് എത്ര ഭംഗിയുണ്ടാവുമെന്ന് I can imagine.... അപ്പൊ എനിക്ക് കാണണമെന്ന് തോന്നുമ്പോഴൊക്കെ കാണാല്ലോ.... എനിക്ക്......"

ബാക്കി പറയുന്നതിന് മുൻപേ ഞാൻ അവന്റെ വാ പൊത്തി വേണ്ടെന്ന് തലയാട്ടി.... അത് കേൾക്കാനുള്ള ത്രാണി ഇല്ല....അവന്റെ കണ്ണുകളെ നേരിടാൻ കഴിയാതെ ഞാൻ വേറെ എങ്ങോട്ടാ നോക്കിയിരുന്നു

ഈ ചെറുക്കനെയാണല്ലോ തൊട്ട് മുന്നേ വരെ മൂരാച്ചിയെന്ന് മനസ്സിൽ വിളിച്ചതെന്ന് ഓർത്തുപോയി......അവൻ എന്റെ കൈ എടുത്തു മാറ്റി അതിൽ ഒന്ന് മുത്തി...

"പോകാം....."

അവൻ ചോദിച്ചപ്പോൾ ഞാൻ തലയാട്ടി.... എവിടെയോ അത്യാവശ്യമായി പോകേണ്ടത് കൊണ്ട് നേരെ അവൻ എന്നേ ഫ്ലാടിലാക്കിയിട്ടാണ് പോയത്.... ലിഫ്റ്റിൽ നിൽക്കുമ്പോഴും ഞാൻ വെറുതെ ചിരിച്ചുകൊണ്ട് നിന്നു.... എനിക്ക് വട്ടാണെന്ന് കണ്ടവരെല്ലാം കരുതിക്കാണും.... ആര് കണ്ടാലും സാരമില്ല ഇന്ന് ഞാൻ അത്ര ഹാപ്പിയാണ്....ഫ്ലാറ്റിലേക്ക് കയറും മുന്നേ ആ ചെറിയ ബോക്സ്‌ ഞാൻ സ്ലിംഗ് ബാഗിലേക്ക് മാറ്റി വെച്ചു....

ഫ്രെയിമും ബുക്കും പാറു വിശദമായി പരിശോധിക്കുവാണ് .....

"കുറച്ചുകൂടെ റൊമാന്റിക് ആയ ഗിഫ്റ്റൊക്കെ തരാമായിരുന്നു....ഇതിപ്പോ ബുക്കോ....കിച്ചു ശ്രീയേട്ടന്റെ അത്ര റൊമാന്റിക് അല്ലല്ലെ...."

ഞാൻ ഒരു ചിരിയോടെ തലയാട്ടി അതെല്ലാമായി നേരെ റൂമിലേക്ക് പോയി വാതിലടച്ചു.... അലമാരിയിലേക്ക് വെയ്ക്കുന്നതിനു മുന്നേ ആ കുഞ്ഞു ബോക്സിനുള്ളിലെ ബ്ലാക്കും വൈറ്റും പേൾസ് പതിപ്പിച്ച മുത്തരഞ്ഞാണത്തിലേക്ക് ഞാൻ ഒന്നുകൂടെ നോക്കി.... ഒരു ചിരിയോടെ അത് സൂക്ഷിച്ചു വെച്ചു.....

ഫോണിലെ ലോക്ക് സ്ക്രീനിലെ അവന്റെ ഫോട്ടോയിലേക്ക് കുറച്ചു സമയം നോക്കിയിട്ട് അതിലേക്ക് അമർത്തി ഉമ്മവെച്ചു...... അപ്പോഴേക്കും എന്റെ കവിളിൽ നാണത്തിന്റെ ചുവന്ന പൂക്കൾ മൊട്ടിട്ടിരുന്നു............ ❤️

Aksharathalukal

🧡ഒരു അൺറൊമാന്റിക് ഡേറ്റ് 🧡

പാർവതിരുദ് 5

മധുരം തേടി.. 🥀ഭാഗം 2

മാന്ത്രിക സപ്തകം 1

STEREOTYPES - PART 18

💞നിളാകാശീയം💞-1